Myanda ya Kunyemena’ko ya Kabuku ka ku Kupwila Būmi ne Mwingilo
6-12 KWEJI 7
BYABULĒME BYA MU KINENWA KYA LEZA | DIVILU 6-7
“Pano Usa Kumona Byonsa Kulonga Felo’’
it-2-F p. 309 mus. 5
Mosesa
Bana-balume ba Isalela nabo bāshintyile. Dibajinji bāitabije amba Mosesa i mutumwe na Leza, ino Felo pa kuleta musoñanya wa kwibabwejeja’ko mingilo mikomo, bāshilula kutompwela Mosesa, penepa Mosesa wātyumukwa mutyima, kaabija Yehova. (Div 4:29-31; 5:19-23) Mu kine kitatyi’kya, Mwine wa Peulu Mwine wākankamikile Mosesa na kumulombola’mba usa kufikidija mulao wandi waālaile ba Abalahama, Izake, ne Yakoba, ko kunena’mba kulombola patōkelela buluji bwa dijina Yehova na kunyongolola Isalela ne kumwikadija bu muzo mukatampe mu ntanda ya mulao. (Ngo 6:1-8) Nansha ke papo pene, bana-balume ba Isalela bāpelele kuteja Mosesa. Ino kipupo kya kitema pa kupwa, bāmukulupila, kebengidila nandi pamo, ebiya kipupo kya dikumi pa kupwa, Mosesa wēbateakanya ne kwibapanga “mu mulongo wa bulwi.”—Div 13:18.
it-2-F p. 309 mus. 3-4
Mosesa
Ku meso a Felo mwine Edipito. Pano ba Mosesa ne Alone bādi ‘balwa na baleza.’ Felo wāityile baleza bonso ba Edipito bamupe bukomo, mwanda wa babitobo ba maleñanya, bene bādi padi batangidilwe na ba Yanese ne Yambelese (2Tm 3:8), betāke na bukomo bwa Yehova. Kingelengele kibajinji kyālongele Alone ku meso a Felo na lupusa lwa Mosesa, kyālombwele amba Yehova i mukomo kupita baleza ba Edipito, ino nansha nankyo, Felo wāendelele na kūmija mutyima. (Div 7:8-13) Kupwa, kipupo kya busatu pa kupona, enka ne babitobo ba maleñanya bānenene amba, “I munwe wa Leza!” Kadi byobāponēnwe bininge na kipupo kya bipote, abo bonso bākomenwe kwenda kwa Felo mwanda wa kulwa na Mosesa mu bula bwa kino kipupo.—Div 8:16-19; 9:10-12.
Bipupo bisenga kadi byūmija mityima. Ba Mosesa ne Alone bālaile Bipupo byonso Dikumi. Bino bipupo byāfikidile enka mobyādi bilailwa, ne kino kyālombwele amba Mosesa i mukendi wa Yehova. Dijina dya Yehova dyāsapwilwe ne kwisambilwa’po mu Edipito monso, kino kyāsengele mityima ya bamo ne kūmija mityima ya bakwabo—bene Isalela ne bene Edipito bamobamo bāsengwa; ino Felo ne badingidi bandi bāūmija mityima. (Div 9:16; 11:10; 12:29-39) Bene Edipito kebālangilepo amba i balubile baleza babo, ino bājingulwile amba Yehova ye utyibila baleza babo mambo. Kipupo kya kitema pa kupwa, Mosesa “waikala na bulēme bukatampe mu ntanda ya Edipito umbukata mwa bengidi ba Felo ne mu bantu.”—Div 11:3.
Kukola Byabupeta bya ku Mushipiditu
it-2-F p. 1091 mus. 4-5
Mwinē Bukomo Bonso
Yehova wētelele pa kitenta kya bu “Leza Mwinē Bukomo Bonso” (El Shaddai) paādi ulaa Abalahama mulao utala kubutulwa kwa Izake, mulao wādi ulomba Abalahama akulupile amba Leza udi na bukomo bwa kwiufikidija. Mwenda mafuku, kadi Leza wāingidije kino kitenta paālaile amba ukesela ba Izake ne Yakoba ke bampyana ba kipwano kya Abalahama.—Ngo 17:1; 28:3; 35:11; 48:3.
