Lelo I Kika Kikulupile Ba Tumoni Twa Yehova?

“Tusaka kwivwana molangila, mwanda tuyukile’mba kino kitango kyomulameteko kino kipelwanga konsololo.” (Bilongwa 28:​22, La Bible en français courant). Bano bakulumpe baumbukata mwa baYuda ba ku Loma, baletele kimfwa kilumbuluke mu myaka katwa imbajinji. Bādi basaka kwiivwanina abo bene kunsulo, kupitako kukulupila ku mifutululo ya bantu bapanja.

Yemokikadile ne dyalelo, ba Tumoni twa Yehova bafutululwanga pavule, ne kikekala kilubo kukakimba kuyukidija bubinebine bwibatala ku bantu bobasopeje kala na ba Tumoni. Tudi na sangaji mikatampe ya kusaka kwimushintulwila nkulupilo yetu imo imo mikatampe.

Bibula, Yesu ne Leza

Tukulupile’mba “Bisonekwa byonso byasonekelwe na mushipiditu wa Leza ne i byakamweno”. (2 Temote 3:​16, MN.) Nansha bifwatakanya bamo’mba ketudipo bene-kidishitu, bine bino byobanena i bya bubela. Twibakwatañane pamo na bukamoni bwa mutumibwa Petelo, bwāsapwile butala padi Yesu amba: “Mutupu dijina dikwabo dipebwe ku bantu mo tuswa kukapandila” ​—⁠ Bilongwa 4:⁠12.

Inoko, ka namwanenene Yesu aye mwine’mba “Ndi Mwana Leza” ne amba ‘Tata wauntumine’, ba Tumoni twa Yehova bakulupile’mba Leza imukatampe kutabuka Yesu (Yoano 10:36; 6:57). Yesu aye mwine wekitabije’mba: “Ke-muntu aye Tata untabukile bukata.” (Yoano 14:28; 8:28). Omwanda ketukulupilepo’mba Yesu udingakene pamo na Tata, mwendele lufundisho lwa Busatu-busantu. Ino, tukulupile’mba wapangilwe na Leza ne imutyetye kudi aye.​—⁠ Bene Kolose 1:15; 1 Kodinda 11:⁠3.

Mu Kiluba, dijina dya Leza i Yehova. Bibula unena’mba: “Amba bayuke’mba, abe enka, wa dijina dya bu YEHOVA, wi Mwinemukatakatamwine panopantanda ponsololo.” (Ñimboyamitoto 83:18) Kukwatañana na kino kinenwa, Yesu wesambīle bininge pa dijina dya Leza, na kufundisha bandi bana-babwanga balombele’mba: “Abe Tata wa mūlu, dijina dyobe dijile kijila!” Ne aye mwine walombēle kudi Leza’mba: “Nasokwela dijina dyobe ku bano bantu bo watukwine panopantanda waumpa.” ​—⁠ Mateo 6:9; Yoano 17:⁠6.

Ba Tumoni twa Yehova bakulupile’mba bafwaninwe kumwiula Yesu na kuyukija ku bantu bakwabo dijina ne mpango ya Leza. Shipo, twibasele dijina dya bu Tumoni twa Yehova, ke-pantu tumwiulanga Yesu, “Kamoni ka binebine”. Kusokwelwa 1:5; 3:14.) Omwanda Isaya (43:10) wisambila namino pa muzo upelwe mwingilo wa kuyukanya Leza’mba: “E mwanenena Yehova namino amba: ‘Banwe mwi bami ba tumoni ne mwingidi wami onatonga’.”

Bulopwe bwa Leza

Yesu wafundishe bandi bana-babwanga balombele’mba: “Bulopwe bobe bufike!”, ne Bulopwe bwaikele kishinte kibajinji mu bufundishi bwandi (Mateo 6:10; Luka 4:43). Ba Tumoni twa Yehova bakulupile’mba Bulopwe i umbikalo wabine wa kokwa kūlu, bukabikalanga pano pantanda ne Yesu ye Mulopwe wabo wampikilwa kumweka. Bibula unena’mba: “Buledi bwa ntanda bukekalanga pa kipuji kyandi. Ntumbo ya bubikadi bwandi ne ya ndoe kekukekalapo mfulo.” ​—⁠ Isaya 9:​6,7.

Ino Yesu Kidishitu kakekalangapo kasuku kandi Mulopwe wa Umbikalo wa Leza. Bakamutentekelangapo balopwe bavule kokwa kūlu. Mutumibwa Polo wasonekele’mba: “Shi tukankamanine monka, nabya tukabikalanga nandi pamo.” (2 Temote 2:12). Kukwatañana na Bibula bantu basanguka mwanda wa kukabikala pamo na Kidishitu momwa mūlu i 144 000 kete bapotelwe panopanshi.” ​—⁠ Kusokwelwa 14:​1, 3.

Eyo, bulopwe bonso bufwaninwe kwikala ne na bantu babikelwe; ba Tumoni twa Yehova bakulupile’mba kutalulamo bano balopwe bakokwa kūlu, kudi tununu ne tununu twa bantu bakwabo bakamona bumi bwanyeke. Pakekala ntanda ke Paladisa, ikashikatwanga na bano bantu bakaludikwa na bulopwe bwa Leza, bonso bakokēle nyeke ku umbikalo wa Kidishitu ne wa boba bakabikala pamo nandi. Kabidi ba Tumoni twa Yehova bakulupile na bubinebine’mba ntanda ke ikonakanyibwangapo ne uno mulao wa mu Bibula ukafikidilanga: “Boloke bakapyananga ntanda, ne kwikala monka nyeke.” ​—⁠ Ñimboyamitoto 37:29; 104:⁠5.

