Myanda ya Kunyemena’ko ya Kabuku ka ku Kupwila Būmi ne Mwingilo
3-9 KWEJI 8
BYABULĒME BYA MU KINENWA KYA LEZA | DIVILU 13-14
“Imanijai Mumone Lupandilo Lwa Yehova”
Mosesa—Muntu wa Lwitabijo
Padi Mosesa kādipo uyukile amba Yehova wādi wa kukalañanya Kalunga Katyila na kushitwila bene Isalela dishinda dya kupandila’mo. Ino, Mosesa wādi ukulupile amba Leza wādi wa kulonga’po kintu kampanda mwanda wa kukinga bantu Bandi. Kadi Mosesa wādi usakila banababo bene Isalela bekale na kino kikulupiji. Tutanga amba: “Mosesa webanena’mba: Kemukyoyai moyo, imanai talala mumone bupandiji bwa Yehova bwakemulongela dyalelo dino’di.” (Divilu 14:13) Le Mosesa wābwenye kukomeja lwitabijo lwa banababo bene Isalela? I amo, mwanda Bible wisambila padi Mosesa ne pa bene Isalela bonso amba: ‘Kadi i ponka pa kwitabija po baābukile pa Kalunga Katyila enka bwa panshi patupu pōmu.’ (Bahebelu 11:29) Ke’nkapo Mosesa wāmwenine mu lwitabijo lwandi, ino i ne bantu bonso bāboile’ko ñeni.
Mwinē Bukomo Bonso Aye’ko Ukwete Bantu na Bulēme
Tanga Divilu 14:19-22. Langa’po bidi shi wadi pamo na bene Isalela. Mubajikilwa. Kibumbo kya basola kya bene Edipito kunyuma kwenu, kumeso nako Dijiba Dityila. Penepo Leza walonga’po kintu. Dilenga dya dikumbi dyadi divudile kwikala kumeso dibajokela kunyuma kwa nkambi, pa bukata bwenu na bene Edipito. Abo abaikala mu fukutu, ino nkambi yenu mu kitōkeji kya mu kingelengele! Kupwa ubamone Mosesa olwela kuboko kwandi pa dijiba, ebiya kubatetuka kivula kikatampe kutunduka, kibalala dishinda dikatampe kufika ne bobwa bukila. Penepa abe, kyobe kisaka, ne banyema benu bonso kemwenda mu ndudi mu kyalo kya dijiba pamo ne bantu bakwabo. Mubatulumuka pa kumona panshi patupu bitoto nansha kusenena kwine. I pōmu tē, mwa kwendela’po biyampe. Mfulo mfulō, enka ne boba benda bityetye abafika biyampe bobwa bukila.
w09-F 15/3 p. 7 mus. 2-3
Kufwaninwepo Kwilwa Yehova
Abo bene Edipito bakilwa na makalo abo a divita makonkoke, bene Isalela bonso baābuka bobwa bukila. Kupwa Mosesa wāolwela kuboko kwandi pa Dijiba Dityila. Penepo Yehova wāpomona mumbu ya mema. Ebiya mema mavule āpūta Felo ne basola bandi. Bano balwana bonso bāfwa. Ino bene Isalela bāpanda!—Div 14:26-28; Ñi 136:13-15.
Mu bula bwa myaka mivule, mizo ya kubwipi yādi ikivuluka kino kinkumenkume. (Div 15:14-16) Myaka makumi aná ne musubu pa kupita’po, Lehaba mwine Yediko wāsapwila bana-balume babidi bene Isalela’mba: “Tubakwatwa moyo pa mwanda wenu. . . . Mwanda twaivwene mwaumijije Yehova mema a Dijiba Dityila ku meso enu pomwatambile mu Edipito.” (Yos 2:9, 10) Enka ne ino mizo ya Bajentaila, keyāidilwepo muswelo wāpandije Yehova bantu bandi. O mwanda nanshi muzo wa Isalela kewādipo na bubinga bwa kwidilwa Yehova.
