Le Kudi Kipwilo Kampanda Kifwaninwe Kukulupilwa?

Shi kipwilo kampanda kyakutyumwine mutyima, ubwanya kukomenwa kukulupila kipwilo kyo-kyonso. Ino kulupila’mba kudi kipwilo kyofwaninwe kukulupila. Yesu paādi pano pa ntanda, wākongakenye kisumpi kya balondi ba kikōkeji ne kwibafundija’mba beendeje mungya misoñanya ya Leza. Balondi ba binebine ba Kidishitu—bantu balonga bukomo bwa kulonda misoñanya ya Kidishitu mu būmi​—bakidi’ko. Le ukebatana kwepi?

Estelle utelelwe mu kishinte kibajinji, unena amba: “Naanjile kwifunda Bible kitatyi kyonashilwile kwifunda na Batumoni ba Yehova. Ne kwija kwine mpika naivwanija Yoano 8:32, utangwa amba: ‘Mukayūkidijanga bya bu-binebine, nabyo bikemukūlanga ke mudi bāna-pabo.’”

Ray utelelwe nandi ku ngalwilo, unena amba: “Pa kwifunda Bible na Batumoni ba Yehova, nayukile amba Leza kaletelepo masusu asusuka bantu. Nafwijije’ko pa kuyuka’mba, nansha Leza byadi na bubinga bwinebwine bwa kulekela’ko bibi bidi’ko dyalelo, ino i mulaye kwibitalula’ko panopano ponka.”

I kimweke patōka’mba, i bikomo kulonga byoloke mu bantu bavule balonda misoñanya mifwe ya ino ntanda ya mu mwikadilo. Inoko bibwanika. Bantu bavule basakilwa kukwashibwa amba bevwanije Bible ne kumwingidija. O mwanda Batumoni ba Yehova bendejanga ku bitupu bifundwa bya Bible bya bantu midiyo ne midiyo kujokoloka ntanda yonso. Yenga ne yenga, bantu bavule befundanga byobya bine bifundija Bible. Mfulo mfulō, bafwena pabwipi na Umpangi wabo ne kwikala na būmi bwa nsangaji.a

Musunsa mukwabo oketana na Batumoni ba Yehova, ubulwe’po kwibepangula kine kyobakulupidile kipwilo kyabo? Bandaula bufundiji bwabo ne bilembwa byabo. Penepa utyibe abe mwine shi kudi kipwilo kyobwanya kukulupila.