Ino lelo Bulopwe bwa Leza bukayanga muswelo’ka? Lelo i na kukokela kwa bantu bonso ku Umbikalo wa Leza na kusaka kwa abo bene? Mhm, ke-pantu Bibula wikilombwedidilanga’tu patoka’mba kwiya kwa Bulopwe kukemanina pa kino: Leza ukalongolola myanda yonso ikambakanya bantu pano pantanda. Unena’mba: “Leza wa mūlu ukemika bulopwe kebukonakanyibwapo nansha patyetye pene. (...) Ino “bukatyumuna bipindibipindi ne kukubija malopwe ano’a onsololo, kadi bukemananga nyeke.” ​—⁠ Danyele 2:⁠44.

Lelo Bulopwe bwa Leza bukayanga kitatyi’ka? Kukwatañana na bupolofeto bwa Mukanda Ukola bufikidila mu ano mafuku, ba Tumoni twa Yehova bakulupile’mba kwiya kwabo kubafwena. Tubemwite mubandaule bupolofeto bumo bumo bulombola ngikadilo ya “mafuku amfulo” ya ino ngikadilo ya bintu. Butanwa mu Mateo 24:​3-14; Luka 21:​7-13, 25-31; 2 Temote 3:​1-5.

Mwanda ‘tusenswe Yehova Leza wetu, na mutyima wetu onso, na muya wetu onso, na ñeni yetu yonso ne na bukomo bwetu bonso ne mwanda tusenswe bakwetu pamo na batwe bene’, ketwisañunangapo, shi pamwanda wa lukoba, shi pamwanda wa ludimi nansha ke pamwanda wa ngikadilo ya umbumi mine. (Mako 12:​30, 31). Twibayukane pamwanda wa kisanso kyotudi nakyo umbukata mwa bana-betu ba mizo yonso (Yoano 13:35; 1 Yoano 3:​10-12). Omwanda ketwikujangapo mu myanda ya mapolotike ya ino mizo. Twielelangako twiule bana-babwanga babajinji ba Yesu, baanene’mba: “Kebadipo bwa bapantanda, ehe, enka monkikadile amiwa bu-wapanopantanda.” (Yoano 17:16). Tukulupile’mba kwisansanya na bya ino ntanda i kuleka kulonga bubi, bulongwa na bonso dyalele, butala pa bubela, bwivi, busekese, makoji, kwilala kwilālā bantu ba ngitu imo, kwingidija mashi mudishinda dibi, kutota bankishi ne bintu bikwabo bikandilwe mu Bibula. ​—⁠1 Kodinda 6:​9-11; Efisesa 5:​3-5; Bilongwa 15:​28, 29.

Lukulupilo lwa mafuku akaya kumeso

Ba Tumoni twa Yehova bakulupile’mba byonso kebifudilangapo pa buno bumi. Bakulupile’mba Yehova watumine Kidishitu pano pantanda amwange andi mashi ke kinkulwa mwanda wa bantu bamweke bu boloke kumpala ya Leza ne batambule bumi bwa nyeke mu ngikadilo impya ya bintu. Ye mwekinenene mwana wanga umo wa Yesu amba: “Pano tubabalwa bu boloke kupityila mu mashi andi.” (Bene Loma 5:9; Mateo 20:28). Ba Tumoni twa Yehova balombolanga kufwijako kwabo kudi Leza ne wandi Mwana pamwanda wa kino kinkulwa kitusawila dishinda dya bumi bukaya kumeso.

Ba Tumoni twa Yehova bakulupile na bubinebine mu bumi bukaya kumeso kupityila ku lusangukilo lwa bafu munshi mwa Bulopwe bwa Leza. Bakulupile kukwatañana na mufundijija Bibula amba shi muntu wafu, kakidikopo ne enka “Mu dyodya difuku dimo dyonka mifwatakanyo yandi ibaoneka.”(Ñimboyamitoto 146:​3, 4; Ezekyele 18:4; Musapudi 9:⁠5.) Eyo, bafwe bakamonanga bumi, ke-pantu Yehova ukebavulukanga ne ukebasangula. ​—⁠ Yoano 5: 28, 29.

Ino ba Tumoni twa Yehova ibakulupile’mba bantu bavule badiko dyalelo bakapitanga bomi pakonakanya Bulopwe bwa Leza malopwe onso adiko dyalelo; bakendelela na kwikalako nyeke mu ntanda ikasubulwa, pamo’nka na mwapandile Noa ne kisaka kyandi ku dilobe (Mateo 24:​36-39; 2 Petelo 3:​5-7, 13). Bakulupile’mba buno bukudi bukatala pa kulemeka misoñanya ya Yehova, na mwikilombwela Bibula: “Ntanda ipitanga (...), ino yewa ulonga kiswamutyima kya Leza, ukaladila nyeke ne nyeke.” ​—⁠ 1 Yoano 2:​17, MN; Ñimboyamitoto 37:11; Kusokwelwa 7:​9, 13-15; 21:​1-5.

Uketabija’mba bine ikikomo kupituluka pa luno lupapule mu nkulupilo yonso ya ba Tumoni twa Yehova. Omwanda tubemulombe mupime kwibakimba muyukidije senene mobekadile.

[Blurb on page 4]

Twibasele dijina dya bu Tumoni twa Yehova, ke-pantu tumwiulanga Yesu