Le Ntanda Ikafula Kitatyi’ka?

Bilondolola Bible

Pa kuyuka kitatyi kikafika mfulo ya ntanda, i biyampe bidi kwivwanija muswelo wingidije Bible kishima “ntanda.” Kishima kya Kingidiki kosmos, kivudile kwalamunwa bu “ntanda,” divule dine kifunkilanga pa ntanda ya bantu, nakampata bantu kebalongapo kiswa-mutyima kya Leza. (Yoano 15:18, 19; 2 Petelo 2:5) Kyaba kimo kishima kosmos kifunkila ne pa mwikadile muzo wa muntu.​—1 Bene Kodinda 7:31; 1 Yoano 2:15, 16.a

Le “mfulo ya ntanda” i bika?

Musemwa “mfulo ya ntanda,” mwine utanwa mu malamuni mavule a Bible, ubwanya kwalamunwa ne bu “mvuyo ya ngikadilo ya bintu,” nansha “mfulo ya myaka.” (Mateo 24:3; English Standard Version) Ke kifunkilapo pa konakanibwa kwa nshi nansha kwa bantu bonso, ino pa mfulo ya mwikadile muzo wa muntu.​—1 Yoano 2:17.

Bible ufundija’mba “bantu babi bakatalulwa’ko” mwanda wa bantu bayampe basangēle būmi pano pa ntanda. (Ñimbo ya Mitōto 37:9-11) Buno bonakani bukafika pa “kyamalwa kikatampe,” kine kikapwa na divita dya Amakedona.​—Mateo 24:21, 22; Kusokwelwa 16:14, 16.

Le ntanda ikafula kitatyi’ka?

Yesu wānenene amba: “Pa mwanda wa dyodya difuku ne nsá mine, i kutupu nansha umo wibiyukile, nansha bamwikeulu ba mūlu nansha Mwana, poso’nka Tata kete.” (Mateo 24:36, 42) Kupwa wābweja’ko amba mfulo ikāya mukitulumukila, “pa nsá yokemulangidijapo amba yo ayo.”​—Mateo 24:44.

Nansha byoketubwanyapo kuyuka difuku ne nsá, Yesu wāletele “kiyukeno,” nansha lunkunkwa mulongo lwa bintu, bya kulombola’amba ke kubwipi na mfulo ya ntanda. (Mateo 24:3, 7-14) Bible utela kino kitatyi bu “kitatyi kya ku mfulo,” “kyaba kya kumfulo,” ne bu “mafuku a mfulo.”​—Danyele 12:4; Mukanda Ukola; 2 Temote 3:1-5.

Le kudi kintu kikashala pakafula ntanda?

En-en. Nshi ikekala’ko, mwanda Bible unena’mba “keikajinapo pa kifuko kyayo nyeke ne nyekeke.” (Ñimbo ya Mitōto 104:5) Kadi bantu bakayula pano panshi, mwanda Bible i mulaye amba: “Boloke bakapyananga ntanda, kadi bakekalanga’po nyeke.” (Ñimbo ya Mitōto 37:29) Leza ukajokeja bintu na mwaādi wibisakila ku ngalwilo:

• Paladisa.​—Isaya 35:1; Luka 23:43.

• Mutyima-ntenke ne bupeta.​—Mika 4:4.

• Kaji kayampe kadi kasangaja.​—Isaya 65:21-23.

• Misongo ne bununu kutupu’byo.​—Yoba 33:25; Isaya 33:24.