Mwanda Waka Ufwaninwe Kubandaula Kipwilo Kyobe?

Langa’po bidi shi usa kupasulwa misongo mikomo. Ukasakilwa kwikala na kikulupiji kikatampe mudi muñanga wa kukupasula, mwanda būmi bobe budi mu makasa andi. Mwene i biyampe kubandaula na katentekeji bwino bwandi?

Mu muswelo umo onka, i biyampe kubandaula na katentekeji kipwilo kyobe. Shi udi mu kipwilo kampanda, na bubine būmi bobe bwa ku mushipiditu budi mu makasa akyo. Enka ne dyese dyobe dya kupanda dine.

Yesu wāletele musoñanya witukwasha tubandaule kipwilo kyetu shi i kya bine. Wānene amba: “Mityi yonso īyūkilwa ku bipa byayo.” (Luka 6:44) Kimfwa, kitatyi kyotalanga kipwilo kapanda nansha kitango, le kipanga bipa’ka? Le bendeji bakyo batele mutyima bininge ku lupeto? Le bantu badi’mo balondanga misoñanya ya mu Bible mu mwanda utala divita ne mu mwikadilo? Penepa, le kekudipo kipwilo kampanda kifwaninwe kukulupilwa? Tubakwite ubandaule bishinte bilonda’ko.