Bukwashi bwa mu Bitatyi bya Bimpengele mu 2021—Ketukelapo Batutu ne Bakaka

Mu mwaka wa mingiloa wa 2021, ntanda yadi yendelela na kubinza pa mwanda wa kipupo kya Corona. Monka mokilombwedilwe mu kishinte kinena’mba, “Bukwashi bwa Ntanda Yonso mu Kipupo kya Ntanda Yonso,” twi balupule madolalab midiyo ne midiyo mwanda wa kuleta bukwashi ne kubunda Makomite 950 ne kupita a Bukwashi mu Bitatyi bya Bimpengele.

Kadi, padi pakidi kipupo na bukomo, batutu ne bakaka ba ntanda yonso baponenwe na bimpengele bya kipangila ne biletwa na bantu. Mwanda wa kuleta bukwashi mu kitatyi kya bimpengele 200 ne kupita byalongekele, Komite wa Bakwatakani wa Kitango Kyendeji waitabije kulupulwe madolala midiyo 8, kutentekela pa bukwashi bwa ku kipupo kya Corona. Talai byabuntu byenu mobyakwashishe ku bimpengele bibidi byalongekele panopano.

Kulasa kwa Mudilo kwa Lūlu lwa Nyiragongo

Mu mafuku 22 Kweji 5, 2021, lūlu lulasa mudilo lwa Nyiragongo, mu République démocratique du Congo, lwashilwile kulasa mudilo. Bitoto bya mudilo (lave) byadi bilupuka’ko, byaonene mobo, masomo, ne bibīko bya mema. Inoko, kekwadipo enka kyaka kya bino bitoto bya mudilo. Mafuku kampanda pa kupita’po, luvumbi lubi lutamba ku lūlu lulasa mudilo lwayudile mu kibundi kya Goma, kadi kwaikele kutenkana kuvule kwa nshi. Bekadi bavule ba mu kino kibundi bebasoñenye kutamba’mo. Bantu tununu tutwa na tutwa banyemene, bamo baenda mu Rwanda.

Mu bano bantu banyemene, mwadi kintu kya Batumoni ba Yehova 5 000. Bamo bajimije mobo abo mwanda wa lūlu lwalashile mudilo; bakwabo nabo bakebebile bintu mu mobo abo pobanyemene. Makomite a bukwashi a mu Rwanda ne mu République démocratique du Congo, aingidile pamo mwanda wa kuleta bukwashi. Musambo wa Congo (Kinshasa) wanenene pa mwanda utala komite umo wa bukwashi amba: “Nansha ngikadilo byoyadi mibi mpata mu kibundi, ne musoñanya wa kunena bantu batambe mu kibundi kewaletelwe, komite wa bukwashi wadi ke mushilule kwabanya byakudya, mema, bya kwipūta, ne bivwalwa.” Mu kibundi kimo mwebungīle banabetu 2000 ne kupita, komite wa bukwashi washimikile’mo mapema, waabanya maske ne kushintulwila banabetu muswelo wa kwikinga ku misongo ya Corona ne kolela.

Mu myeji isatu tamba palongekele kino kimpengele, banabetu baabenye matone asamba ne kupita a mutyele, matone asamba a bukula bwa mataba, matone asatu a mañi a kutēkela, ne matone asatu a mema. Mwanda wa kulea lupeto, musambo wapotele byakudya bivule enka mu yabo ntanda pa kyaba kya kupota bya bei bininge mu ntanda-bene.

Kaka umo wa njibo yadi ikitamba mu kūbakwa, mine yaonenwe na kino kimpengele unena’mba, “twadi na bulanda bukatampe ne kutyumukwa mutyima.” Inoko kisaka kyandi pa kutambula bukwashi bwa ku ngitu ne bwa ku mushipiditu, wanena’mba: “Na bukwashi bwa Yehova, tudi na byotusakilwa. Tubamone amba Yehova wetwangula’ko kiselwa ne kwitupēleleja’kyo.”

Kukoma kwa Misokwe mu Venezuela

Pano kepadi myaka mivule, mu Venezuela mudi kukoma kwa misokwe. Banabetu badi mu būmi bukomo, byakudya bityetye, ne kuvula kwa butapani. Inoko bulongolodi bwa Yehova kebwibelelepo.

Mu mwaka wa mingilo upityile’u, twaingidije madolala 1 500 000 mwanda wa kupota ne kufutyila byakudya ne masabuni mwanda wa kukwasha bisaka byadi bisakilwa bukwashi. Musambo wa mu Venezuela unena’mba: “Ke bipēlapo kufutyila matone 130 a byakudya ku mitamba yonso iná ya ntanda ya Venezuela kweji ne kweji, ne kupa’byo banabetu basakilwa bukwashi.” Mwanda wa byakudya kebyakabola, divule banabetu batumanga byobya bikidi na mafuku mavule pa kusaka’mba bibole.” Musambo ubweja’ko amba: “Tupotanga byakudya bivule mu kitatyi kya mwangulo pobitūkile bei. Kupwa twebifutyila ku byendwa-nabyo kebilombepo lupeto luvule.”

Leonel, tutu wa mu Komite wa Bukwashi mu Venezuela, usenswe uno mwingilo. Unena’mba: “Mwingilo wa kuleta bukwashi i wa pa bula. Uno mwingilo i munkankamike bininge tamba pafwile wami mukaji muswe na misongo ya Corona. Ne muvudilwe bya kulonga kadi nemonanga bu wa kamweno ku banabetu basakilwa bukwashi. Ne mwimwene muswelo ufikidija Yehova mulao wandi wa amba kakelapo bantu bandi.”

Tutu umo waingile ne mu komite wa bukwashi mafuku kunyuma, wanenene pa kupwa kutambula bukwashi amba: “Pano ami nami ye wadi kasakilwa bukwashi. Ketwatambwilepo enka bukwashi bwa ku ngitu. Batutu betukweshe ami ne wami mukaji tutūkije mutyima. Badi betute mutyima, betusenga, ne kwitukankamika.”

Bimpengele bimo bilongekanga ke badyumune bantu mu kitatyi kityetye, padi ne kwibadyumuna kwine mpika. Inoko divule dine, bulongolodi bwa Yehova bubwanyanga kutambula ne kutuma bukwashi bukidibukidi, kupityila ku byabuntu byenu bya kukwatakanya mwingilo wa ntanda yonso. Miswelo imoimo yobwanya kutūdila’ko byabuntu, i milombolwe pa donate.jw.org. Twimufwija’ko pa buntu bwenu.