Ingidilai Yehova, Kemukingidilai Satana

Batwe bonso tudi na butongi. Kwingidila Yehova nansha kwingidila Satana ne bandemona bandi. Ketukokejapo kulonga byonso bibidi, mhm. Kwingidila Yehova dyo dishinda dya tunangu!

Yehova I Muyampe

Ka na motwapwila kala kwikimwena, bandemona basepelelanga kususula ne kongola bantu. Yehova kadipo nankyo. Usenswe bantu pamo bwa shabana usenswe bana bandi. I Umpanyi wa “bintu byonso bilumbuluke ne byabuntu bibwane.” (Yakoba 1:17) Kapelelangapo bantu kintu kiyampe nansha kimo, nansha shi wikimwene bu kya buleme bininge.​—Efisesa 2:4-7.

Langulukai pa bintu byālongele Yesu, Mwana Leza, pano pantanda. Wābelwile tumama ne bampofu nabo bāmona. Wābelwile bamakopo ne bilemafu bilemene maulu. Wāpangile bandemona ne kubelula ba misongo ya miswelo ne miswelo. Kadi Yesu, ku bukomo bwa Leza, wāsangwile bafu ke bōmi.​—Mateo 9:32-35; 15:30, 31; Luka 7:11-15.

Kyaba kya kwitubepela mwanda wa kwitongola, Leza unenanga nyeke byabine. Kabepelangapo muntu nansha dimo.​—Umbadilo 23:19.

Epukai Bilongwa Byadisubi

Pamo’nka na ntanda-kumbidi ukwete nji mu bukonde bwandi, bantu bavule i bamunwe na kabutyi-butyi ne bubela. Badi na moyo wa bafu. Badi na moyo wa bandemona. Badi nyeke enka mityima kūlu pamwanda wa mafingo, kuloañana, majende ne manga. I bakutwe na ino nkulupilo ya kishīla imanine pa bubela bwa Satana Dyabola. Bengidi ba Leza kebadipo mu dikinga dya bino bintu.

Yehova i mukomo bininge kupitako Satana. Shi wingidilanga Yehova, aye ukakukinga ku bandemona. (Yakoba 4:7) Mīko keikokejapo kukukwata. Kimfwa, mu Nigeria, bamfwityi basatu ba bukomo bukatampe bāelele Kamoni wa Yehova umo mīko mwanda wa kumwipaya, amba mwanda wāpelele kuviluka mu kyabo kibundi. Pakumona’mba mīko yobāmwēlele keyamukwetepo, umo umbukata mwa bano bamfwityi wāivwene moyo bininge, wāenda kudi uno Kamoni ne wamuzenza bininge amufwileko lusa.

Shi bandemona abashilula kukukambakanya, ita Yehova pa dijina dyandi ne ukakukinga. (Nkindi 18:10) Ino pa kukingwa na Leza, ufwaninwe kutyiba lonso kipwano na bintu byonso bikwatañene na mishipiditu yakubulwa kumweka ne na kutōta bibanda. Kyokyalongele batōtyi ba Leza ba mu Efisesa wa kala. Baungwije mikanda yabo ya bya majende yonso pamo, ne kusoka’yo. (Bilongwa 19:19, 20) Bengidi ba Leza dyalelo bafwaninwe kulonga muswelo umo onka. Fundula abewamwine manga, tukūya, bijimba bya “kwishīka,” misengo, bitabo bya majende, ne bintu bikwabo byonso bikwatañene na kipwano na mishipiditu ya kubulwa kumweka.

Tōtai Mutōtelo wa Binebine

Shi usenswe kusangaja Leza, kekifwaninwepo nka kuleka mutōtelo wabubela ne kupela kulonga bintu bibi kete. Ufwaninwe na bukomo bonso kutōta mutōtelo utōka tōo. Bible ulombolanga patōka kisakibwa i kika:

Mwilungei ku Batumoni ba Yehova

Satana ne bandemona badi na bantu pano pantanda bafundija ne kulonga bintu bibi. Ino, Yehova nandi udi na bandi bantu. I Batumoni ba Yehova. (Isaya 43:10) Kujokoloka ntanda yonso, kudi miliyo iná ne kupita ya Batumoni. Abo bonso baloñanga bukomo bwa kulonga bintu biyampe ne kufundija bantu bubinebine. Mu matanda mavule, mukokeja kwibatana ku Njibo ya Bulopwe, bakemutundaila na kyanga kyonso.

Mwingilo wabo i kukwasha bakwabo bengidile Leza. Bakokeja kukefunda nobe Bible ku yobe njibo, mwanda wa kukukwasha uyuke muswelo mulumbuluke wa kutōta Yehova. Kukafutapo, mhm. Batumoni badi na nsangaji ya kufundija bubinebine mwanda basenswe bantu kadi basenswe Yehova Leza.