Vuluka Boba Badi ku Mobo a Kilelelo
1. Mwanda waka i biyampe kufikila boba badi mu mobo a kilelelo na myanda miyampe?
1 Bantu bavule balwanga na buzoze bwa bununu. (Mus. 12:1-7) Banunu bamo bashikatanga ku mobo a kilelelo, o mwanda divule dine bikalanga bikomo kwibatana mu busapudi bwa ku njibo ne njibo. Nansha banunu ne boba bashikete ku mobo a kilelelo byokebakidipo na bukomo buvule nansha lute, nabo bakokeja kwifunda myanda ya Yehova, kwiisangela ne kumuswa. Le i muswelo’ka otubwanya kwibafikila na myanda miyampe ya “lukulupilo lwa katōkwe?”—Tet. 2:13.
2. Lelo tukasokola namani mobo a kilelelo a kukapempula?
2 Mwa Kushilwila: Divule dine mobo a kilelelo akokeja kusokolwa na kukimba mu mabuku alembelwe manimelo a telefone. Kimfwa, kimba “mobo a kilelelo” kya banunu, “mobo kushikete bantu basakilwa bukwashi” ne “mobo kushikete boba bene bakwashañana.” Mutadi wa mingilo ye aye ukemanina uno mwanda na kutonga basapudi ba bwino bakwenda ku ano mobo. Shi tutandike mpangiko biyampe ne kukulupila mudi Yehova, nankyo tukabwanya kushilula kifundwa kya Bible kya bantu bavule. —Nki. 21:5; 1 Yo. 5:14, 15.
3, 4. (a) Shi tusaka kushilula kifundwa kya Bible kya bantu bavule, i ani otufwaninwe bidi kwisamba nandi? (b) Le tukakwata mpangiko ya kifundwa namani?
3 Muswelo wa kushilula kifundwa ukakwatañana mungya njibo ne njibo. Ku mobo makatampe kudi bantu bavule ne bengidi bavule, i kyendele’mo kufika dibajinji kudi yewa utundaila beni ne kwipangula shi bikokejika wisambe na mwimaniji wa mingilo. Ku mobo matyetye kudi banunu—mobo kudi bantu batyetye kadi kudi bengidi babidi nansha basatu—i biyampe dibajinji kukesambididila’nka na mwine njibo.
4 Mu ino miswelo yonso, wibalombole amba upānanga kyobe kitatyi ku bitupu mwanda wa kukankamika bantu bansagela kutanga ne kwisambila pa nsekununi ya mu Bible. Ipangula shi kudi muntu ukasaka kutanwa ku ino mīsambo ya kifundwa kya Bible kya bantu bavule mu bula bwa maminite 30 yenga ne yenga. Ubwanya kwingidija mabuku meshileshile, inoko bavule i bamone’mba mabuku pamo bwa Dibuku Dyami dya Mānga ya mu Bible ne Muntu Mukatakata wa Kasha ne Kashele asangelwanga mpanta na bantu. Ubwanya ne kulombola mwimaniji mabuku odi nao. Mwisambei nandi pa kutandika difuku, kitatyi ne kifuko kwa kwifundila ne kulamika’yo ku mpangiko ya mingilo ya mu njibo ya kilelelo. Kokevwana bumvu bwa kwitela bu wi Kamoni wa Yehova. ‘Nka ponka’pa, kwasha mwimaniji evwaninje’mba kitungo kyobe i kwibafundija bufundiji bwa mu Bible, ke kushimikapo kipwilo.