Kukola Byabupeta bya ku Mushipiditu
it-1-F p. 1015
Dishinda Diloe
Mu kitatyi kya kala, mashinda maloe kubadila’mo ne mashinda mavule malongololwe biyampe, ādi alunga bibundi ne malopwe mu ntanda ya Paleshitina. (Umb 20:17-19; 21:21, 22; 22:5, 21-23; Yos 2:22; Bat 21:19; 1Sa 6:9, 12; 13:17, 18; tala DISHINDA DYA MULOPWE.) Dishinda dyādi diloe bininge, dyādi ditamba ku Edipito dyāsabila mu Ngaza ne mu Ashekelona, bibundi bya bene Fidishitia, kupwa kedyenda dya kungala ne kutunduka, ku Mekido. Dyāpita dyakafika ku Hazola, Kungala kwa Dijiba dya Ngadilea, kupwa dyākasaba ku Damakasa. Dino dishinda dyādi dityibulula mu ntanda ya bene Fidishitia, dyādi dīpi bininge shi utamba ku Edipito wenda mu Ntanda ya Mulao. Inoko Yehova wādi utele bene Isalela mutyima, wēbendeja dishinda dingi kutyina bakatūyuka shi abatambwe na bene Fidishitia.—Div 13:17.
it-1-F p. 848 mus. 4-5
Divilu
Le i pepi paābukidile bene Isalela kitatyi kyākalañene Dijiba Dityila?
Yuka’mba bene Isalela pa kutūla nkambi ya bubidi mu Etāme, “kufula kwa mu ntanda mutuputupu,” Leza wāsapwidile Mosesa amba “bafwaninwe kujoka bakatūle nkambi kumeso kwa Pihahilote . . . kubwipi na dijiba.” Ano manwa ādi a kulengeja Felo amone amba bene Isalela “baba balumbakanalumbakana.” (Div 13:20; 14:1-3) Befundi bamo ba Bible bayukile myanda itala dishinda dya el Haj banena’mba kyubwa kya Kihebelu “kujoka,” kekifunkilapo pa “kusāsuka” nansha “kusonsoloka,” ino kidi na mulangwe wa kwitola, ko kunena’mba kwalamuka kojokela kotamba. Balanga’mba bene Isalela pobāfikile kungala kwa kitonto kya Suez, baālamukile kebenda dya kutunduka kwa Djebel Ataqa, mulongo wa ngulu udi kushika kwa kitonto. Pa kine kifuko’kya, bantu bavule na mwādi mwikadile bene Isalela, kebabwanyapo kusokola kwa kunyemena shi balwana bebalonda dya kungala, mwanda dijiba i dijike kobenda.
Lufundijo lumo lwa Bayuda lwa mu myaka katwa kabajinji Yesu ke mwiye, lwisambila pa uno mwanda. (Tala PIHAHILOTE.) Ino kya mvubu mpata, ino myanda i mikwatañane na yoya inenenwe mu Bible, mine ishidile na milangwe ya befundi bavule ba Bible. (Div 14:9-16) Bimweka’mba bene Isalela baābukidile kulampe bininge na Kitonto (kitonto kidi kushika kwa Dijiba Dityila), shi bitupu, basola ba Felo bādi’tu bakwalamuka kitonto, bakajikila bene Isalela bobwa bukila.—Div 14:22, 23.
10-16 KWEJI 8
BYABULĒME BYA MU KINENWA KYA LEZA | DIVILU 15-16
“Tendela Yehova na Ñimbo”
Mwanda waka kifwaninwe kwakamwa Leza tamba’nka pano?
