Shapita 65

Lwendo lwa ku Yelusalema lwa mu Bufyafya

BADI mu mulanga wa 32 K.K., Masobo a Bitanda keadi pabwipi. Yesu waingila mwingilo wandi nakampata mu Ngadilea, mwanda Bayuda badi basaka kumwipaya tamba ku Pashika wa 31 K.K. Bimweka bu tamba penepa, Yesu kaendanga mu Yelusalema enka shi ukatanwa ku masobo asatu a Bayuda a ku mwaka ne mwaka.

Pano banababo kebamunena’mba: “Tunduluka kuno, wende ku Yudea.” Yelusalema kyo kibundi kikatampe mu Yudea, kadi kyo kité kya mutōtelo mu ntanda yabo yonso. Banababo balanga’mba: “Kekudipo nansha umo ulongela kintu kufula, aku usaka aye mwine kuyūkibwa biyampe.”

Nansha ba Yakoba, Shimona, Yosefa ne Yudasa byokebakulupile tutu wabo Yesu bu ye Meshiasa mwine, inoko basaka akalombole bukomo bwandi bwa kulonga bingelengele ku bantu bonso bongwidile ku masobo. Aye Yesu papo muyuke kala kyaka kidi’po. ‘Ino ntanda keidipo na kyoimushikilwa banwe,’ ye aye unena, ‘ino inshikilwe ami, mwanda wa kwiijingulula koneijingulula’mba mingilo yayo yo mibi.’ Yesu wanena banababo amba: “Kakandeiko bonka banwe ku ano masobo, ami nkikakandakopo pano ku ano masobo.”

Masobo a Bitanda ejanga mafuku asamba-abidi. Mu difuku dyamwanda dya nkotokelo mo mwikalanga mingilo minemine. Ano masobo o ao alombolanga mfulo ya mwaka wa madimi, kadi i kitatyi kya nsangaji mikatampe ne kufwija’ko. Banababo na Yesu ke bende kala kukatanwa ku masobo na mulongo wa bañenda batūtyikile, ke palāle ne mafuku mavule, ebiya Yesu nandi ne bandi bana-babwanga kebenda mu bufyafya, pampikwa kumonwa na bantu. Abaenda dishinda dya kupita mu Samadia, abaleka kwenda dyodya dikunkuja ku Munonga wa Yodano dyendele bantu bonso.

Yesu ne bañenda nandi i beni bakimbilwa kwa kukafikila mu kibundi kya Samadia, wabadikija mikendi ikateakanye kifuko senene. Ino bantu pa kuyuka’mba Yesu wenda ku Yelusalema, muno upitapita’mo bitupu, abapele kumulongela kintu nansha kimo. Ba Yakoba ne Yoano abamwipangula na nsungu amba: “Abe Mfumwetu, lelo uswile tunene mudilo utūke mūlu kwibaloteja fututu”? Abo pa kunena namino, Yesu webafunina, kupwa kebenda mu kibundi kingi.

Papo benda mu dishinda, mufadiseo umo wanena Yesu amba: “Abe Mufundiji, nkulonde ne konso kōkaya.”

“Mizeu īdi ne mikembo, ne byoni bya mūlu nabyo bidi ne manswa,” ye Yesu umulondolola, “ino Mwana wa muntu kadi[po] ne pakusamina mutwe wandi.” Yesu ushintulwila uno musonekeji amba, shi ekale ke mulondi Wandi, ukasusuka. Kadi mulangwe mukwabo i uno, bimweka bu musonekeji kaketabijapo ino ngikadilo ya umbūmi mwanda udi na mitatulo mpata.

Ku muntu mukwabo, Yesu wanena’mba: ‘Ikala mulondi wami.’

“Mbadikile bidi nkajike tata,” ye uno muntu ulondolola.

Ino Yesu wamutentulula’mba: “Leka bafu ne bafu bējike abo bene, nanshi abe enda usap[u]la bulopwe bwa Leza.” Mungya buluji, shandya uno muntu kafwile, mwanda shi wadi amba i mufwe, longa wandi mwana kailepo kuno kwivwana Yesu. Mobimwekela, uno mwana usaka elaije kufika ne pakafwa shandi. Keteakenyepo kutūla Bulopwe bwa Leza pa kifuko kibajinji mu būmi bwandi.

Abo bakidi mu dishinda benda ku Yelusalema, muntu umo wanena Yesu amba: “Nsakukulondapo abe Mfumwami, nanshi mbadikile bidi nkalae badi kwetu ku njibo.”

Yesu wamulondolola’mba: “Nansha umo wakukwata lukasu mu maboko kadi utala kunyuma, nankyo kafwaninwepo bulopwe bwa Leza.” Bonso basa kwikala bana-babwanga ba Yesu bafwaninwe kubambila meso abo sō enka ku mwingilo wa Bulopwe. Muntu yense utala kunyuma mu ino ngikadilo ya bintu ya dyalelo, ukokeja kuluba mu dishinda ditwala ku būmi bwanyeke, pamo’nka na munyengakenanga dibunda shi kidimye katalepo kumeso kwaenda. Yoano 7:2-10; Luka 9:51-62; Mateo 8:19-22.

▪ Banababo na Yesu i bāni, ne bamulangila namani?

▪ Mwanda waka bene Samadia kebamutundailepo, ne i kika kisaka kulonga ba Yakoba ne Yoano?

▪ I mīsambo’ka isatu yesamba Yesu mu dishinda, ne i muswelo’ka waimanine bininge pa mvubu ya mwingilo wa kwipāna?