Shapita 62

Bufundiji bwa Kwityepeja

YESU wapu kubelula mwanuke wadi mukwatwe na mudemona mu ntanda ya kubwipi na Kesalea Fidipai, pano kasake kujokela kwabo ku Kapanama. Ino usaka kwenda’nka na bandi bana-babwanga kete mwanda wa kwibateakanya ku lufu lwandi ne ku biselwa byobasa kushala nabyo. Kaebashintulwila’mba: “Mwanā muntu watūlwa mu maboko a bantu, nabo bakamwipayanga, ebiya pa kupwa kwipaībwa kadi ukasangukanga mu difuku dya busatu.”

Nansha byanene kala Yesu uno mwanda, ne batumibwa basatu bemwena na meso kwalamuka kwandi kaeñenya, bamwivwana unena mwanda wa “lwendo” lwandi, ino balondi bandi kebaivwanije senene uno mwanda. Nansha byokekukidi nansha umo upatanya’mba kakepaibwapo, bwa mwapateninye Petelo mu mafuku a kunyuma, ino abatyina kumwipangula bivulevule pa uno mwanda.

Ku mfulo abafika mu Kapanama, mu kité kya Yesu mu mafuku onso a mwingilo wandi. Kadi mo mwa ba Petelo ne batumibwa bakwabo bavule. Mwine muno, bantu basonkeja musonko wa tempelo abafwena kudi Petelo. Kepabulwe padi batompa mwanda wa kutala shi Yesu usa kujilula bibidiji bilēmekelwe, abaipangula’mba: “Lelo mufundiji wenu i namani? Kasonkepo musonko [wa ndalama ibidi ya tempelo]’ni?”

“Usonkanga,” ye Petelo ulondolola.

Yesu wayuka byobesamba, abo bakala’tu kishima, aye nandi ufika ku njibo. Ne Petelo mwine kamutūdīle mwanda, aye Yesu waipangula kala’mba: “Le unenanga namani abe Shimona? Le balopwe ba pano panshi balambulwanga mulambu, nansha musonko, kudi bāni? Le i kudi bāna’ni i ku bēni?”

“I konka ku bēni,” ye Petelo ulondolola.

“Nanshi bāna i bāna-pabo bēndela’tu, shabo, kusonka mpika,” ye Yesu unena namino. Shandya Yesu byadi Mulopwe mūlu ne pano panshi, Mwine utōtwanga mu tempelo, nanshi Mwanā Leza kafwaninwepo kusonka musonko. Yesu wanena’mba: “Ino mwanda wakunena’mba twakebak[ukaj]a, enda ku dijiba, ukalobe bulobo, ne nyema umbajinji wa lui kulobako mwasamije mu kanwa, usa kwimumona satatela īmo [ndalama iná] ya lupeto, utekune’yo wibape, ne ya wami musonko ne [yobe] konka.”

Bana-babwanga abekongela pamo, mobimwekela badi kwa Petelo, ke bajokele kala mu Kapanama, abaipangula’mba: “Lelo umbulopwe bwa mūlu ukidilemo buleme i ani le?” Yesu wayuka kipangwilo kya kino kipangujo kyabo, mwanda uyukile kala mwanda obadi benda banena pobadi bamulonda kunyuma tamba ku Kesalea Fidipai. Webepangula’mba: “Lelo kyokya kyo mwadi mwipatenya mu dishinda i kika le?” Bana-babwanga abasanzwe, kebobile nyā, mwanda badi bapatena kuyuka i ani ukekala mukatampe kupita bonso.

Mwene luno lupata lumweka bu lwambulwa kufwaninwa ku bana-babwanga bafundijibwe na Yesu kintu kya myaka isatu? Bine, kino kilombola’mba kubulwa kubwaninina kwa bu muntu ne milangilo ya mu mitōtelo yabo ya kala bikidi na lupusa lukomo pobadi. Mu mutōtelo wa Buyuda mutamīne bana-babwanga, batumbijanga’mo myanda ya bukata ne bitenta mu myanda yonso. Nakampata Petelo, padi wimonanga bu ye mukatampe mwanda’po Yesu i mumulaye kumupa “mfungulo” ya Bulopwe. Padi ba Yakoba ne Yoano nabo badi na milangwe imo yonka mwanda wa kutanwa kobatenwe pa kwalamuka kwa Yesu kaeñenya.

Ino Yesu waleta’po kyakumwenako kitenga ku mityima, mwanda wa kulemununa milangwe yabo. Waite kanuke, wekemika umbukata mwabo, kupwa wekobeleja makasa, kanena’mba: “Wivwane kemwalukile ne kwialamuna pamo bwa twana tutyetye, nabya kemukatwelangamopo mu bulopwe bwa mūlu. Yewa wakwi[tyepeja pamo bw]a kano kāna, nankyo ye ukidilemo mu bulopwe bwa mūlu. Kadi yewa wakasepelela kāna katyetye, kadi na kano, monka mu dijina dyami, nabya unsepelelanga amiwa.”

Bine, walemununa bandi bana-babwanga bilumbuluke’po kashāa! Yesu kebakalabedilepo, kadi kebatelelepo bu bantu bamitatulo, balwiso nansha besakila, mhm. Ino waleta bufundiji bwandi bwa kwibalemununa, pa kuleta kino kifwa kya banuke batyetye badi na mutyima wa butūkanye, kebayukile kufwila bitenta, ne milangwe mine ya kukimba bukata umbukata mwabo kebadipo nayo. Pano Yesu walombola’mba bandi bana-babwanga bafwaninwe kutamija ino ngikadilo ya kwityepeja idi na banuke. Monka mwafudijija Yesu amba: “Yewa wakwikala mutyetyetyetye wa mo mudi bānwe bonso, nankyo enka aye ukēkalanga mukatampe.” Mateo 17:22-27; 18:1-5; Mako 9:30-37; Luka 9:43-48.

▪ I bufundiji’ka bwapituluka’mo Yesu pa kujokela mu Kapanama, ne bubatambulwa muswelo’ka?

▪ Mwanda waka Yesu kafwaninwepo kusonka musonko, ino mwanda waka wasonke’o?

▪ I bika bimweka bu byaikala kutonona bana-babwanga bepatanye, ino Yesu webalemununa namani?