Konakanibwa kwa bibumbo bya bashidika bene Edipito na Yehova kwāmuzunzwile kumeso a batōtyi bandi, kadi kwāyukanya dijina dyandi kujokoloka ntanda yonso. (Yoshua 2:9, 10; 4:23, 24) Bine, dijina dyandi dyāzunzwilwe peulu pa baleza babubela ba mu Edipito bakubulwa bukomo, bākankelwe kunyongolola batōtyi babo. Lukulupilo lobādi batūdile mu bilezaleza, mu muntu ufwa ne mu lupusa lwa bibumbo bya bashidika lwebāfikije kubi. (Mitōto 146:3) O mwanda bene Isalela bātengelwe pa mityima kebembe ñimbo ya mitendelo yādi ilombola kwakamwa Leza mūmi, wānyongolwele bantu bandi ku bukomo!
Mwanda waka kifwaninwe kwakamwa Leza tamba’nka pano?
Shi twādi amba twādi twimene pamo na Mosesa pakubulwa kyaka, longa netu twākunkilwe ku mityima twimbe amba: “A! Yehova! lelo wifwene na abe umbukata mwa balezaleza i ani le? Lelo wifwene na abe utumbile umbu-ujila, [ufwaninwe kwakamibwa na ñimbo ya] mitendelo, uloñanga bingelengele, i ani le?” (Divilu 15:11) Tamba’nka penepa, milangwe ya uno muswelo yādi ipitulukwa’mo umbula bwa tutwa twa myaka. Mu mukanda wa mfulo wa mu Bible, mutumibwa Yoano ulombola kibumbo kya bengidi ba Leza ba kikokeji bashingwe-māni, amba: “Ke bēmbe lwimbo lwa Mosesa umpika wa Leza, ne lwimbo lwa Kāna-ka-mukōko.” Lelo luno lwimbo lukatampe i lwimbo’ka? I lwa’mba: “Abe, Yehova Leza Mwinebukomobonso, bilongwa byobe i bikatakata byakutendelwa; mashinda obe i moloke malumbuluke, abe Mulopwe wa [nyeke ne nyeke-ke]. Abe Yehova, lelo i ani kakakutyina, ne kutumbija dijina dyobe? Ke-wi-muntu abe enka ye ukola.”—Kusokwelwa 15:2-4.
Ne dyalelo nadyo kudi batōtyi banyongololwe, kebatendelangapo enka mingilo ya makasa a Leza kete mhm, ino batendelanga monka ne mbila yandi. Bano bantu batambile mu mizo yonso bānyongolwelwe ku mushipiditu, besansenye na ino ntanda myoneke, mwanda betabije kadi bengidijanga mbila myoloke ya Leza. Mwaka ne mwaka, kwikalanga tutwa twa tununu twa bantu basomboloka mu ino ntanda myoneke, mwanda wa kwikala mu bulongolodi boloke bwa batōtyi ba Yehova mwakubulwa busala. Panopano ponka, kupwa kwa butyibi bwa bukalabale bwa Leza bukaponena mutōtelo wa bubela ne kupwa kwa konakanibwa kwa bipindi bya ino ngikadilo imbi bisheleko, bantu bakekalanga na būmi bwa nyeke mu ntanda impya ya boloke.
it-2-F p. 360 mus. 6
Minjiki
Divule dine ñimbo yādi imbwa na kisumpi mu Isalela yādi imbwa betundaija, ko kunena’mba bisumpi bibidi bya batuimba byabanye pabidi, kimo kituma milongo ya ñimbo, ebiya kikwabo nakyo kyatundaija, nansha padi muntu umo utuma ebiya kisumpi kya batuimba kyatundaija. Uno mwimbilo i mutelwe mu Bisonekwa bu mwimbilo wa kwitundaija. (Div 15:21; 1Sa 18:6, 7) Kadi uno mwimbilo i mwingidijibwe ne mu ñimbo ya mitōto imoimo, kimfwa mu Lwimbo lwa Mitōto 136. Kutelwa kutelelwe bibumbo bibidi bikatampe bya batuimba mu kitatyi kya Nehemia, ne kwimba kobāimbile pa kupāna lubumbu lwa Yelusalema, kulombola’mba bāimbile mu uno muswelo.—Neh 12:31, 38, 40-42; tala LWIMBO.
