“Bukwashi Mu Kitatyi Kifwaninwe”
1 Kikalanga kikankamika shi bukwashi bubafika ponka pa kitatyi kyotwibusaka! (Bah. 4:16) Ku kitango kya distrike “Mikendi ya Ndoe ya Leza,” twasangele mpata potwatambwile pa kitatyi kifwaninwe bingidilwa bibidi bya bukwashi bwa mvubu mikatampe.
2 Dibuku dipya, Lufungulo lwa Būmi Bwansangaji mu Kisaka (Falanse), dyafikile pa kitatyi kifwaninwe. Dimanine pa milangwe iná ya kamweno mu būmi bwansangaji mu kisaka: (1) kwifula, (2) kikōkeji ku lupusa lwa bu mutwe, (3) kwisambila pamo kulumbuluke ne (4) buswe. Madingi atanwa mu dibuku Būmi Bwansangaji mu Kisaka akakwasha bisaka byonso bikengidija’o bimone kutana ndoe ya Leza. Twitūdilei’ko kyaba kya kutanga na katentekeji ne kwifunda’dyo mu kisaka. Tujingululei myanda mikatampe yodimanine’po mwanda wa kwikala belongolole pa kukedingidija senene kitatyi kyotukapāna’dyo munsunsa umbajinji ku bantu, mu kweji 4.
3 Mukanda mupya, I Kika Kisaka Leza Kotudi? i mufike pa kitatyi kifwaninwe mwanda wa kupēleja mwingilo wa kulonga bana-babwanga. Nansha kitungo kyao byokidi dibajinji kya kukwasha bantu kebayukile kutanga senene, ino batame bavule ne banuke bayukile kutanga nabo bakamwena mu bushintuludi bupēla bwa bufundiji bwa pa kitako bwa Bible butanwa’mo. Kino kikekala kingidilwa kifwaninwe kushilula nakyo kifundwa bitupu, kupwa ke kwendelela mu dibuku Buyuki. Kepadipo ne kya kutatana kine, uno mukanda ukakwasha bantu pakatampe, bakate mutyima ku madyese mavule obakokeja kutambula shi abalonga kyokya kisaka Leza kotudi.
4 I kyabine, Davida wālombwele mwikadile milangwe yotudi nayo, pānene’mba ‘kakabulwangapo, mhm, kadi umwalwija mūya wandi ne kitomeno kyandi kibayūla bā! ke kimwangika ne kumwangika.’ (Mit. 23:1, 3, 5) Tukasepelela pa kushiya bino bingidilwa bya bukwashi bwa kumushipiditu ku bantu bavule bābila na mutyima umo kuyuka Yehova, Leza wabine, ne kumwingidila.