Kukwatañana na myanda idi kūlu’i, Yehova wāsapwidile Mosesa mwenda mafuku amba: “Nadi mwekelanga Abalahama, Izake, ne Yakoba bu Leza Mwinē Bukomo Bonso [El Shaddai], ino pa mwanda wa dijina dyami Yehova nkyeyukenyepo kobadi.” (Div 6:3) Kino kekishintululapo amba bano bakulutuba kebādipo bayukile dijina Yehova, mwanda bādi beditela kyaba kyonso, enka ne boba bebābadikidile bene. (Ngo 4:1, 26; 14:22; 27:27; 28:16) Kadi mu mukanda wa Ngalwilo, mwine wisambila pa būmi bwa bano bakulutuba, kishima “Mwinē Bukomo Bonso” i kitelwe’mo misunsa isamba kete, inoko dijina Yehova ditanwa’mo misunsa 172 mu bilembwa bibajinjibajinji bya Kihebelu. Ino nansha bano bakulutuba byobēmwenine bintu bilombola’mba Leza udi na lupusa kadi i mufwaninwe kitenta kya bu “Mwinē Bukomo Bonso,” bādi kebamwene bintu bilombola buluji bwinebwine bwa dijina Yehova. Pa kino, dibuku dimo (The Illustrated Bible Dictionary, Vol. 1, p. 572) dinena’mba: “Kwisokola kwēsokwele Leza pa kala ku bakulutuba, kwādi kwimanine pa milao ya kufikidila kumeso; ne kino kyādi kibalomba kukulupila’mba, Yahweh i Leza (el) udi na bukomo (nshintulwilo imo bidi ya sadday) bwa kwiifikidija. Kusokwelwa kwa mu kimuna i kukatampe bininge kadi kuyampe, kulombola’mba bukomo bwa Leza ne muswelo wawāikele nyeke na bantu bandi bikwatañene na dijina diyukene dya bu Yahweh.”—Na J. D. Douglas, mu 1980.
it-2-F p. 308 mus. 6
Mosesa
Mosesa kāyetwepo mingilo pa mwanda wa kwityepelwa. Mosesa wētyepelwe, wānena’mba kabwanyapo kwisamba biyampe. Pano Mosesa wādi ke mushinte, kwishila na mwaādi wikadile pa kala, mwanda myaka 40 kunyuma wāsakile aye mwine kukūla Isalela. Wāendelele na kupela byādi bimunena Yehova, wāfula’nka ne ku kunena Yehova aleke kumupa uno mwingilo. Nansha kino byokyālobeje Leza, kāmuyete’opo, ino wātumine Alone mwanda wa kwisamba pa kyaba kya Mosesa. Penepa Mosesa byaādi mukendi wa Leza, wāikele bwa “Leza” kudi Alone, mwine wādi wisamba pa kyandi kyaba. Pobēbungile na bakulumpe bene Isalela ne pobāendele kwa Felo, kyāmwekele amba Leza wādi upa Mosesa bulombodi, ebiya Mosesa nandi wāsapwila’bo Alone, mwanda wa Alone nandi esambe na Felo (uno i Felo wāpingakene yewa wādi ubikele kitatyi kyānyemene Mosesa myaka 40 kunyuma). (Div 2:23; 4:10-17) Mwenda mafuku, Yehova wātela Alone bu “mupolofeto” wa Mosesa, ko kunena’mba Mosesa byaādi mupolofeto wa Leza, Leza wādi umusoñanya bya kulonga, ebiya Mosesa nandi wāsoñanya Alone ebilonge. Kadi Yehova wānenene amba ukekadija Mosesa “bwa Leza kudi Felo,” ko kunena’mba ukamupa bukomo ne lupusa padi Felo, mwanda wa Mosesa aleke kutyina uno mulopwe wa Edipito.—Div 7:1, 2.