it-2-F p. 674
Mupolofeto Mukaji
Midiamu ye mwana-mukaji mubajinji kutelwa mu Bible bu mupolofeto mukaji. Leza wāletele misapu imo kupityila kwadi, padi mu ñimbo ya ku mushipiditu. (Div 15:20, 21) O mwanda padi aye ne Alone bānenene Mosesa amba: “Lelo[Yehova] kesambilangapo ne kudi batwe?” (Umb 12:2) Yehova wānenene kupityila kudi mupolofeto Mika amba wātumine “Mosesa, Alone, ne Midiamu” ku meso a bene Isalela pāebatambije mu Edipito. (Mik 6:4) Nansha Leza byaāletele misapu kupityila kudi Midiamu, inoko Midiamu wādi munshi mwa mwanabo Mosesa. O mwanda paādi kasake kutabuka mikalo, Leza wāmupele mfuto isansa.—Umb 12:1-15.
Kukola Byabupeta bya ku Mushipiditu
w11-F 1/9 p. 14
Lelo Wadi Uyukile Kala?
Mwanda waka Leza wāletele bisesekwadi mwanda wa kudisha bene Isalela?
Bene Isalela pobātambile mu Edipito, Leza wēbapele misunsa ibidi mwita muvule wa bisesekwadi.—Divilu 16:13; Umbadilo 11:31.
Bisesekwadi i toni tutyetutye twa bula bwa masantimetele 18, kadi tulēma mangalame 100. Twelelanga mai ne kwivudijija mu bifuko bivule bya kushika kwa Azia ne mu Bulaya. Kupwa, mu buyo twavilukila mu Afrika wa Kungala ne mu Alabia. Shi ketuviluka, twendanga bitanda, twatyibulula kutunduka kwa Dijiba dya Meditelanea twaenda pa nsongo ya Lūlu lwa Shinai.
Dibuku dimo disambila pa Bible(The New Westminster Dictionary of the Bible), dilombola’mba bisesekwadi “byendanga milela milampe, bitakikwa na luvula, ino shi luvula lubashinta, nansha shi bibakōka kutumbuka pa mwanda wa milela milampe, abyo byonso byapona panshi byabutama.” Kumeso kwa kwenda, biloñanga difuku dituntulu nansha abidi, o mwanda bipēlanga kukwatwa na babiluwe. Ku ngalwilo kwa myaka ya katwa ka 20, bene Edipito badi bapoteja mwaka ne mwaka kintu kya midiyo isatu ya bisesekwadi.
Misunsa yonso ibidi yobāpele bene Isalela bisesekwadi, mwādi mu bushipo. Nansha bisesekwadi byobyādi bikala pa Lūlu lwa Shinai mu kino kitatyi, inoko Yehova ye ‘wāpukumije kivula’ kyāleta bino byoni mu nkambi ya bene Isalela.—Umbadilo 11:31.
Bipangujo bya Batangi
Kinondanonda na kunyongololwa kwa Bene Isalela mu Edipito, bāshilwile kwiuningila pa bidibwa. O mwanda Yehova wēbapele mana mu kingelengele. (Divilu 12:17, 18; 16:1-5) Mu kine kitatyi’kya, Mosesa wānena Alone amba: “Yata mutyibi ubikemo oma umo wa mana, ubike’o mu meso a Yehova, ulamibwe wa ku nkongo yenu.” Kadi nsekununi inena’mba: “Monka mwamusoñaninya Yehova Mosesa, mo monka Alone wabika’o ku meso a bu-kamoni [kibīko kya bintu bya kala mulamibwa bintu bya kamweno] amba ulamibwe.” (Divilu 16:33, 34) Na bubine, Alone wādingile mana mu mutyibi umo mu kine kitatyi’kya, ino wāilaije bidi pa kwiatūla kumeso kwa bukamoni kutūla ne byālongele Mosesa Dikumbo, wābika’mo ne bipapo bya mabwe.
