Masomo a Bulopwe—Kufundija Bengidi ba Mulopwe

UBAMUNGAMUNGA pesamba muneni ku lukala. I tutu nsongwalume wa mu kyenu kipwilo unena mwisambo wandi umbajinji ku kitango. Poendelela na kuteja uno mwisambo, kotulumuka’nka kutulumuka pa muswelo ufundijibwa bantu ba Leza. Ubavuluka paadi ukyanzaanza kupityija kipindi kyandi kibajinji mu kipwilo—ino tala pano mwaashintyila! Waendelele bininge pa kupwa kufunda Masomo a Bapania. Kadi panopano, aye ne wandi mukaji baendele ku Masomo a Basapudi ba Bulopwe. Pomwakashila nkashi pa mwisambo muyampe wa uno tutu, ubaela meso koku ne koku ne kulangulukila pa bufundiji butambula bantu ba Leza bonso.

Bible wālaile amba kudi kitatyi bantu ba Leza bonso ‘kyobakafundijibwa na Yehova.’ (Isa. 54:13) Tudi mu kine kitatyi’kyo. Tufundijibwanga kupityila ku mabuku etu ku kupwila, ku bitango, ne ku masomo palapala ateakanibwe na bulongolodi bwa Yehova atala mingilo kampanda. Mu kino kipindi tusa kumona ano masomo moaletela bukamoni bukomo bulombola’mba Bulopwe bwa Leza buludikanga dyalelo.