Kishima “Mwine Kidishitu”—Lelo Kibajimija Buluji?

KWIKALA mwine Kidishitu kishintulula namani? Le ukokeja kulondolola’po namani? Kino kipangujo kyaipangwilwe bantu pala pala mu matanda meshileshile, ivwana malondololo abo amoamo:

“Kulonda Yesu ne kumwiula.”

“Kwikala muntu muyampe ne kupa bakwetu bintu.”

“Kwitabija Kidishitu amba i Mfumwami ne Mupandiji.”

“Kwenda ku Misa, kusambila na Shapele ne kutambula Komonyo Misanto.”

“Monangila, kwikala mwine Kidishitu ke kwendapo ku kipwilo.”

Nansha ke mabuku ashintulula bishima mene kealetelepo nshintulwilo imo. Dibuku dimo i dilete nshintulwilo dikumi pa kishima “mwine Kidishitu,” imbajinji amba i “kwitabija nansha kwikala umo wa mu mutōtelo wa Yesu Kidishitu,” ya mfulo amba i “kwikala muntu mulumbuluke, muyampe.” Nanshi ke kya kutulumukapo shi bantu bavule bakomenwe kuleta buluji bwa kishima kwikala mwine Kidishitu.

Muntu ne Muntu Mwayukile

Dyalelo bantu betela bu bene Kidishitu—nansha batōtela mu njibo imo—badi na milangwe pala pala pa myanda mivule, kifwa ya kusonekwa kwa Bible ku bukomo bwa mushipiditu wa Leza, lufundijo lwa kwialamuna, kwikuja kwa kipwilo mu myanda ya kipolitike, ne kusapwila bakwabo lwitabijo lwabo. Ne myanda ya umbūmi, pamo bwa kupulumuna memi, buenda bwa bantu ba ngitu imo, kushikata bya ntekele nkuvwike, nayo iletanga lupotopoto lwabinebine. Kyalengeja bino byonso i bwanapabo bwa kuleka muntu ne muntu ulonga mwayukile.

Kifwa, panopano kidye kimo kya kipwilo kya bene Mishoni kyaitabije kulonda lubila lwa kipwilo lwa “kutonga mwana-mulume wenda patōkelela buenda na bana-balume bu mukulumpe mu kitango kiludika kipwilo,” mo munenena julunale umo (Christian Century).

Bafundi bamo ba teoloji bafudile ne ku kunena amba lwitabijo mudi Yesu ke kintupo kikatampe kisakibwa pa kupanda. Bakulupile amba Bayuda, Bamizilma, ne bakwabo “bakokeja nabo kwenda mūlu [monka mwendela’mo bene Kidishitu],” mo munenena julunale mukwabo (The New York Times).

Langa’po bidi, shi muntu witela bu mulondi wa Marx (wādi ufundija kwingidila bintu byonso umbumo), ino ubingija mushipiditu wa kadi pako kabamba ñoma; nansha amba i mulondi wa kidemokrasi, ino aye usonshila buludiki bwa kutādila bantu; witela bu muntu upela bantu bone ntanda, ino koku ukwasha bantemi ba mato. Mwene ukanena’mba: “Yao muntu ke mulondipo wa Marx nansha wa kidemokrasi kine, kadi ke muntupo upela bantu bone ntanda”? Kunena namino i koloke. Ino shi utale milangwe pala pala ya boba betela dyalelo bu bene Kidishitu, ukamona amba nkulupilo yabo i mishile kulampe kwine, ipatanya ne byāfundije Mushimiki wa bwine Kidishitu mwine, Yesu Kidishitu. Lelo kuno kwishila kwitulombola bika pa bwine Kidishitu bwabo?—1 Kodinda 1:10.

Mulangwe wa kusaka kushinta mfundijo ya bwine Kidishitu pangya mulangilo wa lukongo ne lukongo keushilwilepo dyalelo, mo motusa kwikimwena. Lelo Leza ne Yesu Kidishitu bamwene namani kuno kushinta? Lelo bipwilo bifundija mfundijo keikwatañene na byāfundije Kidishitu bikokeja nabyo kwitela bu bya bwine Kidishitu? Bino bipangujo bikalondololwa mu kishinte kilonda’ko.