17-23 KWEJI 8
BYABULĒME BYA MU KINENWA KYA LEZA | DIVILU 17-18
“A Bana-Balume ba Butūkanye, Fundijai Bakwabo ne Kwibapa Mingilo”
Mosesa—Muntu wa Buswe
Mosesa wālombwele buswe bwaādi uswele banababo bene Isalela. Bādi bayukile amba Yehova wāingidije Mosesa mwanda wa kwendeja bantu bandi, o mwanda bāfwenene Mosesa na myanda yabo palapala. Tutanga amba: “Bantu baimana kwadi Mosesa, kushilwila lubanga ne ku kyolwa.” (Divilu 18:13-16) Langa’po mwādi mupungidila Mosesa kwivwana—mansá na mansá—bene Isalela bamusapwila myanda yabo! Inoko, Mosesa wādi usangedile kukwasha bantu baādi usenswe.
Kikulupiji Kidi na Mvubu pa Kumona Būmi bwa Nsangaji
Bano bantu bādi na ngikadilo kampanda ya bwine Leza kumeso kwa kutongwa’bo pa byaba bikulupilwa. Bādi ke belombole kala amba bakaminwe Leza; bapele Umpangi kalēmo kakatampe ne kutyina kumufityija mutyima. Byādi bimweka ku bonso amba bano bana-balume bādi balonga bukomo bwabo bonso bwa kulamata ku misoñanya ya Leza. Bādi bashikilwe lupeto lwa bukondame, kintu kilombola amba bādi bakomo mu mwikadilo byokebabwanyapo konwa na lupusa lwibapebwa. Kebādipo ba kona kikulupiji kyādi kibapelwe na kutubulula tumweno twa abo bene, twa babutule nansha twa balunda.
w02-F 15/5 p. 25 mus. 5
Bantu Boloke Balamanga Bululame
Mosesa wādi muntu mutūkanye kadi mwityepeje. Paādi wikonda na kupwija myanda yonso ya bantu, shandi muko Yefelo wāmudingile amba: Pá’ko bana-balume babwenye bisakibwa mingilo imoimo. Mosesa pa kujingulula’mba kabwanyapo kwingila’yo bunka, wāitabija ano madingi. (Divilu 18:17-26; Umbadilo 12:3) Muntu wa butūkanye kekakangapo kupāna mingilo, nansha kutyina’mba usa kujimija lupusa shi ape bakwabo babwenye bisakibwa mingilo. (Umbadilo 11:16, 17, 26-29) Ino usakanga kukwasha bakwabo bendelele ku mushipiditu. (1 Temote 4:15) Le tubulwepo netu kulonga namino?
Kukola Byabupeta bya ku Mushipiditu
“Kokaleka Maboko Obe Kukōka”
Ba Alone ne Hulu bākweshe Mosesa, bāmukomeja maboko na kwiakwata mu bulwi bwa na bene Amaleke. Dyalelo, netu tubwanya kukimba muswelo wa kukwatakanya ne kukwasha bakwabo. Banabetu bamo basusukanga na bununu, misongo, kupangwapangwa na ba mu kisaka kyabo, bushiyena, ne kufwilwa muntu obasenswe. Tubwanya kadi kukomeja bankasampe baningilwa kulonga bibi nansha kukimba nsangaji mu ino ntanda. (1 Tesalonika 3:1-3; 5:11, 14) Kimba miswelo ya kuta bakwabo mutyima bya binebine ku Njibo ya Bulopwe, mu busapudi, pomudīla pamo bidibwa, nansha pomwisamba ku telefone.
