Shapita 23

Bingelengele Bivule mu Kapanama

TUDI mu dya Sabado, Yesu wapu kwita bandi bana-babwanga baná—Petelo, Andele, Yakoba, ne Yoano—kebenda bonso ku shinakoka ya mwabo mu Kapanama. Mwine’mwa, Yesu washilula kufundija, bantu papo batendela, mwanda wibafundija bu walupusa, ke pamopo bwa basonekeji.

Mu dino dya Sabado, muntu mukwatwe na mudemona udi’po. Kupwa kwa kitatyi kityetye, waela’mo lwanji: “Lelo kyotwikadila nobe i kika, abe Yesu wa Nazala? Nanshi ubaiya kwitōnakanya’ni? Nakuyūka ne byōdi, abe ukola wa Leza.”

Uno mudemona ukwete uno muntu i umo wa mu bamwikeulu ba Satana. Yesu wafunina uno mudemona, amba: “Talalapo, mutambemo!”

Ebiya mudemona ubafulubija uno muntu, waela lwanji na diwi dikatakata. Ino ubamutambe’mo pakubulwa kumulonga kibi. Bantu bonso abatendela! “Lelo kino nakyo i kika le?” bo abo papo kebeipangula. ‘Aye usoñanya na lupusa nansha ke mishipiditu imbi, nayo imukōkela.’ Uno mwanda uwaenda ntumbo koku ne koku.

Yesu watambe mu shinakoka pamo ne bandi bana-babwanga, kebenda kwa Shimona, witwa ne bu Petelo. Abatana lolo muko wa Petelo ubela bikomo, mwanzakanwe ngitu. Abamulombe amba: ‘Ketukupuñenye bidi, mukwashe.’ Ebiya Yesu wamufwena, wamukwata ku kuboko, wamulangula. Kupwe, mukomenene, washilula ne kwibatēkela bidibwa!

Ke mungya kala, dyuba ke dipone ne kupona, bantu nabo ko kwiya kebāya, batūtyikila ne babela babo ku njibo ya Petelo. Kepejijepo, kibundi kyonso kibaungwila pa kibelo! Yesu wabelula babela bonso, pambulwa kushiya’ko nansha umo, shi wa misongo’ka, shi wa misongo’ka. Ulupula ne ba bademona. Bademona bāpanga pa kutamba, abaela lwanji amba: ‘Abe wi Mwanā Leza.’ Ino Yesu webafunina, pampikwa kwibashila kyaba kya kwisamba, mwanda bayukile amba i Kidishitu. Mako 1:21-34; Luka 4:31-41; Mateo 8:14-17.

▪ I kika kyalongeka mu shinakoka mu dya Sabado kupwa kwa Yesu kwita bandi bana-babwanga baná?

▪ Patambile Yesu mu shinakoka, waenda kwepi, ne i kingelengele’ka kyaalonga kwaendele?

▪ I mwanda’ka walongeka ku kyolwa mu dino difuku dimo dyonka?