BUKWASHI KU BISAKA | BUSONGI
Mwa Kutamijija Kitūkijetyima
“Kitūkijetyima kya ba mulume ne mukaji kitūlwanga pa ditompo difuku ne difuku. Kitūkijetyima kikokeja kumweka bu ngikadila yampikwa mvubu mikatampe shi ukidi nkungulume nansha nkungakaji, ino kyo kine kisakibwa pa kwikala na busongi bulumbuluke.”—John.
Mwanda waka usakilwa kitūkijetyima?
Busongi bubwanya kukulengeja ujingulule senene tuto twa mwinē pobe.
“Shi lukebekebe lwa busongi lubakupu, i kipēla kushilula kumona’nka ngikadila mibi ya mwinē pobe. Shi uno mulangilo mubi wanze kukutādila kubapu, ukajimija kitūkijetyima bukidi bonka.”—Jessena.
Kubulwa kitūkijetyima kubwanya kukuneneja bintu byampikwa kulanga.
“Nenanga bidi ku mutyima na kiyukuyuku—na kiyukuyuku bininge. Shi nadi na kitūkijetyima bininge, longa nekakanga bidi ne kunena kintu nansha kimo mpika.”—Carmen.
Bible unena’mba: “Buswe budi na kitūkijetyima ne kanye.” (1 Bene Kodinda 13:4) Mungya mobyendele, bantu babidi besenswe banenwe’nka kwitūkijija mutyima. Ino divule kebidipo uno muswelo. John, otwatelanga kala, unena’mba: “Pamo bwa ngikadila mikwabo miyampe, kitūkijetyima akyo kishinikanga bukidi bonka pa kyaba kya kutama. Bilomba kulonga bukomo pa kusaka’mba kikale kitama nyeke.”
Le ubwanya kulombola kitūkijetyima namani?
Shi mwanda wa kibozo ubatūla kitūkijetyima kyobe pa ditompo.
Kimfwa: Obe mulume nansha obe mukaji wakunena kintu kisansa. Mutyima ubakutonona nobe unene’nka kintu kisansa.
Musoñanya wa mu Bible: “Kokapēlakana kuloba, mwanda bulobo i kiyukeno kya bulembakane.”—Musapudi 7:9, kunshi kwa dyani.
Mwa kulombwela kitūkijetyima: Tūkanya. Kumeso kwa kulondolola, tompa kulanga’mba kyalengeja obe mulume nansha obe mukaji akusanshije i kintu kingi, kakukolomwenepo ku kusaka. Dibuku Kulwila Busongi Bwenu dinena’mba: “Bavule motudi tuloñanga bintu mungya byotufwatakanya pa byobya binene muntu kupita’ko byobya bine byaadi usaka kunena.”
Nansha shi mwinē pobe wadi usaka kukukolomona, kulombola kitūkijetyima na kuleka kujokeja kinongo kukokeja kutyepeja’ko lupotopoto kupita’ko kuvudija’lo. Bible unena’mba: “Kokwa kekudipo nkuni, mudilo ubulanga.”—Nkindi 26:20.
“Shi mutyima keukutonona kumona obe mukaji bu kinkwa, imana kadi langa kine kyomuswelele, ponka’po tompa kumulongela kintu kiyampe.”—Ethan.
Languluka’po:
Le uloñanga namani shi mwinē pobe wanena nansha kulonga kintu kibi?
Le ukalombola namani kitūkijetyima kikatampe shi walonga namino dikwabo?
Shi mwanda wa bukile bukya ubatūla kitūkijetyima kyobe pa ditompo.
Kimfwa: Obe mulume nansha obe mukaji ulondelanga nyeke, ukulengeja nobe wilaije, ne kukukwatyija nsungu.
Musoñanya wa mu Bible: “Endelelai kwitūkijija mityima banwe bene na bene ne kwilekela na mutyima umo.”—Bene Kolose 3:13.
Mwa kulombwela kitūkijetyima: Tompa kutangidija tumweno twa busongi bwenu kumeso kwa tumweno tobe. Wiipangule amba, ‘Le kwikala na kōminija pa uno mwanda kusa kukwasha busongi bwetu’ni kusa kwibupomona?’ Ne kadi, vuluka’mba “batwe bonso tukukalanga divule dine.” (Yakoba 3:2) Ko kunena’mba nobe udi na bivule bya kwilemununa.
“Kyaba kimo ntūkijijanga bininge mutyima mulunda kupita’ko wami mulume. Monangila i mwanda mpityijanga kitatyi kivule na wami mulume ne kumona bilubo byandi. Ino kitūkijetyima kibadilwa mu ngikadila ya buswe—nanshi kidi na mvubu mu busongi bwami.”—Nia.
Languluka’po:
Le utūkijijanga mwinē pobe mutyima pa bilubo byandi?
Le ukokeja kulombola kitūkijetyima kikatampe namani mafuku a kumeso?