Yoano Ulongolola Dishinda

Yoano, mwanā ba Zekadia ne Edisabeta, paātamine wāikele ke mupolofeto. Yehova wātumine Yoano afundije bantu amba Meshiasa yao wiya. Ino Yoano, pa kyaba kya kukafundija mu mashinankonka nansha mu bibundi bikatampe, aye wākasapwile mu ntanda mutuputupu. Bantu bātambile ku Yelusalema ne mu Yudea monso mwanda wa kwiya kufundijibwa na Yoano. Yoano wēbafundije amba shi musaka kusangaja Leza, lekai kulonga bintu bibi. Bantu pa kupwa kuteja Yoano, bavule bēsāshile bubi bwabo, Yoano nandi wēbabatyija mu Munonga wa Yodano.

Yoano kādipo na bintu bivule. Wādi uvwala bivwalwa bipungwe na myoya ya bangamedia, kadi wādi udya enka batēte ne būki bwa mu ntanda. Bantu bādi basaka kuyuka myanda ya Yoano. Enka ne Bafadiseo ne Basadusea ba mitatulo, bāile kwimona nandi. Yoano wēbasapwila’mba: ‘Mufwaninwe kushinta ngikadila yenu ne kwisāsa. Kemwakilangai amba mwi beshile na bantu bakwabo mwanda’po’tu mwitelanga bu bana ba Abalahama. Ke kunenapo amba mwi bana ba Leza.’

Bantu bavule bāendele kudi Yoano, kēbamwipangula’mba: ‘Le i bika byotufwaninwe kulonga pa kusangaja Leza?’ Yoano wāsapwila Bayuda amba: ‘Shi udi na makotyi abidi, ino mukwenu aye kadipo na kotyi, mupe’ko umo.’ Le uyukile mwanda waka Yoano wānenene namino? Wādi usaka ne bandi bana ba bwanga bayuke amba pa kusangaja Leza, bafwaninwe bidi kusanswa bantu.

Yoano wāsapwidile basonkeji ba musonko amba: ‘Ikalai ba binebine kadi kemwakidimbai muntu nansha umo.’ Wāsapwidile ne basola amba: ‘Kemwakitabijai kuketwa milomo nansha kubepa bubela.’

Babitobo ne bene Levi nabo bāendele kudi Yoano, bāmwipangula’mba: ‘Le wi ani? Bantu bonso bakimbanga kukuyuka.’ Yoano wēbalondolola’mba: ‘Amiwa ne diwi mu ntanda mutuputupu, ntwalanga bantu kudi Yehova, monka mwālaile’kyo Isaya.’

Bantu bāsangedile byēbafundije Yoano. Bavule kebēipangula shi Yoano ye Meshiasa. Inoko Yoano wēbasapwila’mba: ‘Muntu mukatampe bininge yao wiya. Nkifwaninwepo nansha kumuvūla bilato byandi. Ami mbatyijanga na mema, inoko aye ukabatyija na mushipiditu ujila.’