Būmi Bulumbuluke Bukaya Kumeso

Yesu wela Satana mu lupongo — Pano pano ponka Satana ne bandemona bakelwanga mu kifungo

Satana ne bandemona bandi kebakikabepelapo kadi bantu monka. Yehova kemwibēle kala panja pa diūlu. (Kusokwelwa 12:9) Panopano ponka, Leza ukavundamukila monka kudi Satana ne bandemona bandi. Mu kimonwa kyandi kitamba kudi Leza, mutumibwa Yoano wānene’mba: “Penepo kala, namwene ne mwikeulu utūka mūlu, wa lufungulo lwa lupongo’lwa, ne lukano lukatampe byamalwa mu kuboko kwandi. Ino wakwata mukishi’wa, nyoka wa kala na kalā, ke dyabola, Satana mwine, kadi, wamukuta myaka kanunu, wamwela monka mu lupongo’mo, washitako, watūlapo ne kiyūkeno pādi, amba wakongola dikwabo mizo, poso’mba myaka kanunu īfike.” (Kusokwelwa 20:1-3) Kupwa, Dyabola ne bandemona bandi bakonakanyibwa lonso fututu.—Kusokwelwa 20:10.

Bantu babi badi pano pantanda nabo bakonakanibwanga kumo.—Mitōto 37:9, 10; Luka 13:5.

Bafu Bakekalanga na Būmi Monka!

Bantu batundaila bafwe basangulwa mu paladisa pa ntanda — Bafu bakekalanga na būmi monka pano pantanda

Satana ne bandemona pa kupwa kwelwa mu kifungo, Yehova ukeselanga bantu bandi madyese mavule. Vulukai’mba bafu kebadipo na būmi, kebadikopo. Yesu waenzakēnye lufu na tulo—tulo tukomo twampikwa bilōtwa. (Yoano 11:11-14) Mwanda wādi uyukile’mba kukekalanga kitatyi kikasangulwa bafu. Wānene’mba: “Mwaka wiyako’wa bonso badi mu bibundu [bikavulukwa] . . . ne kutamba bakatambemo.”—Yoano 5:28, 29; enzakanya na Bilongwa 24:15.

Bakapebwanga būmi pano pantanda. Kyaba kya kwivwana misapu ya mfwanyi, ino kukekalanga misapu ya nsangaji ya boba bakajokejibwa ku būmi! Nsangaji ikekalanga mivule potukatundaila bakena betu pobakatamba mu bibundu!