Mwa Kulamina Lupeto

Batwe bonso tusakilwanga lupeto lwa kuvuija nalo bisakibwa bya mu kisaka. (Nkindi 30:8) Eyo, “bupeta i nsakwa.” (Musapudi 7:12) Byomudi ba mulume ne mukaji, dimodimo mwikakanga kwisambila pa lupeto, ino kemwakilekai lupeto lwimuletele myanda mu busongi bwenu. (Efisesa 4:32) Ba mulume ne mukaji bafwaninwe kwikulupila abo bonso ne kwingidila pamo pobakuta nkuku ya mwa kwingidijija lupeto.

1 KWATAI MPANGIKO NA TUNANGU

BINENA BIBLE: “I ani momudi’mo usaka kūbaka kiteba kashikatapo bidi wapikula lupeto lwasa kujimija ne kumona shi udi na lupeto lubwane mwa kuvuila’kyo?” (Luka 14:28) I biyampe kukwatyila mpango pamo ya mwa kwingidijija lupeto lwenu. (Amose 3:3) Telai byomusaka kupota ne buvule bwa lupeto lomusa kupota nalo. (Nkindi 31:16) Kwikala na lupeto lubwanya kupota bintu kampanda, kekushintululapo amba mufwaninwe’nka kwibipota. Tyinai mapu. Ingidijai enka lupeto lomudi nalo.—Nkindi 21:5; 22:7.

BYOMUKOKEJA KULONGA:

• Shi mudi na kamukōlo kashele ku mfulo kwa kweji, mwisambilei pamo mwa kwikengidijija

• Shi lupeto lubemutyepela, kwatai mpangiko mipotoloke ya kutyepeja milupu. Kimfwa, mubwanya kutēka bidibwa banwe bene kupita’ko kukadya ku leshitola

2 NENA PA KUBULWA KAFINDA MUNGYA BINTU MOBIKADILE

BINENA BIBLE: ‘Longai byonso pampikwa budimbidimbi, ke’nkapo ku meso a Yehova kete, ino i ne ku meso a bantu kwine.’ (2 Kodinda 8:21) Ikala wampikwa budimbidimbi na mwinē pobe pa lupeto losokola ne lolupula.

Mwisambei nyeke na mwinē pobe pomukwata butyibi bwa mvubu mu myanda itala lupeto. (Nkindi 13:10) Kwisambila pamo pa myanda ya lupeto kukemulamina ndoe mu busongi bwenu. Kokamona musokwe obe bu lupeto lobe kasuku, ino bu lwa kisaka.—1 Temote 5:8.

BYOMUKOKEJA KULONGA:

• Tungai lupeto lubwanya kwingidija muntu ne muntu pampikwa kadi kwisambila’po

• Kemwakesambilai pa lupeto enka shi kubatambe mwanda