Le Bible Unena Bika pa Bulobo?

Bilondolola Bible

Bible unena’mba bulobo bwa kulobakanya busanshijanga yewa mwine uloba ne bantu bamujokolokele. (Nkindi 29:22) Nansha byokubwanya kwikala bubinga bwa kulobela, Bible unena’mba boba bendelela kwikala na “bulobo bupitepite” kebakapandengapo. (Bene Ngalatea 5:19-21) Mu Bible mudi misoñanya ibwanya kukwasha muntu aleke kuloba bininge

• Le bulobo i bubi nyeke?

• Le bulobo i bubi kitatyi’ka?

• Le ubwanya kubeja bulobo bobe namani?

• Bisonekwa bīsambila pa bulobo

Le bulobo i bubi nyeke?

Aa, kyaba kimo kubwanya kwikala bubinga bwa kulobela. Kimfwa, Nehemia muntu wa kikōkeji ‘wālobele bininge’ pa kwivwana’mba banababo bamo mu lwitabijo bādi basusulwa.​—Nehemia 5:6.

Kyaba kimo Leza wālobele. Kimfwa, kitatyi kyālekele bantu bandi ba pa kala kumutōta’nka aye na mobānenene, ino bāshilula kwingidila baleza ba bubela, “bulobo bwa Yehova” bwēbakila. (Batyibi 2:13, 14) Nansha nankyo, bulobo ke ngikadilapo minemine ya Yehova Leza. Udi na bubinga bwa kulobela kadi ulobanga pa ndobelo.​—Divilu 34:6; Isaya 48:9.

Le bulobo i bubi kitatyi’ka?

Bulobo i bubi shi bulobwa kilobelobe kadi pampikwa bubinga, bulobo bwine buvudile kuloba bantu bampikwa kubwaninina. Kimfwa:

• Kaini, ‘wālobele bininge’ kitatyi kyāpelele Leza kitapwa kyandi. Kaini wālekele bulobo bwandi bwenda bukanda kufika ne byawāipaile mwanabo.​—Ngalwilo 4:3-8.

• Mupolofeto Yona ‘wākwetwe bulobo bukatampe” kitatyi kyobāfwidile bene Nineva lusa kudi Leza. Leza wālemununa Yona, wālombola’mba kādipo na “bubinga bwa kulobela” ne amba ufwaninwe kufwila lusa babipya-mambo besāsa.​—Yona 3:10–4:1, 4, 11.a

Bino bimfwa bilombola’mba ku bantu bampikwa kubwaninina, “bulobo bwa muntu kebuletangapo boloke bwa Leza.”​—Yakoba 1:20.

Le ubwanya kubeja bulobo bobe?

• Jingulula kyaka kidi mu kuloba kilobelobe. Bantu bamo balañanga’mba kumwekeja bulobo bwabo i kiyukeno kya bukomo. Na bubine, muntu kabejapo bulobo bwandi i muzoze bininge. Bible unena’mba, “pamo bwa kibundi kitūtwe, kyampikwa lubumbu, mo mwikadile ne muntu kabwanyapo kwīfula.” (Nkindi 25:28; 29:11) Ne kadi shi twikale na kibidiji kya kwibeja ku bulobo, tukalombola’mba tudi na bukomo ne bujinguludi. (Nkindi 14:29) Bible ubweja’ko amba: “Yewa wija pa kukwatwa bulobo i mupite buya muntu mukomokomo.”​—Nkindi 16:32.

• Talaja bulobo bobe kumeso kwa kukulongeja’bo kintu kyokealakanya. Kisonekwa kya Ñimbo ya Mitōto 37:8 kinena’mba: “Leka bulobo ne bukalabale; kokifītwa mutyima ne kwalamuka kolonga bibi.” Tuyukei amba kitatyi kyotulobele, tudi na butyibi bwa kukwata, tubwanya kukwata butyibi bwa kwibutalaja kumeso kwa kufula ku kulonga “bibi.” Kisonekwa kya Bene Efisesa 4:26 kinena’mba, “kalabalai, ino kemwakipyai mambo.”

• Shi bibwanika, taluka’po kepakukwete bulo. Bible unena’mba: “Kushilula lūma i pamo bwa kujikula kibelo kya mema; kumeso kwa lupotopoto kushilula, taluka’po.” (Nkindi 17:14) Nansha byobidi biyampe kupwa bukidibukidi myanda yotwipile na bakwetu, abe ne mukwenu mufwaninwe bidi kwitūkija kumeso kwa kwisambila biyampe pa myanda.

• Yuka bubine bonso. Kisonekwa kya Nkindi 19:11 kinena’mba, “bujinguludi bwa muntu bine butalajanga bulobo bwandi.” Kumeso kwa kukwata kya mfulo i biyampe kukongakanya bubine bonso. Shi tuteja senene mitamba yonso ibidi, padi ketukalobepo kilobelobe.​—Yakoba 1:19.

• Lomba ndoe ya mutyima. Milombelo ibwanya kukukwasha wikale na “ndoe ya Leza itabukile ñeni yonso.” (Bene Fidipai 4:7) Milombelo i muswelo umo kete otutambwilanga’mo mushipiditu ujila wa Leza, mwine ubwanya kwitulengeja twikale na ngikadila pamo bwa ndoe, kitūkijetyima, ne kwifula.​—Luka 11:13; Bene Ngalatea 5:22, 23.

• Tonga balunda senene. Tusakanga’nka kwikala bwa bantu botupwene nabo. (Nkindi 13:20; 1 Bene Kodinda 15:33) Bible udi na bubinga bwa kudyumwina’mba: “Kokapwana na muntu wa kalobolobo nansha kwenda na yewa keje kukalabala.” Mwanda waka? “Kutyina nobe wakefunda mashinda andi ne kupya mu dikinga abe mwine.”​—Nkindi 22:24, 25.