5. I bulombodi’ka bwa kamweno bukalengeja kifundwa kikale kisangaja ne kipa bipá?
5 Mwa Kwendejeja Kifundwa: Muswelo wa kwendeja kifundwa ukalondakana na ngikadilo, kifuko, ne mushikatyilo udi’mo bantu, o mwanda bifwaninwe kulangila bantu ne kwikala na kusansanya. Mwendeji ufwaninwe kusela mabuku mavule a kwifunda ne kujoka nao ku mfulo kwa kifundwa. I biyampe kwenda na mabuku a masomo makata mwanda wa kukwasha bakwabo. I biyampe kutanga misango, kwipangula bipangujo, kadi malondololo nao akaletwa enka mulondolwelwanga nyeke. Ukokeja kunena boba basaka ne babwanya kutanga, batange misango ne Bisonekwa. Kitatyi kyomwifunda, ikala na kyanga, na mumweno muyampe, kadi bya bulunda. Shi mwimaniji witabije, nankyo ubwanya kwibatadija mavideo a bulongolodi akakankamika lwitabijo lwabo mu Bible nansha kulombola ñeni iboilwa ku nsekununi ya mu Bible. I biyampe kushilula ne kufudija kifundwa na milombelo mīpi. Basapudi bamo bembanga nabo ne ñimbo ya Bulopwe.
6. Le tukalondolola namani ku kijika?
6 Le bikekala namani shi mwine njibo waleta kijika ku mwanda kampanda watangwa nansha wanenwa kitatyi kifundwa? Ikala na kusansanya kitatyi kyolondolola. (Kol. 4:6) Padi ubwanya kumutangila Kisonekwa kīpi, kibwanya kutōkeja wandi mwanda. Shi kebikokejikapo, nabya i biyampe kulama kyandi kipangujo ne kumulombola’mba musa kwisambila’po penu pa bubidi pa kupwa kwifunda.
7. Lelo tukalonga namani shi muntu walombola kusangela nansha kwipangula kipangujo kimutala aye mwine?
7 Kyaba kimo, muntu umo ubwanya kwipangula kipangujo nansha kulombola mutyima wa kusaka kuyukila’ko bivule. Kaka umo walondolwele namino: “Bine, kino i kipangujo kiyampe. Ino byokidi i kipangujo kikutala, twilaije shi tubapu kwifunda; penepa abe ne ami ketwisambila’po pa bubidi bwetu.” Bikalanga nyeke biyampe kukwata mpangiko ya kwifunda Bible na boba basangela musapu pa bunka bwabo mu kitatyi kikwabo kadi mu kifuko kikwabo.
8. Le bifundwa bya bantu bavule ne bifundwa bya Bible bya kasuku bikalupuka’ko bikabalwa namani?
8 Divule dine i biyampe Batumoni bamo bonka bendeje kifundwa kya bantu bavule ku njibo kitatyi kyonso. Basapudi bonso bakasapula’ko, bakabala nsá. Shi kifundwa kibashimata, musapudi mwine wimanine’kyo ukabala kujokela’mo kumo, kitatyi kyonso kyakendeja kifundwa kya bantu bavule ne kubala kifundwa kimo kya Bible kweji ne kweji. Bifundwa bya Bible bishilulwa na bantu babwanya kwivwana ne kwifunda bikabalwa enka motulongelanga nyeke.
9, 10. Le i ngikadilo’ka ifwaninwe kwikala na boba bengila uno mwingilo? Shintulula.
9 Endeja’kyo Nyeke: I biyampe kutandika difuku ne kitatyi kya kwendeja kifundwa kya bantu bavule. Bantu bowifunda nabo pamo ne mwimaniji bakasaka kifundwa kilongeke nyeke, kadi kishilule ne kufula pa kitatyi. (Mat. 5:37) O mwanda, bilomba kwiivwanika, kwikala na kininga ne ndudi. Myanda mimweke ilombola’mba i kyendele’mo basapudi babidi ba bwino bendeje kifundwa kya bantu bavule pamo. (Mus. 4:9, 10) Ku mobo makatampe, kubwanya ne kwenda basapudi bavule.
10 Kwikala bya bulunda ne kuta bantu mutyima nako kudi na mvubu. (Fid. 2:4) Musunsa mubajinji okebapempula, wilamije’ko kitayi kya kwisamba na muntu ne muntu utenwe ku kifundwa. Soneka abo majina ne kulonga bukomo bwa kwiakwatyila ku mutwe kumeso kwa mwitane musunsa mukwabo. Kwikala na Kitūkijetyima ne lusa kukakokela muntu yense kotudi ne kwimona bu mutebwe mutyima.
