Shapita 75

Nsulo ya Dyese

YESU walongele bingelengele paadi wingila mu Ngadilea, kadi ne pano ukibilonga mu Yudea. Kifwa, walupula mudemona wadi wikadije muntu bu kamāma. Bibumbo bibatendela, ino batufutululo abashilula kumufutulula pamo’nka na mobadi bamufutulwila mu Ngadilea. “Uno upañanga bademona konka kudi Belezebuba mulopwe wa bademona,” bo abo bafutulula. Bakwabo nabo basaka Yesu ebalombole kilomboji kya kumuyukila’po, kebamutompa amba witupe kiyukeno kitamba mūlu.

Ino Yesu wajingulula milangwe yabo, walondolola bano batufutululo ba mu Yudea pamo’nka na mwaalondolwedile ba mu Ngadilea. Amba bulopwe bonso bwa kwilala abo bwine bukapona. Kupwa waipangula’mba: “Shi Satana ēlale aye mwine, lelo nankyo bulopwe bwandi bushikate namani?” Walombola mutamba wa kyaka udi’ko bano bamufutulula, amba: ‘Shi mpañanga bademona na bukomo bwa munwe wa Leza, nanshi nankyo bulopwe bwa Leza bubemufikila.’

Bano bamona bingelengele bya Yesu badi ba kwibisangela pamo na mwāsangedile boba ba mu tutwa twa myaka kunyuma pobāmwene Mosesa ulonga kingelengele. Kebanena’mba: “Mwine uno’u i munwe wa Leza.” Kadi i “munwe wa Leza” wālembele Mbila Dikumi pa bipapo bya mabwe. Uno “munwe wa Leza”—wandi mushipiditu sandu, bukomo bwandi bwingila—o ao upele Yesu bukomo bwa kupanga bademona ne kubelula babela. Nanshi Bulopwe bwa Leza bubafikila bano bantu batufutululo, mwanda Yesu Mulopwe wa buno Bulopwe udi pano umbukata mwabo.

Kupwa, Yesu walombola’mba bukomo bwandi bwapanga nabo bademona i bupite bwa Satana, pamo’nka mutambilanga muntu nkomonkomo watyumuna kilobo mwilumbile bilonda bya bulwi senene ulama kipango. Yesu wapituluka ne mu kyelekejo kya mushipiditu umbi kyaaletele mu Ngadilea. Uno mushipiditu uwalupuka mu muntu, ino pa kipunzu kyoushile muntu waleka kudinga’po bintu biyampe, nao uwajoka na mishipiditu mikwabo isamba-ibidi, misongo ya uno muntu iyakomenena kupita ne poyadi.

Mwana-mukaji umo pa kwivwana buno bufundiji, watulula diwi amba: “Kemo mwadyese momwa munda mwakubutwile ne oa mabele akwamwishe!” Uno mwana-mukaji wanena byendele’mo, mwanda mwana-mukaji yense Muyuda wabilanga kubutula mupolofeto, kupityidila Meshiasa. Mobimwekela ulanga’mba Madia udi na dyese mwanda i inandya Yesu.

Ino Yesu walemunwininina uno mwana-mukaji pa uno mwanda utala nsulo minemine kusulukanga dyese. “Mhm,” ye Yesu umulondolola, “poso nena’mba: Badyese ne dyese, i bakwivwana uno mwanda wa Leza, ne kulama balame’o.” I kutupu pantu nansha pamo panene Yesu amba inandi Madia ufwaninwe kupebwa bulēme bwa pa bula. Ino walombola’mba, dyese dyabine ditambanga ku kwikala mwingidi wakikōkeji wa Leza, ke ku kupwanapo na bamfumu nansha ku kulonga bintu bikatakata bya kungitu.

Pano Yesu watopeka bantu ba mu Yudea bamulomba kiyukeno kya mūlu monka mwaatopekele ba mu Ngadilea. Webalombola’mba kekudipo kiyukeno kikemupebwa, poso kiyukeno kya Yona. Yona wāikele ke kiyukeno pa kulāla mafuku asatu munda mwa mushipa ne pa kusapula busapudi bwa bukankamane bwāikele kutonona bene Nineva besāse. “Kadi talaipo,” ye Yesu unena, “ino wakukilako Yona bukata udi pano.” Ne mulopwe-mukaji wa ku Sheba nandi monka na monka, wātendele tunangu twa Solomone. “Nanshi, talaipo,” ye Yesu ukinena, “wakukilako Solomone bukata udi pano.”

Yesu washintulula’mba shi muntu waakija kinanu, kapūtyilanga’kyopo mu musu nansha munshi mwa kilala, ino wikitūlanga patentekwanga kinanu mwanda wa bantu bamunikilwe. Padi usaka kunena’mba kufundija ne kulongela bano bantu bomu mityima bingelengele, bidi pamo bwa kupūta kitōkeji kya kinanu. Meso a bano bantu bamubandila ke matūkanyepo, nansha kufukata’o kwine mpika, nanshi ne bingelengele byandi bine kebisapo kufikidija kitungo kyobilongelwa.

Yesu wapu kupanga mudemona, washitula ne kamāma diwi kanena. Kino kyadi kya kutonona bantu ba meso matūkanye, mafukate, batendele kino kilongwa kya ntumbo ne kusapula myanda miyampe! Ino yō! bano bantu batufutululo kebalongelepo uno muswelo. O mwanda ku mfulo Yesu wanena’mba: “Dyumukai padi kitōkeji kidi mobe kidi fututu! Ino shi mubidi onso utōke to-o, nansha pamo po ufīta [mpika], nankyo ubatōka, to-o, onso, pamo ponka ne kinanu kya kutōkeja ne kitōkeji kyakyo.” Luka 11:14-36; Divilu 8:18, 19; 31:18; Mateo 12:22, 28.

▪ Bantu abalonga kika pa kumona Yesu wabelula muntu?

▪ “Munwe wa Leza” i kika, ne Bulopwe bwa Leza bubafikila bemvwaniki ba Yesu namani?

▪ Nsulo kutambanga dyese dyabine i nsulo’ka?

▪ Muntu ukokeja namani kwikala na diso ditūkanye?