Shapita 11

Yoano Ulongolola Dishinda

TAMBA popa pakidi Yesu na myaka dikumi ne ibidi, wipangula bafundiji mu tempelo, ke papite myaka dikumi ne isamba-ibidi. I ku muketeko wa mvula wa mwaka wa 29 K.K., kimweka bu muntu yense wisambilanga padi Yoano mwanabo na Yesu, inoko wa munda mungi, wenda usapula mu bibundi byonso bidi kubwipi na Munonga wa Yodano.

Yoano i mwana-mulume utulumukwa, ku mumwekelo ne ku muneneno. Bivwalwa byandi i bya moya a ngamedia, wikutyile kikaya kya kiseba mu kifuka. Bidibwa byandi i banjie ne būki bwa mu ntanda. Lelo musapu wandi nao? “Alamukai pa mutyima, mwanda Bulopwe bwa mu madiulu bubafwena.” (MB)

Uno musapu ukoka bemvwaniki bandi. Bavule abeyuka amba bafwaninwe kwalamuka pa mutyima, ko kunena amba, kwalamuna mikadilo yabo ne kupela miendelejo ya mu būmi yobādi nayo pa kala, mwanda keinengelepo. Bantu bavule, batamba ku mitamba yonso ya Yodano ne ku Yelusalema kwine, abaiya kwitaba Yoano, nandi wibabatyija, wibatokenya mu mema a Yodano. Mwanda waka?

Yoano ubatyija bantu bu kyelekejo kya kwitabija kwabo kwa kwisāsa na mutyima umo bubi bwa kujilula kipwano kya Bijila bya Leza. Ebiya Bafadiseo ne Basadusea bamobamo nabo abaiya ku Yodano, Yoano kaebatopeka. ‘Banwe lutundu lwa banyoka,’ ye aye unena. ‘Pai bidi bipa bilombola kwalamuka pa mutyima, kemwakefwatakenyai banwe bene amba mwanda’po Abalahama i mukulutuba wetu. Ke-pantu ami nemusapwila, Leza ukokeja kwalamuna mabwe ano’a ke bana ba Abalahama. Pano kasolwa kadi kala pa muji wa mutyi. Mityi yonso yampikwa kupa bipa bilumbuluke ikatetwanga ne kwelwa mu mudilo.’

Bayuda pa kumona bibumbo bitūtyikila kudi Yoano, abatume babitobo ne bene Levi kwadi. Bano’ba kebamwipangula amba: “Lelo abe wi ani?”

“Amiwa nkidipo Kidishitu,” ye Yoano wibasapwila.

“Lelo kadi i namani?” bo abo bamwipanguja. “Wi Ediya abewa’ni?”

Aye webalondolola’mba: “Mhm.”

“Lelo abe wi yewa mupolofeto’ni?”

“Ehe.”

Po pene kebamuningila: “Le wi ani le nanshi? Kukitusapwila, tuyūke mwakukashintulwila ku betutumine? Lelo witelanga namani abe mwine?”

Yoano washintulula’mba: “Amiwa ne diwi dyela lubila muntanda mutuputupu, amba: Ololai dishinda dya Yehova monka mwānenene mupolofeto Isaya.”

“Le penepo kadi, i bika byōbatyi[ji]ja,” bo abo bamwipanguja, “aku kudi[po] Kidishitu, nansha bu-Ediya, nansha yewa mupolofeto mwine?”

Nandi walondolola’mba: “Ami mbatyijanga mu mema, nanshi mubukata mwenu umbaimana umo o kemuyūkile. I yenka unonda munyuma.”

Papo Yoano ulongolola dishinda amba bantu bekale na mutyima wa kwitabija Meshiasa, usa kubikala ke Mulopwe. Yoano unena pa mwanda Wandi amba: ‘Yewa wiya kunyuma kwami i muntabuke bukomo, onkifwaninwepo nansha kuvūla bikwabilo.’ Ebiya, Yoano wanena kadi amba: “Unonda kunyuma kwami i muleme kuntabuka, mwanda aye wadi’ko ne kungalwilo, ami nkyaikele’ko.” (MB)

Nanshi musapu wa Yoano, wa amba “Bulopwe bwa mu madiulu bubafwena,” (MB) ko kayukeno kalombola patōka amba mwingilo wa Yesu Kidishitu, Mulopwe utongelwe na Yehova, keudi kubwipi na kushilula. Yoano 1:6-8, 15-28; Mateo 3:1-12; Luka 3:1-18; Bilongwa 19:4.

▪ Yoano i muntu wa muswelo’ka?

▪ Mwanda waka Yoano ubatyija bantu?

▪ Mwanda waka Yoano unena amba bulopwe bwa Leza bubafwena?