13-19 KWEJI 7
BYABULĒME BYA MU KINENWA KYA LEZA | DIVILU 8-9
“Felo wa Mitatulo Wafikidija Mpango ya Leza Pampikwa Kuyuka”
it-2-F p. 431
Mutwe Mūmu
Yehova wālekele na kitūkijetyima mizo ne bantu bamo bendelele na kwikala’ko bōmi nansha byobādi bafwaninwe kwipaibwa. (Ngo 15:16; 2Pe 3:9) Inoko bamo bāshintyile, bālonga bukomo bwa kwisāsa mwanda wa kufwilwa lusa (Yos 2:8-14; 6:22, 23; 9:3-15), ino bakwabo bāūmija mityima bininge, kebalu na Yehova ne na bantu bandi. (Kup 2:30-33; Yos 11:19, 20) Yehova kakankajangapo bantu baleke kūmija mitwe, o mwanda Bible ulombola’mba ‘wibalekanga bōmije mityima’ nansha’mba ‘wibōmijanga mitwe.’ Ku mfulo kitatyi kyāonakanya bantu ba mitwe myūmu, kino kilombolanga’mba udi na bukomo bukatampe kadi dijina dyandi disapulwanga konsokonso.—Dingakanya na Div 4:21; Yoa 12:40; Lo 9:14-18.
it-2-F p. 240 mus. 4; p. 241 mus. 1-2
Bubi
Kadi kyaba kimo Yehova ulekanga bantu babi bafikidije mpango yandi abo kuyuka mpika. Byobalwanga na Leza, nanshi ubwanya kwibonakanya mwanda wa bengidi bandi balame bululame bwabo, ne kadi ubwanya kulengeja bilongwa bya bano bantu babi bilombole amba boloke bwandi i bwa kamweno. (Lo 3:3-5, 23-26; 8:35-39; Ñi 76:10) Uno mulangwe utanwa mu Nkindi 16:4 unena’mba: “Yehova walonga bintu byonso mwanda wa mpango yandi, enka ne mubi mwine amba onakanibwe mu difuku dya kyamalwa.”
Kimfwa kimo bidi i kya Felo, Yehova wāmusapwidile kupityila kudi ba Mosesa ne Alone alekelele bene Isalela. Leza kālengejepo uno muludiki mwine Edipito ekale mubi, ino wāmulekele endelele kwikala’ko mūmi, kadi wālonga bintu byālengeje Felo emwekeje aye mwine bu muntu mubi mufwaninwe kwipaibwa. Kine kyālongēle Yehova uno muswelo i kilombolwe mu Divilu 9:16 unena’mba: “I pa mwanda wa kino’ki kyonkulekele’ko: kukulombola bukomo bwami ne mwanda wa dijina dyami disapulwe pa ntanda ponso.”
Edipito wāponēnwe na Bipupo byonso Dikumi, ku mfulo Felo ne basola bandi bāonakanibwa mu Dijiba Dityila, kitatyi kyāingidije Yehova bukomo bwandi butulumukwa. (Div 7:14–12:30; Ñi 78:43-51; 136:15) Myaka mivule pa kupita’po, mizo ya kubwipi yādi ikīsambila pa uno mwanda, kadi dijina dya Leza dyāsapulwa ntanda yonso. (Yos 2:10, 11; 1Sa 4:8) Shi Yehova wāipaile Felo ponka na ponka, longa kāingidijepo bukomo bwandi mu uno muswelo ne kwitumbija pa kukūla bantu bandi.
Kukola Byabupeta bya ku Mushipiditu
it-2-F p. 1039
Mpekepeke
Tubīshi tudi na dijina dya mu Kihebelu kibajinjibajinji tutelelwe mu Bisonekwa, twa mu kipupo kya buná kyāponene pa Edipito ketuyukenepo biyampe. Kino kyo kipupo kibajinji kekyātengelepo bene Isalela mu Ngoshena. (Div 8:21, 22, 24, 29, 31; Ñi 78:45; 105:31) Kishima Arov i kyalamunwe mu miswelo mishileshile, bu “nji isumana bisansa” (Dibuku Dijila), “bantale” (Bisonekwa Bitokele).
