Yesu Waikala Ke Meshiasa

Yoano wādi usapula’mba: ‘Muntu untabukile ami bukata yao wiya.’ Yesu paābwenye myaka isenselela ku 30, wātambile ku Ngadilea wāenda ku Munonga wa Yodano, kwādi Yoano ubatyija bantu. Yesu wānenene Yoano amubatyije, ino Yoano wāmunena’mba: ‘Ami nkifwaninwepo kukubatyija abe. Abe’ko ye ufwaninwe nkumbatyija ami.’ Yesu wāsapwila Yoano amba: ‘Yehova usaka abewa umbatyije.’ Ebiya bātūkila mu Munonga wa Yodano, Yoano wātokenya Yesu mu mema aye yense.

Yesu uvubuka’tu mu mema, wālombela. Ponka’pa, madiulu āshituka, ne mushipiditu wa Leza wāmutūkila pamo bwa nkunda. Ebiya Yehova wānena aye mūlu amba: “Abe wi wami Mwana, muswedibwe; nakuloelelwa.”

Mushipiditu wa Yehova pa kutūkila Yesu, wāikala ke Kidishitu, nansha’mba Meshiasa. Pano wāshilwile kwingila mwingilo wāmutumīne Yehova pano pa ntanda.

Yesu pa kupwa’tu kubatyijibwa, wāendele mu ntanda mutuputupu wākalonga’mo mafuku 40. Paājokele, wāendele kukemona na Yoano. Yoano pa kumona Yesu wiya kwadi, wānena’mba: ‘Kano i Kana ka Mukōko ka Leza kakatalula bubi bwa ino ntanda.’ Yoano pa kunena bino binenwa, wālombwele bantu bayuke amba Yesu ye Meshiasa. Le uyukile byātene Yesu mu ntanda mutuputupu? Leka tutale’byo.