Shapita 21

Yesu mu Shinakoka ya mu Kyabo Kibundi

PAMPIKWA kwalakana, mu Nazala mudi kwisakanya, mwanda Yesu wajokela mwabo. Yesu wadi uyukene bu sendwe wa mbao kumeso kwa kukabatyijibwa’ye na Yoano, kepadi kintu kya mwaka mutuntulu ne kipindi. Ino pano wayukana pi na pi bu mulongi wa bingelengele. Ba kibundi batengele kumumona ulonga mingilo imoimo yakutendelwa umbukata mwabo.

Pa kumona Yesu wenda ku shinakoka, mwendele kibidiji kyandi, po pene mityima yabo keidi’nka kūlu. Mu kitatyi kya kupwila, waimana mwanda wa kutanga, abamupe muvungo wa mupolofeto Isaya. Wavungulula popa pobanene myanda ya Mushingwe māni a mushipiditu wa Yehova, mu wetu Bible dyalelo i shapita wa 61.

Yesu wapu kutanga mukasapwila uno Mushingwe māni kukutululwa kwa bakutwe, ne bampofu nabo kupebwa meso, ne kusapula mwaka wa buntu bulumbuluke bwa Yehova, wajokeja muvungo kudi kalama, ebiya washikata. Meso onso kasha amubambila sō. Papo kanena, koku wibashintulwila, mu bula bwa kitatyi kampanda, amba: “Kino kisonekwa kyo mubaimvwana . . . kino, kibafikidila dyalelo dino’di.” (MB)

Bantu abatendela yandi “myanda miya,” kebeipangula abo bene na bene, amba: “Lelo uno ke mwana Yosefapo’ni?” Ino Yesu wayuka amba basaka ebalongele bingelengele, waendelela na kunena’mba: “Kepabulwe mukangela lukindi’mba: Abewa ñanga, wiundape abe mwine; byobya bikata byo twaivwene, byo walongele mu Kapanama, nanshi longa’byo ne muno mwenu enka nabya.” I kimweke patōka’mba, bano badi bekalwa nabo ba Yesu ba kala balanga amba wadi wa kushilula kundapañana mwabo, mwanda wa ba mwabo bidi bamwene’mo biyampe. Pano abamone’mba Yesu webapēlula.

Papo Yesu wajingulula milangwe yabo, kaebasekunwina mānga imo mibafike’po. Amba mu mafuku a Ediya, mu Isalela mwādi bakaji ba kishala bavule, ino Ediya kātuminwepo ku mukaji wa kishala nansha umo wa mu abo. Ino wāenda mu Shidona kwa mukaji wa kishala wakubulwa kwikala mwine Isalela, kwine’kwa wālonga kingelengele kyāpandije muntu. Ne mu mafuku a Edisha namo monka na monka, kwādi bamakopo bavule, ino Edisha wābelula’nka Nemani mwine Shidea kete.

Bano bobadi nabo mu shinakoka pa kwivwana ino mānga ilombola patōka kwisakila kwabo kubikubi ne kubulwa lwitabijo kwabo, kebafuna bulobo, abatekuna Yesu amba bakamwele panja pa kibundi. Abaenda nandi ku mpulumuko ya lūlu lubakilwe’po Nazala, kebasake kumutakikila mu lupongo. Ino Yesu webasomboloka wanyema pakubulwa kulongwa kintu. Luka 4:16-30; 1 Balopwe 17:8-16; 2 Balopwe 5:8-14.

▪ Mwanda waka mu Nazala mudi kwisakanya?

▪ Bantu abalanga bika pa mwisambo wa Yesu, ino i kika kyebakela bulobo?

▪ Bantu abasu kulonga Yesu bika?