Twi Babwanye Bisakibwa Ne Bakumbanye Bingidilwa Byonso Mwanda Wa Kufundija Bakwabo
1 Yehova wātongele Mosesa mwanda wa kukamwimanina ku meso a Felo, ino aye wēmona bu kakokejapo kukasapula myanda itamba kudi Leza. (Div. 4:10; 6:12) Yelemia wēlombwele bu kabwanyapo kwikala mupolofeto wa Yehova, pāanene kudi Leza amba nkikokejapo kwisamba. (Yel. 1:6) Bine kungalwilo, bano bapolofeto babidi kebādipo na kikulupiji amba bakabwanya, ino kumfulo bāikala ba tumoni twa Yehova bakankamane. Ke-pantu Leza wēbafundije senene.
2 Dyalelo nadyo, Yehova imwitupe byonso bitusakilwa mwanda wa tubwanye mwingilo wetu. (2 Kod. 3:4, 5; 2 Tem. 3:l7) Pamo’nka bwa sendwe wabwino, mukunkanye bingidilwa, tudi netu na bingidilwa bifwaninwe bitukwasha twiuvuije senene. Mu kweji 2, tukapāna dibuku dyonso dya mapaje 192, dyālupwilwe kumeso kwa 1984 ditanwa mu kibīko kya kipwilo. Nansha shi bino bingidilwa bya kumushipiditu ke bikulu, ino bishinte bya Bible bisambilwe’mo bikidi na kamweno ne dyalelo, bikakwasha bantu bayuke bubinebine. Tutompei kukwatañanya madingi alonda’ko ano na dibuku dyo-dyonso dyotukapāna.
3 Tukokeja kukasamuna kusepelela kwa muntu etabije Kinenwa kya Leza na kwisambila pa kufunda masomo. Tukokeja kushilula mīsambo na kunena’mba:
◼ “Dyalelo bantu batendelanga bininge kufunda masomo malumbuluke. Molangila, i bufundiji’ka bufwaninwe kukimba bukokeja kwitupa būmi bwansangaji ne ntundubuko? [Muleke akulondolole.] Boba batambula buyuki bwa Leza bakokeja kumwena’mo byabuyabuya byaendaenda. [Tanga Nkindi 9:10, 11.] Dino dibuku [lombola mutwe wa mwanda wa dibuku dyopāna] dimanine pa Bible. Dikokelanga milangwe pa nsulo imo kete ya buyuki butwala ku būmi bwanyeke.” Lombola kimfwa kifwaninwe kitanwa mu dino dibuku. Shi muntu’wa walombola kusepelela kwabinebine, mushile dibuku ku lupoto lodipotwa pano-pano, kadi mupe kilaeno kya kwiya kumutala dipya.
4 Potujoka kukatala muntu otwesambile nandi pangala pa mvubu ya bufundiji bwa Bible, tukokeja kunena’mba:
◼ “Musunsa wamfulo onaile, twamwene’mba Bible yo nsulo ya bufundiji bukokeja kwitupa kikulupiji kya kukekala na būmi bwanyeke bukāya’ko. I amo, tufwaninwe kulonga bukomo bwa kwifunda mu Bisonekwa byobya byotusakilwa kuyuka. [Tanga Nkindi 2:1-5.] Bantu bavule bamonanga’mba kudi bisonekwa bimo-bimo bya mu Bible bikomo kwivwanija. Nsenswe kukulombola mu kīpi muswelo otwingidijanga divule dino dibuku mwanda wa kukwasha bantu bayuke bivule bitala pa bufundiji bwa pa kitako bwa mu Bible.” Pūtula dibuku dyowamushidile pa paje padi myanda yosaka kwisambila’po ne lombola bityetye mulongelwanga kifundwa kya Bible. Shi mwisambi-nobe usaka kwifunda kitatyi ne kitatyi, mulaye amba nkajoka kukutala ne nkaya na dibuku dyetu dyotwifundanga, Buyuki Butwala ku Būmi Bwanyeke.