it-1-F p. 395
Mikanda ya mu Bible Mitabijibwe
Na bubine kudi bubinga buvule bulombola’mba ino mikanda yālembele Mosesa i ya ku bukomo bwa mushipiditu, mitabijibwe na bonso, kadi ifwaninwe kulondwa mu butōtyi butōka. Mosesa kētūdilepo aye mwine bu mwendeji wa bene Isalela; mwanda dibajinji Mosesa wētyepelwe. (Div 3:10, 11; 4:10-14) Leza wāzunzwile Mosesa, wāmupa bukomo mu kingelengele, enka ne babitobo ba maleñanya ba Felo bānena’mba byonso byādi bilonga Mosesa byādi bitamba kudi Leza. (Div 4:1-9; 8:16-19) Mosesa kētūdilepo aye mwine bu muneni ne mulembi. Ino wākōkele mbila ya Leza ne kupebwa bukomo bwa mushipiditu ujila, penepo wābwanya kwisamba ne kulemba mikanda ya mu Bible mitabijibwe na bonso.—Div 17:14.
24-30 KWEJI 8
BYABULĒME BYA MU KINENWA KYA LEZA | DIVILU 19-20
“Motadilwa na Mbila Dikumi”
w89-F 15/11 p. 5 mus. 6
Le Mbila Dikumi Idi na Mvubu’ka Kodi?
Mbila iná mibajinji itulombola byobya byotufwaninwe kulonga ku mutamba wa Yehova. (Mbila mibajinji) Aye i Leza usakanga kulamatwa bunka. (Mateo 4:10) (Ya bubidi) Batōtyi bandi kebafwaninwepo kutōta bilezaleza. (1 Yoano 5:21) (Ya busatu) Tufwaninwe kutela dijina dya Leza na bulēme, kadi mu muswelo mufwaninwe, ketufwaninwepo nansha dimo kwiditela pampikwa bulēme. (Yoano 17:26; Bene Loma 10:13) (Ya buná) Tufwaninwe kwipāna mu mingilo ya Leza mu būmi bwetu bonso. Kino kitukwashanga tukōkolokwe, nansha’mba tulama ‘sabato’ ku mwikadila wa kwimona bu boloke kutabuka.—Bahebelu 4:9, 10.
w89-F 15/11 p. 6 mus. 1-2
Le Mbila Dikumi Idi na Mvubu’ka Kodi?
(Ya butano) Shi bana i bakōkele ba mbutwile, kisaka kikalanga nyeke mu bumo, kadi Yehova wikyeselanga. Bine, ino “mbila mibajinji ne mulao ponka” ileta lukulupilo lwa kutendelwa! Shi wiilonde ‘bikakwendekela biyampe’ kadi ukekala “mafuku mangi pano pa ntanda.” (Bene Efisesa 6:1-3) Pano byotudi “mu mafuku a mfulo” a ino ngikadilo mibi, kikōkeji kya bwine Leza kipanga bankasampe dyese dya kukekala bōmi.—2 Temote 3:1; Yoano 11:26.
Buswe botusenswe bakwetu buketukwasha tuleke kwibasanshija na bilongwa bibi na mulombwela’kyo (Mbila ya busamba) kwipayañana, (Ya busamba-bubidi) makoji, (Ya mwānda) kwiba, ne (Ya kitema) kubepa bubela. (1 Yoano 3:10-12; Bahebelu 13:4; Bene Efisesa 4:28; Mateo 5:37; Nkindi 6:16-19) Ino le mu mutyima wetu namo le? (Mbila ya dikumi) ipeleja makomwa-meso, itufundija’mba Yehova usakanga twikale nyeke na kukanina kuyampe kwa mutyima.—Nkindi 21:2.