Kishima kya Kiluba “mpekepeke” kifunkila pa nji ne bibu. Mpekepeke mikaji itubulanga kikoba kya muntu nansha kya nyema na lunonga mwanda wa kumutoma mashi. Miswelo imo ya mpekepeke ishilanga bantu ne banyema mikolobe ileta misongo mikomo. Nanshi kipupo kya mpekepeke kyāsuswile bininge bene Edipito ne bimunanwa byabo, enka ne bamo bāfwa.
Myanda Mikatampe ya mu Mukanda wa Divilu
8:26, 27—Mwanda waka Mosesa wānene amba bitapwa bya bene Isalela bikekala ‘kya munyanji ku bene Edipito’? Banyema bavule palapala bādi batōtwa mu Edipito. Nanshi kutela bino bitapwa kwādi kubweja bukomo ne lupaka lwa kunekenya ku binenwa byānene Mosesa amba Isalela ufwaninwe’nka kulekwa ende akele bitapwa kudi Yehova.
20-26 KWEJI 7
BYABULĒME BYA MU KINENWA KYA LEZA | DIVILU 10-11
“Ba Mosesa ne Alone Abalombola Bukankamane Bukatampe”
Iula Yesu—Sapula na Bukankamane
Langa kadi ne bukankamane bwālombwele Mosesa pa kwisamba na Felo, mulopwe wādi umwenwe, ke’nkapo bu wa kwimanina kudi baleza, ino i pamo bwa leza, mwana wa Ra, leza dyuba. Bibwanika padi wādi nandi utōta nkishi wandi, enka mwādi mulongela ba Felo bakwabo. Kyonso kyādi kinena Felo kyo kyādi kilondwa; kyo kyādi kitungo. Felo byaādi nkomokomo, wa mutwe ne mutyima mūmu, kādipo na kibidiji kya kwipangula bakwabo bamulombole kya kulonga. I ku meso kwa uno muntu kwākemene Mosesa, mukumbi’tu wa bitupu, misunsa mivule—kwitwa mpika ne kutundailwa biyampe mpika. I bika bine byādi bikanena Mosesa kwadi? Bipupo bileta musala. Ne wākalomba bika? Lupusa lwa kutambija midiyo na midiyo ya bapika ba Felo bende! Lelo Mosesa wādi usakilwa bukankamane? Bine kadi!—Umb. 12:3; Bah. 11:27.
it-2-F p. 309 mus. 6
Mosesa
Byādi bilomba bukankamane ne lwitabijo pa kukemana ku meso a Felo. Yehova ye wākomeje ba Mosesa ne Alone ne kwibapa mushipiditu wandi mwanda wa babwanye kwingila mwingilo wāebapele. Mona’po bidi mu ñeni mwādi mwikadile mu kipango kya Felo, mulopwe mukomokomo ntanda yonso mu kine kitatyi’kya. Byaādi mutumbe bininge, Felo wa mitatulo wādi wimona bu leza, mujokolokwe na badingidi bandi, bakata ba basola, balami, ne bapika. Kadi kwādi bakulu ba mutōtelo ne babitobo ba maleñanya, balwana bakatampe bādi balwa na Mosesa. Bano bantu bādi na bukomo, kupwa Felo ke abo. Bano bantu bonso’ba bādi ku mutamba wa Felo mwanda wa kubingija baleza ba Edipito. Ne kadi ba Mosesa ne Alone bāendele kwa Felo misunsa mivule, ino Felo kashā ūmija mutyima, mwanda kādipo usaka kulekelela bapika Bahebelu baādi umunine. Ba Mosesa ne Alone pa kupwa kulaa kipupo kya mwānda, bēbapanga ku meso a Felo, kadi pa kupwa kwa kipupo kya kitema, bēbakoma baleke kumona monka mpala ya Felo, kutyina bakebepaya.—Div 10:11, 28.