5 Bantu bavule batompolanga pamwanda wa midiyo ya bana basusuka ntanda yonso. Padi tukokeja kukwasha mwisambi-netu evwanije muswelo umwene Leza masusu abo, na bino binenwa:
◼ “Padi kodi muteleke myanda isekununwanga itala pa bana bafwa nzala pano pantanda, babēla ne bashibwe kasuku. Mwanda waka malongolodi atala ino myanda keabwenyepo kupwija’yo? [Muleke akulondolole.] Leza usakilanga bantu biyampe. Ivwana byalaile mu Bible pa mwanda utala bana ne batame bene. [Tanga Kusokwelwa 21:4.] Dino dibuku [lombola mutwe wa mwanda wadyo] ditupa nshintulwilo imo ne imo itala pa ntanda yakubulwa’mo masusu ikatulwa’ko na Leza.” Mulombole kifwatulo kya Paladisa ne kwisambila’po, shi kitanwa’mo. Pāna dibuku ne kwata mpangiko ya kwiya kukamutala.
6 Shi twesambile musunsa umbajinji pa mwanda utala masusu a bana, tukokeja kwendeleja mīsambo uno muswelo mu kujokelamo kupya:
◼ “Musunsa wamfulo onaile, watompwedile bininge bana badi mu bisaka bisansane, bamona malwa na nzala, na misongo nansha na bupolapola. Kituseñanga pa mityima pa kuyuka mwisambila Bible pa mwanda utala mukekadila bana ne batame bene mu ntanda mwakubulwa luba, misongo ne lufu lwine. Būmi bulumbuluke bukekala pano pantanda i bulombolwe mu bupolofeto budi mu mukanda wa Isaya.” Tanga Isaya 65:20-25 ne kunena’po. Mulombole muswelo wa kwifunda Bible mu dibuku Buyuki.
7 Bantu betabije byobebidile kulombela, tukokeja kushilula mīsambo pa uno mwanda namino:
◼ “Bantu bavule umbukata mwetu batanwanga na makambakano umbula bwa būmi bwabo, akokeja kwibafikija ku kulomba Leza ebakwashe. Ino bavule balañanga’mba milombelo yabo keitabijibwangapo. Muswelo umo ne milombelo ilombelanga bendeji ba bipwilo mu bitango bya bantu pamwanda wa ndoe, keilondololwangapo. Nanena namino mwanda mavita ne bupolapola bikyendelela nyeke kususula muzo wa muntu. Lelo Leza wivwananga binebine milombelo? Shi eyo, mwanda waka milombelo mivule keilondololwangapo? [Muleke akulondolole.] Mitōto 145:18 ushintulula kintu kifwaninwe kulongwa mwanda wa milombelo yetu ikale kwivwanwa. [Tanga uno vese.] Dibajinji, milombelo ilombelwa kudi Leza ifwaninwe kulombelwa na mutyima umo, kadi mikwatañane na bubinebine butanwa mu Kinenwa kyandi, Bible.” Lombola dibuku dyoingidija ne kokela milangwe pa kyokya kyodinena pangala pa mvubu ya milombelo.
8 Pa kusaka kwendeleja mīsambo yadi imanine pa milombelo, tukokeja kutompa kunena namino:
◼ “Natendele mīsambo yetu itala pa milombelo. Nobe usa kumona’mba bine Yesu wāletele’po bukwashi bufikile, na mulangwe wandi wānenene pa mwanda utala kyokya kyotufwaninwe kulomba.” Tanga Mateo 6:9, 10, kadi nenena pa myanda mikatampe yaimanine’po Yesu mu milombelo ya Tata Wetu. Pūtula dibuku Buyuki pa shapita 16, unena’mba “Muswelo Okokeja Kwīfwenya Kudi Leza,” mwipangule shi ukokeja kumulombola mwa kwifundila’dyo.
9 Potusapula buyuki bwa Leza ku bakwetu, padi twiipangula’mba: “Lelo ukōkeja bino bintu bino i ani?” Bisonekwa bilondolola’mba: ‘I batwe.’—2 Kod. 2:16, 17.