Tukwashei Bakwabo Batambule Byabuyabuya
1 Yehova i mulaye kwitufundija byobya byotufwaninwe kuyuka. Witupa uno mulao mu Mitōto 32:8, amba: “Nkakulombolanga ñeni, ne kukufundija mu dishinda dyōkendanga: Nkakupanga ñeni ne dīso dyami ponka padi abe.” Kotudi, kino kikulupiji i nsulo mikatampe ya byabuyabuya. Na kwipāna konso, tusakanga kulombola mukwetu kamweno kakokeja kumwena mu kulonda madingi atunangu a mu Bible. (Isaya 48:17) Ye akyo kyotukalonga na kupāna dibuku Kwikala ne būmi bwanyeke mu kweji wabusatu. Mu musapwilo wetu, tukokeja kulombola mu miswelo mishileshile mvubu ya Bible.
2 Makambakano atala pa busongi byo asambakene konso-konso mu kino kyetu kitatyi, tukokeja kupāna uno mulangwe na kwimanina pa dibuku “Kwikala ne būmi bwanyeke”:
◼ “Bantu bavule bokendi mwisambe nabo bazumbijanga mityima pamwanda wa kwilundilako kutulumukwa kwa makambakano atala pa myanda ya busongi ne pa kuvula kwa kibalwa kya bantu belubula. Lelo ulanga namani pa ino ngikadila? [Muleke akulondolole.] Bavule kebajingulwilepo buluji bukatampe bwa ano makambakano. Shi ba mulume ne mukaji bonso bādi’mba baloñanga buninge bwa binebine, longa kebādi’po bakupandija enka bulubo bwabo, ino kadi, badi bakutana ne nsangaji ya binebine. Kwingidija kwa madingi adi mu Bible kupānanga muswelo wa kutana nsangaji mu busongi.” Tangai Efisesa 5:28, 29, 33. Putula, dibuku pa paje 243, bandaula musāngo wa 16 ne wa 17 kupwa mulombole dibuku.
3 Bana basakanga bambutwile babo bebatudileko kitatyi kilēme ne bebaté mutyima mwanda wa kwibafundija. Pa kupāna dibuku “Kwikala ne būmi bwanyeke,” tukokeja kunena’mba:
◼ “Batwe bonso tutele mutyima ku mafuku akaya kumeso a betu bana. Molangila, lelo i muswelo’ka mulumbuluke ku bambutwile wa kuteakanya babo bana mwanda wa mafuku malumbuluke akaya kumeso? [Muleke akulondolole.] Imvwana madingi a mu Bible aleta ino nkindi ya mu Bible yasonekelwe kepadi kubwipi kwa myaka 3 000. [Tangai Nkindi 22:6.] Nanshako betu bana byobamwenanga kamweno mu bufundiji bobatambulanga ku masomo, inoko bambutwile mu kisaka, ye abo badi na kiselwa kya kwibapa bufundiji bulumbuluke. Bine bulombanga kitatyi, katentekeji ne buswe, inoko bine kifwaninwe kulongelwa buninge.” Putulai kitabo pa paje 245 ne bandaulai musāngo wa 20 ne wa 21. Kupwa shintulula muswelo ukokeja kwingidijibwa dino dibuku mwanda wa kwifunda Bible mu kisaka.
4 Tukokeja pakwabo kupāna dibuku “Kwikala ne būmi bwanyeke” na kushintulula’mba ntanda ikekalanga ke Paladisa:
◼ “Padi wiipangula i būmi bwa muswelo’ka bwitutengele mafuku akaya kumeso. Mu milombelo ya Tata wetu udi mūlu, Yesu wetufundije kulombela mwanda wa kiswamutyima kya Leza kilongeke pano pantanda pamo’nka na mokilongekela momwa mūlu. Ntanda lelo ikeifwananga na kika, kitatyi kikafikidila bino binenwa? [Muleke ukulondolole.] Tala kifwatulo kilumbuluke kilombola mukekadila ntanda bu Paladisa. [Lombola kifwatulo kya pa paje 12 ne 13. Kupwa tanga Isaya 11:6-9, utelelwe mu musāngo 12.] Lelo keikekalapo nsangaji mikatampe kwikala mu kifuko kidi namino’u? Dino dibuku dishintululanga ngikadilo ikekalamo kisaka kyobe ne abe mwine mu Paladisa.”
5 Tufwaninwe kuteakanya musapwilo wetu shi tusaka kutana bipa bilumbuluke mu mwingilo wa ku njibo ne njibo. Dibajinji dya kukokola ku kinjilo, witeakanye bidi mwanda wa kwisambila pa mulangwe mupotōloke wa mu Bible. Kadi badikila kuteakanya mu ñeni nshintulwilo mīpi itala pa mulangwe wa mu mulami nansha mu talakite otusaka kupāna shi muntu wapele dibuku. Nanshi umbula bwa uno kweji wabusatu, tukakwatakanya bitatyi byonso byotumona mikenga mwanda wa kukuna nkunwa ya Bulopwe. (Mus. 11:6) Namino, tukakwasha bakwabo bakatambule byabuyabuya byanyeke.