1 Kusumininwa

MOKUSHINTULWILA

Balume ne bakaji basumininwe kushala mu busongi bwabo i bekutyile mu kijimba kya lonso, ne kino kibalengejanga bekulupile. Umo ne umo pa ba mulume ne mukaji ukulupile amba mwinē pandi ukalonga bukomo bwa kulama kijimba kyabo kya busongi nansha ke mu bitatyi bya makambakano.

Bantu bamo besongele kebashikatyile’tu mfudilwa mwanda wa kutyina kunenwa na ba mu kibundi nansha ba mu kisaka shi abelubula. Kebayukilepo amba kusumininwa po pemanine buswe bwa kwisanswa umo ku mukwabo ne kwilēmeka.

MUSOÑANYA WA MU BIBLE: “Mulume kafwaninwepo kushiya mukajandi.”​—1 Kodinda 7:11.

“Shi mwi basumininwe kushala mu busongi bwenu, nabya kemukelobelapo kyaba ne kyaba. Mukelekela bukidibukidi ne kwilomba lusa pampikwa kwija. Mukamona makambakano bu kijika, ino ke bu mwandapo ulomba dilubu.”​—Micah.

MWANDA WAKA KIDI NA MVUBU?

Ba mulume ne mukaji bampikwa kusumininwa kushala mu busongi bwabo pobatanwa na makambakano, divule bafulanga ku kunena’mba, ‘Kwadipo wami’ ne kukimba pa kwilubwila.

“Bantu bavule pobesoñanga bayukile amba shi bintu kebyendekelepo, nabya bakelubula. Shi bantu badi kala na mulangwe wa kwilubula mu ñeni pobesonga, ko kunena’mba kebasumininwepo kushala mu busongi tamba ku ngalwilo.”​—Jean.

BYA KULONGA

WIBANDAULE

Shi mubepotomeja . . .

• Lelo wialakanyanga kyomwesongele na mwinē pobe?

• Le ulañanga ya kwisonga na muntu mukwabo?

• Le unenanga bintu pamo bwa amba, “Nkakunyemanga” nansha’mba, “Nsa kukimba muntu mukwabo umwenine’mo”?

Shi ubalondolola’mba en-en ku kipangujo kimo nansha bivule pa bino, nabya kino kyo kitatyi kya kusumininwa bininge kushala mu busongi bwenu.

WISAMBE NA MWINĒ POBE

• Le kusumininwa kwetu kwendanga kuzoboloka? Shi i amo, mwanda waka?

• Le i matabula’ka otufwaninwe kutabula pa kuningija kusumininwa kwetu?

MADINGI

• Kyaba kimo lembela’ko mwinē pobe kamukanda ka buswe

• Lombola’mba usumininwe kushala mu busongi bwenu na kutūla mafoto a mwinē pobe pa obe meza ku kaji koingila

• Ita mwinē pobe difuku ne difuku podi ku kaji nansha kitatyi kyokemudipo nandi pamo

MUSOÑANYA WA MU BIBLE: “Kyokya kyakuta Leza pamo mu lupungu, muntu nansha umo kakikalañanya’kyo.”​—Mateo 19:6.