Tulongelei Bakwabo Biyampe Na Kulondalonda Boba Basangela Musapu

 ¹ I kika kyotwimaninangapo mwanda wa kutyiba mbila ya kushila mwisambi netu dibuku? Pa mwanda umo wa mvubu mikatampe: kusangela kwandi kwa musapu. I enka kadi pa buno butyibi potwimaninanga mwanda wa kujoka kutala bantu. Kitatyi kyotumona muntu usepelele musapu wa Bulopwe, nansha bityetye’tu, tuloñanga buninge bwetu bonso mwanda wa tumulongele biyampe. Twendanga kukamupempula mu kujokelamo kupya mwanda wa kukabija kilokoloko kyandi kya kusangalela musapu ne kushilula kifundwa kya Bible. Kino namino ye kitungo kyetu nansha shi ketushilepo mikanda yetu. Lelo i muswelo’ka otukekikokeja?

 ² Shi misambo yetu imbajinji yadi imanine pa kusambakana kwa bikambija bitala pa busongi ne shi twamushidile dibuku “Kwikala ne būmi bwanyeke,” tukokeja kushilula misambo amba:

◼ “Musunsu mukwabo onapityile, twesambile pa busongi ne pa madingi mafwaninwe a mu Bible akokeja kwituletela nsangaji. Lelo kulangapo amba nansha ke bisaka bilumbuluke nabyo bitanwanga na makambakano? [Muleke akulondolole.] Bible upānanga madingi malumbuluke atala pa muswelo wa kupwija bikambija mu kisaka. Kikokeja kwikala kyakamweno kwifunda Bible mu kisaka.” Putula dibuku pa paje 246 ne wisambile pa musāngo 23. Tanga Yoano 17:​3, ne lombola kisaka’mba, usakanga kwifunda nabo Bible.

 ³ Shi twesambile pa mwanda utala bana ne pa mvubu ya kwibapa bufundiji buyampe, tukokeja kwendeleja misambo namino:

◼ “Musunsa wamfulo, twashintulwile’mba bana bafwaninwe kutambula bufundiji bwa kumushipiditu, kadi twamwene muswelo ukokeja bambutwile kwibapa buno bufundiji. Bambutwile bavule botwitananga nabo badi nyeke mityima kūlu pamwanda wa mwiendelejo umbi wa bankasampe. Lelo nobe ulanga namani pa mwanda utala . . . ? [Tela kimfwa kya konakana kwa mwiendelejo wa bankasampe kumonwa pavule mu mukenza, ne muleke akulondolole.] Leka bidi nkulombole madingi mafwaninwe adi mu Bible.” Putula dibuku Kwikala ne būmi bwanyeke pa paje 246, musāngo 22, wisambile pa mulangwe mukatampe udipo, kadi tanga Efisesa 6:⁠4. Lombola’mba bana bonso bine basakilwanga bufundiji ne bwendeji ne kadi’mba, kitatyi kyobebutambulanga ku bambutwile babo, bana bankasampe bekalanga na nsangaji ne bulēme bukatampe. Shintulula muswelo otwifundanga Bible na betu bana.

 ⁴ Shi misambo yadi imanine pa Paladisa pano pantanda, langula misambo namino:

◼ “Twadi tubamone bifwatulo bimo-bimo mu dino dibuku bitulombola kimfwa kya mukekadila ntanda kitatyi kikeilonga Leza ikekale ke paladisa. Ino nanshi nsangaji yetu keikekalapo mibwaninine shi tukekale mu ino paladisa pakubulwa boba botusenswe. Lelo keamopo? [Muleke akulondolole.] Kupwa putula dibuku Kwikala ne būmi bwanyeke pa paje 162. Tanga Kusokwelwa 21:​3, 4, ne shintulula motukekadila pamo na bakena betu nyeke ne nyeke. Shi mwisambi netu usangedile musapu, tanga Yoano 5:​28, 29 mwanda wa kulombola’mba bafu bakajokelanga ku būmi. Pa kulombola na bunwa kibalu kya dibuku, nena’mba: “Binobi bikafikidilanga bine: kikokejika kwikala na būmi bwanyeke mu Paladisa pano pantanda!” Mupe kilayeno mwanda wa kumumona dikwabo ne kumulombola kyokya kitutwala kukulanga’mba Paladisa keidi pabwipi.

 ⁵ Kitungo kikatampe kya kujokelamo kupya i kupa bantu basangela musapu wa Bulopwe muswelo wa kumwena’mo kamweno. I kikomo kutana bantu boba kebasake’po kusamunwa pa mutyima mwanda wa bashilule kwabila bintu bya kumushipiditu. Kokela mwisambi nobe pa milangwe mipotōloke mifwaninwe mu mikanda, na kwisambila bininge pa kamweno ka kwivwanija Bible senene. Shi tulonge namino mu kujokelamo kwetu kupya, nankyo tukalonga bakwabo biyampe mu muswelo mwendelemo.