Lelo Leza Usakanga Ngikale na Būmi bwa Muswelo’ka?

Bilondolola Bible

Leza usakanga umuyuke bu Muntu udi’ko bine, umufwene, kupwa umusanswe ne kumwingidila na mutyima obe onso. (Mateo 22:37, 38; Yakoba 4:8) Ubwanya kuyuka mwa kulongela kiswa-mutyima kya Leza kupityila ku būmi bwa Yesu ne bufundiji bwandi. (Yoano 7:16, 17) Yesu kēsambīlepo’tu pa kiswa-mutyima kya Leza bitupu, ino wēkilongele mu būmi bwandi. Na bubine, Yesu wānenene amba wādi na kitungo kya “kulonga kiswa-mutyima kya yewa [wāmutumine], ke kiswa-mutyima [kyandipo], aa.”​—Yoano 6:38.

Le nsakilwa kiyukeno kya pa bula, kimonwa, nansha kwivwana diwi pa kuyuka byobya binsakila Leza?

Aa, mwanda mu Bible mudi musapu obatumīne bantu kudi Leza. Mudi byonso byosakilwa pa kwikala “muteakanibwe senene mwa kwingidila mwingilo onso muyampe.” (2 Temote 3:16, 17) Leza ukusakilanga wingidije Bible na ‘bukomo bobe bwa kulanguluka’ amba uyuke byakusakila.​—Bene Loma 12:1, 2; Bene Efisesa 5:17.

Le Bine Mbwanya Kulonga Kiswa-mutyima kya Leza?

Bine ubwanya, mwanda Bible unena’mba: “Mbila yandi keilēmangapo.” (1 Yoano 5:3) Shako ke kunenapo amba bipēlanga nyeke kukōkela mbila ya Leza. Ino ukamwena’mo bininge kupita ne pa bukomo bolonga. Yesu aye mwine wānenene amba: “Ba nsangaji i boba bevwana mwanda wa Leza ne kwiulama!”​—Luka 11:28.