Le Ukokeja Kukulupila Kipwilo mu Mwanda Utala Lupeto?

Estellea wadi wendanga nyeke ku kipwilo na bana bavule. Unena amba, “nalombwele oñingilanga nandi amba nsakanga kwifunda myanda ya mu Bible.” Ino kadipo usaka kumufundija. Mfulo mfulō, waleka’byo kwenda ku kipwilo. Ubweja’ko amba: “Bendeji ba kipwilo bansonekēle ne nkunena amba shi nkibwanyapo kwenda’ko, nkatuma’tu enka lupeto. Ke nanga’amba, ‘kebamwene’popo mwanda nansha shi nkyendelepo ku kipwilo; basaka’tu’nka lupeto lwami.’”

Angelina wadi nyeke mu kipwilo unena amba: “Mu kyami kipwilo badi bapityija lubenji misunsa isatu mu butōtyi ne butōtyi, kadi twadi tunenwe kutūla lupeto musunsa ne musunsa. Badi balomba nyeke lupeto. Ke nanga amba, ‘kebadipo na mushipiditu wa Leza.’”

Le bipwilo bya mu kyenu kibundi bingidijanga manwa palapala mwanda wa kuningila bantu batūle mwa kusokwela lupeto? Le uno mulongelo ukwatañene na binena Bible?

LE I BIKA BIFUNDIJA BIBLE?

Yesu mushiludi wa bwine Kidishitu wānene amba: “Umbatambula’byo bitupu, nenu kebapei byo bitupu.” (Mateo 10:8) Musapu wa mu Bible i wa ku bitupu kadi ufwaninwe kupebwa bonso basaka’o.

Le bene Kidishitu babajinji bādi bajika milupu namani?

Muntu yense wādi upāna “monka, wa byandi, wa byandi, kadi kenamutyimapo wa kufītwa, mhm, nansha wa kininga; mwanda aye Leza uswele wakupana ne mutyima, tō.” (2 Kodinda 9:7) Mutumibwa Polo wānene amba: “[Twaingile] bufuku ne mwinya, mwanda wa kunena’mba, twakemumwenamo pa kwitulela, twemusapwidile myanda-miyampe.” (1 Tasalonika 2:9) Polo wādi usona mapema mwanda wa kukwatakanya mwingilo wandi.​—Bilongwa 18:2, 3.

LE BATUMONI BA YEHOVA BALOÑANGA NAMANI?

Divule dine Batumoni ba Yehova babungakenanga mu byubakwa bitwa bu Mobo a Bulopwe. Lelo milupu ijikwanga namani? Kebapityijangapo nansha dimo lubenji, nansha kutuma ma amvelope a kulomba byabuntu. Ino muntu yense usangela mpangiko ya ku mushipiditu, ubwanya kutūla byabuntu mu kasanduku ka byabuntu kadi ku Njibo ya Bulopwe.

I kimweke patōka amba, dino dipepala dilombanga lupeto pa kwiditampa ne kwidituma. Inoko, kukamonepo muntu widisumbija mwanda wa kumona lupeto. Dimanine pa kufundija bubinebine bwa mu Bible.

Le ulanga’po namani: Le uno muswelo wa kujika milupu ukwatañene na binenwa bya Yesu ne na kimfwa kya bene Kidishitu babajinji?