Kukola Byabupeta bya ku Mushipiditu
it-2-F p. 658 mus. 5-6
Kitobo
Butobo bwa Bwine Kidishitu. Yehova wālaile muzo wa Isalela’mba shi ulame kipwano kyaāsambile nao, nankyo uno muzo ukekala “bu bulopwe bwa babitobo kadi muzo ujila.” (Div 19:6) Inoko, butobo bwa ku musuku wa Alone bwādi bwa kufula kitatyi kikāya butobo bukatampe bobwādi bwelekeja. (Bah 8:4, 5) Bwādi bwa kufula kitatyi kyāpingakanibwe kipwano kya Bijila na kipwano kipya. (Bah 7:11-14; 8:6, 7, 13) Dibajinji, muzo wa Isalela kete o wāpelwe dyese dya kulupula babitobo ba Yehova ba kwingila mu Bulopwe bwa Leza; ino mwenda mafuku dino dyese dyāpebwa ne Bajentaila.—Bil 10:34, 35; 15:14; Lo 10:21.
Bayuda batyetye kete bo bāitabije Kidishitu, pa kino uno muzo wākomenwa kwikala ujila ne kulupula bantu ba kwingila mu bulopwe bwinebwine bwa babitobo. (Lo 11:7, 20) Bene Isalela byobābudilwe kikōkeji, Leza wēbadyumwine myaka tutwa kumeso kupityila kudi mupolofeto Hosea amba: “Byowapela buyuki, nami nkakupela uñingidile bu kitobo wami; kadi byowailwa kijila kya Leza obe, nami nkelwa bobe bana.” (Hos 4:6) Yesu nandi wāsapwidile bendeji Bayuda amba: “Bulopwe bwa Leza bukemuyatwa ne kupebwa ku muzo upa bipa byabo.” (Mat 21:43) Nansha nankyo, Yesu Kidishitu paādi pano pa ntanda wādi ulonda Bijila bya Mosesa, wādi uyukile amba butobo bwa ku musuku wa Alone bukingila, penepa wātuma bantu bawāundapile makopo, bende ku babitobo bakalambule kitapwa.—Mat 8:4; Mak 1:44; Luk 17:14.
Myanda Mikatampe ya mu Mukanda wa Divilu
20:5—Yehova upijanga namani “bubi bwa bashabo” pa nkongo ilonda’ko? Muntu ne muntu shi kadi na myaka ya kusela biselwa, utyibilwanga mambo pangya mwiendelejo ne bilongwa byandi aye mwine. Ino muzo wa Isalela powāvundamukīle ku kutōta bilezaleza, wāangwile bipa bilula enka ne ku nkongo yālondele’po. Nansha ke bene Isalela ba kikōkeji bātengelwe na uno mwanda ke-pantu koneka kwa butōtyi bwa muzo kwālengeje bululame bwikale ke kintu kibakomena kulonda.
31 KWEJI 8–6 KWEJI 9
BYABULĒME BYA MU KINENWA KYA LEZA | DIVILU 21-22
“Mona Būmi Mwibumwena Yehova”
it-1-F p. 553
Bikupilwa
Muhebelu umunine umpika, wādi na lupusa lwa kukupila umpika wandi mwana-mulume nansha mwana-mukaji nsonde, shi umpika’wa kakōkelepo nansha shi watomboka. Ino shi wamwipaya na bikupilwa, nandi wādi upebwa mfuto. Inoko shi umpika walonga difuku dimo nansha abidi ebiya wāfwa, kino kyādi kilombola’mba mfumwandi kādipo umukupidila kwipaya. Wādi na lupusa lwa kumulemununa, mwanda umpika’wa i muntu wapotele “ku lupeto.” Kādipo usaka konakanya kino kya bulēme kyapotele, nansha kwikolomwena bushiyena. Kadi shi umpika wafu pa kupwa kwa difuku dimo nansha mavule, kebyādipo biyukana shi wafu bikupilwa’ni nansha wafu pa mwanda mukwabo. O mwanda shi umpika wafu pa kupwa kwa difuku dimo nansha abidi, mfumwandi kādipo upebwa mfuto.—Div 21:20, 21.
Le Ulēmekele Būmi Mwibulēmekele Leza?
