Baimene Mwanda wa Kunkwasha

Bob walongele na motoka kintu kya makilometele 100 ku nsá imo, mu kitatyi kya mashika ne kivula mu Alberta, mu Kanada, ebiya ditonto dya ku lunkuso dyasabika mu kitulumukila. Bob kadipo uyukile amba dibasabika, kaepanga kuvuya makilometele atano adi ashele’ko pa kufika kwandi.

Mu mukanda waatumine ku Njibo ya Bulopwe ya Batumoni ba Yehova, Bob walombwele’mo mobyapityile. Walembele amba, “bankasampe batano badi mu motoka bafwenene ku lubavu lwa wami motoka, batūkija dikalashi. Baunombola’mba ditonto i disabike. Twashīka kufula, baunena bankwashe’ko tushinte’dyo. Nkyadipo nansha ndyukile amba ngidi na ditonto dya dizelefu ne ndyeke. Ponashīkile kufula kwa dishinda koku nshikete mu motoka wami, batwela munshi mwa motoka basela ditonto dya dizelefu ne ndyeke, kupwa bashinta ditonto disabike. Kwadi mashika bininge kadi mashika mekwate adi anoka. Nansha byobadi bavwele biyampe, ino baingile ne kunkwasha mone mwa kwendela. Ami mwine nkyadipo wa kubwanya’byo.

“Nafwija’ko bankasampe Batumoni batano baunkweshe’ko. Twetene nabo pobadi benda kukasapula musapu ku mobo a bantu. Bine, bano bankasampe baingidije bintu byobadi basapula. Shi ke bano bankasampe, nadi wa kwija bininge, nebafwija’ko. Le i ani uyukile shi bano bankasampe badi’tu bamwikeulu botwetene nabo mu dishinda?”