Kukola Byabupeta bya ku Mushipiditu
Bulwi bwa ba tumoni na baleza babubela
Pākidi bene Isalela mu Edipito, Yehova wātumine Mosesa kudi Felo amba: “Twela mudi Felo, mwanda ami namulemeja mutyima wandi ne mutyima wa bengidi bandi bene, na’mba nkalombole bine bino’bi, biyukeno byami umbukata mwabo. Kadi na’mba ukasapula mu matwi a obe mwana ne munkana obe bino bintu bino’bi byo nalonga pa Edipito, ne biyukeno byami byo nalonga umbukata mwabo, muyuke byo ndi Yehova.” (Divilu 10:1, 2) Bene Isalela ba kikōkeji bādi bafwaninwe kusapwila babo bana bilongwa bya Yehova bya bukomo. Babo bana nabo, bādi bafwaninwe kwibisekununa kudi babo bana, enka namino, ku nkongo ne nkongo. Mu uno muswelo, bilongwa bya bukomo byālongele Yehova bikavulukwa. Dyalelo nadyo, bambutwile badi na kiselwa kya kupāna bukamoni ku babo bana.—Kupituluka 6:4-7; Nkindi 22:6.
it-1-F p. 849 mus. 6
Divilu
Kupityila ku kino kilongwa kya bukomo, Yehova wātumbije dyandi dijina ne kukūla Isalela. Bene Isalela pa kwabuka Dijiba Dityila, Mosesa wātangidila bana-balume bene Isalela, bāshilula kwimba lwimbo, penepa kaka wandi Midiamu, mupolofeto mukaji, nandi wāyata ñoma mu kuboko kwandi, kadi bana-bakaji bonso nabo bamulonda na mañoma koku baja, batundaija bana-balume bādi bemba. (Div 15:1, 20, 21) Bene Isalela bēsansanya lonso na balwana nabo. Pobātambile mu Edipito, kebādipo bafwaninwe kulongwa kibi na muntu nansha na nyema; kadi nansha ke mbwa mwine kādipo wa kwibabulukila nansha kusongola ludimi lwandi. (Div 11:7) Mānga idi mu Divilu keinenenepo amba Felo ne basola bandi bātwelele abo bene mu dijiba ne konakanibwa, inoko Ñimbo ya Mitōto 136:15 inena’mba Yehova “wāela Felo ne kibumbo kyandi kya divita mu Dijiba Dityila.”
27 KWEJI 7–2 KWEJI 8
BYABULĒME BYA MU KINENWA KYA LEZA | DIVILU 12
“Pashika—Le Idi na Mvubu’ka ku Bene Kidishitu”?
“Ukasangala Byamwiko’tu”
Yesu wāfwile mu mafuku 14 Nisane, 33 K.K. Mu Isalela, mafuku 14 Nisane dyādi difuku dya nsangaji dya masobo a Pashika. Mu dino difuku, bisaka byādi bidya pamo kana ka mukōko kampikwa bulema mwaka ne mwaka. Ne kino kyādi kibavuluja mwingilo wāingile mashi a kana ka mukōko mu kunyongolola bana babubedi ba Bene Isalela ku lufu lwāipailwe bana babubedi ba Bene Edipito na mwikeulu mu difuku dya 14 Nisane 1513 K.K.K. (Divilu 12:1-14) Nanshi kana ka mukōko ka Pashika kelekeja Yesu, utelelwe na mutumibwa Polo amba: “Pashika wetu watapilwe kala, ke Kidishitu kadi.” (1 Kodinda 5:7) Mashi a Yesu, pamo bwa a kana ka mukōko, amwangikile mwanda wa kukūla bavule.—Yoano 3:16, 36.
it-2-F p. 485 mus. 7
Pashika
Bintu bimo byādi bilongwa ku masobo a Pashika byāfikidile padi Yesu. Kintu kimo bidi i mashi āshingilwe ku mobo mu Edipito mwanda wa kukūla bana babedi ku kuboko kwa mwikeulu wa bonakani. Polo wātelele bene Kidishitu bashingwe māni bu kipwilo kya bana babedi (Bah 12:23), Yesu nandi bu munyongolodi wabo kupityila pa mashi andi. (1Ts 1:10; Ef 1:7) Kana ka mukōko ka pa Pashika kekādipo katyumunwa mukupa nansha umo. Kyālailwe amba i kutupu mukupa nansha umo wa Yesu ukatyumunwa, ne kino kyāfikidile paāfwile. (Ñi 34:20; Yoa 19:36) Nanshi Pashika yādi ivuluka Bayuda mu bula bwa myaka tutwa na tutwa, wādi munjiñininya wa mu Bijila wa bintu bya kwiya kumeso byādi bya kufikidila padi Yesu Kidishitu, “Kana ka Mukōko ka Leza.”—Bah 10:1; Yoa 1:29.