Būmi bwa muntu yense budi na mvubu ku meso a Yehova. Enka ne mwana ukidi munda i mulēme kwadi. Mu Bijila bya Mosesa, shi muntu wāsanshija mwana-mukaji wa dīmi mu kalengwa, mwana-mukaji’wa nansha mwana udi munda wafu, Yehova wādi umona muntu’wa bu ntapañani. Kino kilombola’mba nansha shi mwādi i mu kalengwa, muntu’wa wādi unenwe kwipaibwa, būmi bwandi bwādi bufuta būmi bwa ufwile. (Tanga Divilu 21:22, 23.) Ku meso a Leza, mwana ukidi munda i muntu mūmi. Na ino milangwe mu ñeni, le ulanga Leza umonanga namani kupulumuna dīmi? Molangila, wiivwananga namani pamona bana midiyo ne midiyo bepailwa munda mwaka ne mwaka?
w10-F 15/4 p. 29 mus. 4
Yehova Ukusakilanga ‘Wepuke Byaka’
Mu Bijila mwādi mfuto ya kuletwa shi nyema wa nja wasanshija muntu. Shi ñombe wateme muntu wamwipaya, mwinē’ye wādi ufwaninwe kumwipaya kutyina wakatema bantu bakwabo. Byākadipo ufwaninwe kudya uno mwita nansha kupoteja’o, wādi ujimija. Ino le byādi bikala namani shi ñombe wasanshija muntu, ino mwinē’ye kumukuta mpika? Shi mwenda mafuku uno ñombe waipaya muntu, ñombe’wa ne mwinē’ye bādi bepaibwa. Kino kijila kyādi kidyumu ku muntu ense wādi usūla luombe lwandi.—Div 21:28, 29.
Kukola Byabupeta bya ku Mushipiditu
Mwanda Waka Ufwaninwe Kwipāna Kudi Yehova?
Kwipāna kwa Bwine Kidishitu i mwanda musumininwe. I mupite kumvwañana bitupu. Penepa, i kamweno’ka kotumwena mu kwipāna? Pa kudingakanya uno mwanda, tutalei kamweno kadi mu kumvwañana kwikalanga mu bantu. Kimfwa kimo bidi i kya bulunda. Pa kusaka kupwana bulunda, ufwaninwe kwitabija kiselwa kya bu mulunda. Kino kilomba kumvwañana—ukamona’mba ufwaninwe kuta mulunda nobe mutyima. Bulunda bumo butendelwa bulombwelwe mu Bible i bwa ba Davida ne Yonafane. Bāsambile kipwano. (Tanga 1 Samwele 17:57; 18:1, 3.) Nansha bulunda bwa uno muswelo byo busakene, bulunda bwa bantu bavule butyitanga shi i beivwanike, nansha kwikōkela abo bene.—Nk. 17:17; 18:24.
Mukanda wa Bijila wāpelwe Bene Isalela na Leza ulombola kipwano kikwabo kyādi kimwena’mo bantu po bādi bomvwañana. Shi mupika usaka kwikala talala nyeke na mfumwandi muyampe, wādi ukokeja kwiimvwanika nandi bya lonso. Bijila binena’mba: “Shi umpika unena’mba nsanshilwe mfumwami, ne mukajami ne bāna bami bene, nkitambepo bu-mwanapabo. Nankyo mfumwandi ukamuleta kudi bamfumu, kabidi ukamuleta ku kinjilo nansha ku lunji; ebiya mfumwandi ukamusaba kutwi ne mutubulo ke wapikipikitya, ino ukamwingidila nyeke ne nyeke.”—Div. 21:5, 6.
it-1-F p. 545
Disengo
Binenwa bidi mu Divilu 21:14 bilombola’mba nansha ke kitobo wādi wipaibwa shi waipayañana, kukwata ku masengo a kisōkelo kekwādipo kupandija muntu wipayañene ku kusaka.—Dingakanya na 1Ba 2:28-34.