Shapita 12

Kubatyijibwa kwa Yesu

KEPADI kubwipi kwa myeji isamba tamba pashilwile Yoano kusapula, Yesu nandi pano kadi na myaka 30, waiya kudi aye ku Yodano. Mwanda waka? Lelo i mwanda wa kumunangila’ni? Nansha Yesu usaka’tu kumona mwendela mwingilo wa Yoano? Ehe, Yesu ulomba Yoano amubatyije.

Ponka’po Yoano wapele amba: “Mhm, amiko ye ufwaninwe kubatyijibwa na abe. Ino abe kadi wikale kwiya kudi ami?” Yoano uyukile amba Yesu, mwanabo wa munda mungi, i Mwana wa pa bula wa Leza. Po pa mwanda mwine wātumbukile Yoano na nsangaji paākidi munda mwa inandi, pāendele Madia kukebapempula, aye papo na dimi dya Yesu! Edisabeta, inandya Yoano, kābudilwepo kumusapwila uno mwanda mwenda mafuku. Pakwabo kadi wāmusapwidile ne lusango lwa mwikeulu wāletele musapu wa kubutulwa kwa Yesu, ne lwa bamwikeulu bāmwekēle bakumbi mu bufuku bwābutwilwe Yesu.

O mwanda Yesu ke mwenipo kudi Yoano. Aye Yoano uyukile amba lubatyijo lwandi kelufwaninwepo Yesu. I lwa boba besāsa bubi bwabo, ino Yesu i wampikwa bubi. Ino nansha byapela Yoano, Yesu wamuningila’mba: “Leka bidi nanshi ke-kintu kibetufwaninwa tufikije byonso byakoloka.”

Mwanda waka i kyendele’mo Yesu abatyijibwe? Mwanda kubatyijibwa kwa Yesu i kyelekejo kya kwipāna aye mwine mwanda wa kulonga kiswamutyima kya Shandi, ke kwa kwisāsapo bubi. Yesu wakidi sendwe wa mbao, pano kitatyi kibabwana kya aye kushilula mwingilo wamutumīne Yehova Leza pano pantanda. Lelo molangila Yoano kayukilepo amba kusa kulongeka kintu kampanda kyeni kitatyi kyasa kubatyija Yesu?

Eyo, mwenda mafuku, Yoano usa kusekununa’mba: “Nanshi wantumine kubatyijija mu mema uno aye waundaīle’mba: Ku o wakamona [m]ushipiditu utūka ne kumutumba pādi, nabya e yenka’ye wakubatyijija mu [m]ushipiditu [s]andu.” Papo Yoano utengele kumona mushipiditu wa Leza utūkila pa muntu kampanda wabatyija. Kekubulwe padi Yoano kabezemukilepo mpata, pa kuvubuka kwa Yesu mu mema, wamone ‘mushipiditu utūka mūlu bwa nkunda, uwamutentama.’

Kudi myanda mikwabo yalongeka kitatyi kyabatyijibwa Yesu. “Diulu dyamujikukila.” Kino kishintulula namani? Kishintulula amba paadi ubatyijibwa, wavuluka būmi bwaādi nabo momwa mūlu kumeso kwa kwiya’ye pano pantanda. Ebiya pano, Yesu wadi wavuluka būmi bwaādi nabo bu mwana wa kumushipiditu wa Yehova Leza, kubadila’mo ne bintu byonso byāmusapwidile Leza paākidi mūlu kumeso kwa kwiya’ye pano pantanda.

Kadi, kitatyi kya kubatyijibwa kwandi, diwi dibatambe mūlu kedinena’mba: “Uno [ye] wami Mwana wakuswedibwa o ntōkelwe pa mutyima.” Lelo dino diwi i dya ani? Le i dya Yesu aye mwine? Ehe, ke dyandipo! I dya Leza. Kino kibalombola patōka amba Yesu i Mwanā Leza, ino ke Lezapo mwine pamo na mufwatakenyanga bantu bavule.

Inoko Yesu i mwanā Leza, muntu pamo’nka na mwādi mwikadile Adama, muntu umbajinji. Mwana-wabwanga Luka, pa kupwa kulombola mwapityila kubatyijibwa kwa Yesu, wasoneka amba: ‘Yesu wadi kadi ne myaka pabwipi ne makumi asatu paalwile mingilo yandi. Bantu badi balanga’mba: I mwana mwana-mulume wa Yosefa mwanā Hedi, . . . mwanā Davida, . . . mwanā Abalahama, . . . mwanā Noa, . . . mwanā Adama, mwanā Leza.’

Monka mwādi mwikadile Adama ‘mwanā Leza,’ ne Yesu nandi mo monka. Yesu ye muntu mukatakata wa kasha ne kashele, monka motukebijingulwila pa kwenda kubandaula būmi bwandi. Inoko, kitatyi kya kubatyijibwa kwandi, Yesu wasamba kipwano kipya na Leza, waikala ke Mwana wa kumushipiditu wa Leza. Pano Leza umwita ajokele mūlu, na kumushilwija būmi bukamutwala ku kupāna lonso būmi bwandi bwa bu muntu, bu kitapwa pa mwanda wa bantu babipya-mambo. Mateo 3:13-17; Luka 3:21-38; 1:34-36, 44; 2:10-14; Yoano 1:32-34; Bahebelu 10:5-9.

▪ Mwanda waka Yesu ke mwenipo kudi Yoano?

▪ Yesu byakalongele bubi, mwanda waka wabatyijibwa?

▪ I myanda’ka itala padi Yesu iyukile Yoano, ne mwanda waka bimweka bu kabezemukilepo pa kumona mushipiditu wa Leza utūkila Yesu?