MWA KUPWILA MUSHIKWA

2 | Leka Kwaluja Kinongo

Bifundija Bible:

“Kemwakyalwijai muntu kibi ku kibi. . . . Shi bikokejika, mungya momubwaninya, ikalai mu ndoe na bantu bonso. Kemwakīlubwilai kinongo banwe bene, . . . mwanda i kilembwe amba: ‘“Kinongo i kyami; i ami ukajokeja,” i Yehova unena.’”—BENE LOMA 12:17-19.

Mobishintulwila:

Nansha shi i byendele’mo kuloba kitatyi kyobetulonga bibi, Leza ketusakilangapo kwaluja kinongo. Ino aye witusakila tutūkije mutyima, mwanda i mulaye amba panopano ponka usa kutalula’ko bibi byonso.—Ñimbo ya Mitōto 37:7, 10.

Byobwanya Kulonga:

Mushikwa wibwejanga’ko shi bantu bampikwa kubwaninina bealwija kinongo. O mwanda shi muntu wakulobeja nansha kukusanshija, kokaluja kinongo. Longa bukomo bwa kwīfula ne kulonga bintu mu ndoe. Ino mu myanda imo bilomba’tu kwibitala bitupu. (Nkindi 19:11) Shako kyaba kimo i biyampe kulombola’mo boba badi na lupusa. Kimfwa shi abakusanshija bibibibi, ubwanya padi kulombola’mo bampuluji nansha ba lupusa bakwabo.

Kwaluja kinongo i kwiletela musala

Ino le bikekala namani shi ubamone amba kekudipo muswelo wa kupwa myanda mu ndoe? Ne le ukalonga namani shi kodi kala mulonge bukomo bwa kupwa myanda mu ndoe? Kokaluja kinongo. Mwanda kwaluja kinongo kukalengeja myanda ibipile’ko. Ino abe leka mushikwa. Ubwanya kukulupila’tu amba Leza usa kupwa mwanda’wa. “Mukulupile, nandi ukakulongela bintu.”—Ñimbo ya Mitōto 37:3-5.

Mwanda Mumweke—ADRIÁN

Wanekenye Milangwe ya Kwaluja Kinongo

Adrián paadi nkasampe, wadi muntu wa mushikwa wikupila na bantu mu bipito mwanda wa kwaluja kinongo. Unena’mba: “Divule dine twadi twikupila na mata, kadi kyaba ne kyaba badi banshiya na mashi bilembelembe mu dishinda, amba mfwile’mo.”

Adrián washilwile kwifunda Bible na myaka 16. Unena’mba: “Ponefundile Bible bininge, namwene amba mfwaninwe kushinta ngikadila yami.” Wadi ufwaninwe kuleka mushikwa ne bya lūma. Wasangedile bininge byaefundile mu Bene Loma 12:17-19 pa mwanda utala kuleka kwaluja kinongo. Unena’mba: “Nafudile ku kwitabija’mba Yehova ukapwija bukondame mu muswelo wasaka kadi mu kitatyi kyasaka. Bityebitye naleka mwiendelejo wami wa bya lūma.”

Difuku dimo kyolwa, kisumpi kya bansongwalume bobadi bavudile kwikupila nabo bamutamba’dyo. Mukulumpe wabo wamunena’mba: “Wipandije!” Adrián unena’mba: “Naivwene bya kwikupila nabo.” Ino pa kyaba kya kwikupila nabo, walombela kudi Yehova milombelo mīpi, kupwa wataluka’po.

Adrián ubweja’ko amba: “Difuku dilonda’ko netana na uno mukulumpe wabo bunka bwandi. Naivwana bulobo kenkimbe kumwalwija kinongo, ino nalomba monka Yehova mundamunda ankwashe ntalaje bulobo bwami. Na mu kitulumukila’tu, uno nsongwalume waumfwena, waunena’mba: ‘Mfwile’ko lusa pa byapityile kesha kyolwa. Ino bubine i buno amba, nsaka kwikala pamo bwa abe. Nsakanga kwifunda Bible.’ Bine, nasangele bininge pa kubwanya konabwenye kutalaja bulobo bwami! O mwanda twashilwile kwifunda nandi Bible.”