Nsakwa ya Yediko

I KIKA kyaponeja ino nsakwa ya Yediko? Idi’nka bwa myaswe bombe ya mushindo mukomo. Inoko mu oa mafuku kebādipo na mabombe nansha na mata mene. Kino i kingelengele kikwabo kya Yehova! Twifundei bidi mobyāfikile.

Teja byobanena Yoshua kudi Yehova: ‘Abe ne bantu ba bulwi bobe mukajokoloka kibundi. Mukajokoloka musunsa umo pa difuku umbula bwa mafuku asamba. Selai ne dikumbo dya kipwano. Babitobo basamba-babidi bafwaninwe kutangidila kumeso ne kwīla bimpungidi byabo.

‘Mu difuku dya busamba-bubidi mukajokoloka kibundi misunsa isamba-ibidi. Kupwa mukavumija bimpungidi na mulenga, kadi muntu yense ukela lwanji lwa bulwi. Ne nsakwa ikapona na mushindo!’

Penepo Yoshua ne bantu abalonga byebanena Yehova. Abajokoloka kitalala-kinya. Kutupu muntu unena. Enka mawi a bimpungidi ne mitūtu ya binyantyilo ye emvwanikwa. Balwana na bantu ba Leza badi mu Yediko abazakala. Lelo umwene monji utyila uyela pa dididisha uno? Dididisha’di i dya njibo ya ani? Bine, Lehaba walongela monka mwamulombwedile batubedibedi babidi. Kisaka kyandi kyonso kidi munda kibandila nandi pamo.

Ku mfulo, mu difuku dya busamba-bubidi, kupwa kujokoloka kibundi misunsa isamba-ibidi, bimpungidi bibavuma, bantu ba bulwi abatūta kyungwe, ne nsakwa ibapone. Penepo Yoshua wanena’mba: ‘Ipayai muntu yense udi mu kibundi kadi sokai’kyo. Sokai kintu kyo-kyonso. Lekai’nka ndalama, nsahabu (olo), mikuba ne bilonda (byuma), letai’byo mu bya bulēme bya kipema kya Yehova.’

Yoshua wanena batubedibedi babidi’ba’mba: ‘Twelai mu njibo ya Lehaba, mulupulei’mo, ne kisaka kyandi.’ Lehaba ne kisaka kyandi abapande enka na mwekilaile batubedibedi.