‘Kino Kikemwikadila Kivulukilo Kyenu’
Bashabana bene Isalela bādi bafundija babo bana ba nkongo ne nkongo kamweno kādi na Pashika. Kamo bidi i ka amba, Yehova wādi ubwanya kukinga batōtyi bandi. Bana bāyukile’mba Yehova ke kilezalezapo kya bitupu ne kyampikwa kumweka. Yehova udi’ko binebine, Leza mūmi utele bantu bandi mutyima, kadi ulonga bintu mwanda wa kamweno kabo. Wēmwekeje uno muswelo paākingile bana ba bubedi ba bene Isalela kitatyi ‘kyaāipaile bene Edipito.’ Wāpandije bana ba bubedi.
14 Bambutwile bene Kidishitu kebasekunwinangapo mwaka ne mwaka babo bana bana-balume ne bana-bakaji kamweno ka Pashika. Ino, le ufundijanga bobe bana buno bufundiji bumo bonka—bwa amba Leza ukiñanga bantu bandi? Lelo wibalombolanga kikulupiji kyobe kikatampe kya amba, Yehova ukidi Mulami wa binebine wa bantu bandi? (Mit. 27:11; Is. 12:2) Ne kadi, uloñanga namino mu mīsambo isangaja yowisamba na bana pa kyaba kya kwibinena pamo bwa dishikulu? Longa bukomo bwa kufundija bobe bana buno bufundiji mwanda wa kisaka kyobe kyendelele kutama ku mushipiditu.
Kukola Byabupeta bya ku Mushipiditu
it-2-F p. 484 mus. 2
Pashika
Bipupo byonso Dikumi byāponene pa Edipito, bwādi butyibi bwātyibilwe baleza ba Edipito, nakampata kipupo kya dikumi kya kwipaya bana babedi. (Div 12:12) Mukōko mulume wādi ujila kudi leza Ra, nanshi ku bene Edipito, kushinga ku bibelo mashi a kana ka mukōko ka pa Pashika kwādi kutuka leza. Kadi ñombe mulume nandi wādi ujila, o mwanda kwipaibwa kwa bañombe babedi kwādi kufwija leza Osiris bumvu. Felo wādi utōtwa bu mwanā leza Ra. Lufu lwa mwana umbedi wa Felo lwālombwele amba leza Ra ne Felo i bazoze.
it-1-F p. 207 mus. 1
Kitango
Kintu kyādi kilengeja “bitango bijila” bikale bya pa bula, i mwanda bantu kebādipo bengila mingilo mikomo mu bula bwa bino bitango. Kimfwa, difuku dibajinji ne dya busamba-bubidi dya Masobo a Mikate Yampikwa Kiyujo, ādi a “bitango bijila,” kadi Yehova wānenene amba: “I kutupu mwingilo ukengilwa mu ano mafuku. Poso enka byobya bisaka kudya muntu ense byo bikemuteakanibwa.” (Div 12:15, 16) Inoko, ku “bitango bijila,” babitobo bādi balambula bitapwa bivule kudi Yehova (Lev 23:37, 38), na bubine kebādipo bajilula kijila kyāpeleje kwingila mingilo ya bukile-bukya. Mu bula bwa bino bitango, kekyādipo kitatyi kya kōlola maulu, ino kyādi kitatyi kya kumwena bininge mu bintu bya ku mushipiditu. Yenga ne yenga mu difuku dya Sabato, bantu bādi bebungila pamo mwanda wa kutōta ne kupebwa bulombodi. Bādi bakankamikwa na butangi ne nshintulwilo ya Kinenwa kya Leza, enka na mobyādi kebilongelwa mwenda mafuku mu mashinankonka. (Bil 15:21) Nanshi bantu byokebādipo bengila mingilo mikomo mu dya Sabato nansha mu kitatyi kya “bitango bijila,” bādi bafwaninwe kwipāna bininge mu milombelo ne kulangulukila pa Umpangi wabo ne pa mpango yandi.—Tala KITANGO.