11. Le boba bendeja kifundwa bakalombola namani bulēme kudi mwimaniji ne ku ba mu kisaka ba boba bobefunda nabo?
11 Kadi i biyampe kulombola bulēme ne kanye kudi mwimaniji ne ba mu kisaka ba boba botwifunda nabo. Shi mubapu kutandika mpangiko, kikekala kya tunangu kwisambila pamo na mwimaniji kumeso kwa kushinta kitatyi. Kitatyi ne kitatyi, ipangula mwimaniji akulombole mwamwena pa muswelo wendelela kifundwa. Shi ba mu kisaka kya bomwifunda nabo abaiya kitatyi kyomwifunda, longa bukomo bwa kwisamba nabo. Wibakulupije’mba utēle mutyima bininge banababo. Wibanene bashikate ne kuteja bifundwa.
12, 13. Sekununa myanda mimweke ilombola byabuyabuya bitamba ku kusapula ku mobo a kilelelo.
12 Bipa Bilupuka’ko: Batadi bendakana ne bipwilo balombolanga bipa bikankamika bilupuka ku uno muswelo wa kusapula. Difuku dimo bantu 20 batenwe ku mīsambo mibajinji. Kino kyafikije ku kushilula bifundwa bya Bible bya kasuku bisamba. Mwana-mukaji umo wafikile ne ku kubatyijibwa. Kifundwa kikwabo kya ku njibo ingi kyatonwene mwana-mukaji umo mununu wa myaka 85 ashilule kupwila ne kusaka kubatyijibwa. Kitatyi kyadi kisaka kulongololwa mingilo ya njibo imo ya kilelelo—byalombele kifundwa kya bantu bavule kyadi kyendejibwa na Batumoni ba Yehova kimikwe—ino bantu badi befundwa nabo badi kebatompwela mwimaniji wa yabo njibo! Mfulo mfulō kifundwa kyashilula monka kadi na bantu 25 kutūla ku 30.
13 Buswe botulombola ku boba badi ku mobo a kilelelo butulumujanga bininge boba bashikete’ko ne bantu bakwabo. Kimfwa, i kyendele’mo kumona mwimaniji wiya kutanwa ku kifundwa ne kwisamba’ko. Bukomo botulonga bwa kuta mutyima boba badi mu mobo a kilelelo nabo buletanga bukamoni buyampe ku bantu. (1 Pe. 2:12) Pa kupwa kulombola mwimaniji umo kitungo kya kifundwa kyetu, wanene amba: “Mwadi kwepi konso’kwa? Le musa kushilula kitatyi’ka?” Mwimaniji mukwabo wasonekele amba: “Nsa kulombola mobo onso a kilelelo a mu kyetu kibundi, befunde kino kifundwa kya bantu bavule. Batumoni ba Yehova i batūle’ko uno mwingilo wa ku bitupu bu kipindi kya mu wabo mwingilo mu kibundi.” Njibo ya kilelelo ya mu Hawai yapele Batumoni ba Yehova Mukanda wa Kufwija’ko, wadi utela bano bengidi ba kwituma bu “kyabulēme kyakubulwa kikwabo kidingakene nakyo” ku boba badi mu ino njibo ya kilelelo.
14. Mwanda waka tufwaninwe kufikila boba badi ku mobo a kilelelo ne kwibakwasha?
14 Yehova witanga banunu bamutendele. (Ñim. 148:12, 13) Mu luno lwito mubadilwa ne boba badi ku mobo a kilelelo. Lelo mu wenu mwaba mudi banunu badi ku mobo a kilelelo basakilwa kwivwana myanda miyampe? Kupityila ku bukwashi bwa bakulumpe pa kipwilo ne bwa bemaniji ba ku mobo a kilelelo, tukabwanya kupāna bukamoni ku boba badi ku mobo a kilelelo. Shi tuvuluka banunu, twiulanga Yehova.—Ñim. 71:9, 18.