Le Nsekununi ya Yesu Yālembelwe Kitatyi’ka?

Bilondolola Bible

Pa mwanda utala nsekununi ya mu būmi bwandi, mutumibwa Yoano wālembele amba: “Yewa webimwene wasapwile buno bukamoni, kadi bukamoni bwandi i bwa bine, kadi aye uyukile amba bintu byanena’bi i bya bine, amba nenu mwitabije.”—Yoano 19:35.

Bubinga bumo bwa kukulupidila nsekununi ya Maevanjile idi mu Mateo, Mako, Luka, ne Yoano i buno amba, yālembelwe bantu bēmwenine binkumenkume bakidi bōmi. Mabuku amo anena’mba, Evanjile ya Mateo yāsonekelwe myaka mwānda kupwa kwa lufu lwa Kidishitu, ko kunena’mba, kubwipi kwa mwaka wa 41 Yesu Ke Mwiye. Befundi bavule nabo balanga’mba papityile myaka mivule, inoko bonso betabije amba mikanda yonso ya Bisonekwa bya Kingidiki bya bwine Kidishitu yāsonekelwe mu myaka katwa kabajinji Yesu Ke Mwiye.

Bantu bāmwene Yesu ukidi mūmi pano pa ntanda, bāmumwene paāfwile ne paāsangukile, bādi bakokeja kubingija nsekununi ya Maevanjile. Kadi shi mwādi bintu bya bubela bādi bakokeja kwibisokwela patōka. Polofesele Frederic Bruce unena’mba: “Batumibwa ba pa kala bādi basapula na bukomo mwanda bevwaniki babo badi kala na buyuki; kebānenenepo’tu amba, “Batwe bano twi batumoni ba bintu byonso,” ino bānenene ne amba, “enka momuyukile banwe bene (Bilongwa 2:22).”