Budimi Bulumbuluke

TALA’PO ino ntanda! Bintu byonso bidi’po i biyampe kutabuka! Tala’po bidi biyombo ne mityi, maluba ne banyema bonso. Lelo ukokeja kufunka banzovu ne bantambo?

Lelo buno budimi bulumbuluke bwāikele’ko namani? Eyo, tutalei mwālongolwedile Leza ntanda pa mwanda wetu.

Dibajinji, Leza wāpangile biyombo mwanda wa kuvwika ntanda. Kadi wāpanga miswelo yonso ya bimuna ne munamuna ne mityi. Bino byonso bineñenyanga ntanda. Ino bikwashanga kadi ne ku myanda mikwabo. Bivule umbukata mwabyo bitupanga bidibwa bitobala biyampe.

Kadi Leza wāpangile mishipa inanga mu mema ne byoni bitumbuka mūlu. Wāpangile bambwa ne bapushi ne bampunda; banyema bakatampe ne batyetye. Lelo i banyema’ka bekalanga kubwipi na kwenu? Mwene tufwaninwe kusangala pa kuyuka’mba Leza wāpangile bino byonso pa mwanda wetu?

Ku mfulo, Leza wāteakanya kipindi kimo kya ntanda mu muswelo mwishile. Wāita’kyo bu budimi bwa Edena. Bwādi bulumbuluke. Bintu byonso byādi’mo byādi bilumbuluke. Kadi Leza wāsakile ntanda yonso ikale miyampe enka bwa buno budimi bwaāpangile.

Ino tala monka kifwatulo kya buno budimi. Lelo uyukile kintu kyāmwene Leza amba i mutupu’kyo? Tutale shi i kika.