Kipindi 11

Kyalwilo Kya Ntanda Impya Kikishimikwa Ne Pano

1, 2. Kukwatañana na bupolofeto bwa mu Bible, i bika byotumonanga bifikidila dyalelo?

MWANDA mukwabo wakutendelwa i uno wa kyalwilo kya ntanda impya ya Leza kikishimikwa ne pano, ayo ntanda minunu ya Satana papo yenda yoneka. Meso etu i mukendi, Leza ukongakanyanga bantu ba mu mizo yonso, ke kyalwilo kya muzo mupya wa pano pantanda ukapingakena panopano ponka ino ntanda mikalañane yotudi’mo dyalelo. Mu Bible, mu 2 Petelo 3:13, MB, uno muzo mupya wa bantu beutela’mba i “ntanda mipya.”

² Bupolofeto bwa mu Bible bunena kadi amba: “Mu mafuku a kumfulo’kwa [a mu kino kitatyi kyotudi’mo] . . . , bantu bangibangi bakenda ne kunena’mba: Iyai tukande ku lūlu lwa Yehova [mutōtelo wandi wabine], . . . amba etulombole mashinda andi, kadi amba tunange mu tumashinda twandi.”​—Isaya 2:2-3.

3. (a) I mu bantu’ka mwenda mufikidila bupolofeto bwa Isaya? (b) Mukanda wa mfulo wa Bible unena’po kika?

³ Buno bupolofeto pano bufikidilanga umbukata mwa boba bakōkele ku ‘mashinda a Leza, bananga mu tushinda twandi.’ Mukanda wa mfulo wa mu Bible utelanga uno muzo uswele ndoe usambakene ntanda yonso amba i “kibumbo kikatampe . . . [kya bantu] batambile mu mizo yonso, ne mu bisaka byonso ne mu bantu, ne mu ndimi,” kisaka kya bu bana na bana bwabinebine kikutyile umbumo kingidila Leza. Bible unena kadi amba: “Bano’ba bo balupukilemo mu oa malwa makatakata.” Kino kishintulula’mba bakapanda ku mfulo kwa ino ngikadilo imbi ya bintu.​—Kusokwelwa 7:9, 14; Mateo 24:3.

Bu Bana na Bana Bwabinebine bwa Ntanda Yonso

4, 5. Mwanda waka bu bana na bana bwa ntanda yonso bwa Batumoni ba Yehova i bubwanike?

⁴ Batumoni ba Yehova midiyo ne midiyo beelelanga’ko na mutyima umo kwikala na būmi bukwatañene na bufundiji bwa Leza ne mashinda andi. Bakulupile kukekala na būmi bwanyeke mu ntanda impya ya Leza. Balondanga bijila bya Leza mu būmi bwabo bwa difuku ne difuku, kino kilombola’mba i betabije kukōkela ku buludiki bwandi bwaludika pano kutūla ne mu ntanda impya. Konso konso kobatanwa, bekale ba muzo’ka nansha ba musaka’ka, i bakōkele ku misoñanya imo yonka​—ilombwelwe na Leza mu Kinenwa kyandi. I bine kino i kisaka kya bu bana na bana bwabinebine kisambakene ntanda yonso, muzo wa ntanda impya ulongelwe na Leza.​—Isaya 54:13; Mateo 22:37, 38; Yoano 15:9, 14.

⁵ Batumoni ba Yehova kebeanyangapo amba i ku bukomo bwabo kobabwenye kubunda bubutule bwa pa bula bwa ntanda yonso. Bayukile amba butambile ku bukomo bwa mushipiditu wa Leza wingila mu bantu bakōkele ku bijila byandi. (Bilongwa 5:29, 32; Ngalatea 5:22, 23) I Leza mwine ulonga’byo. Yesu wānene’kyo kala, amba: “Byobya byakukankalwa bantu, nanshi kebikankadibwapo na Leza.” (Luka 18:27) I byabine, Leza wālongele madiulu ekele’ko nyeke na nyeke ye yenka walonga ne muzo wa ntanda impya wikale’ko nyeke.

6. I kika kinenenwa’mba bu bana na bana bwa Batumoni ba Yehova i kingelengele kya mu ino yetu myaka?

⁶ Nanshi muludikilo ukaludika Yehova mu ntanda impya ukokeja kala kumonwa mu byobya byalonga mu kyalwilo kya ntanda impya kishimikwa pano. Kintu kyaalonga mu Batumoni bandi i kingelengele kya mu ino myaka. Mwanda waka tunena namino? Mwanda wakongakanya Batumoni ba Yehova ke kisaka kimo kya bu bana na bana bwabinebine kisambakene ntanda yonso, kisaka kekibwanika kukalanganibwa na nkalañani ya mizo, ya lukoba nansha na makomwa​-meso a mitōtelo. Nansha Batumoni byobadi midiyo ne midiyo mu matanda 200 ne kupita, ino bekutyile umbumo, balungwe mu kikutwa kimo kyonka kikoma kukutululwa. Buno bu bana na bana bwa ntanda yonso i kintu kekyamwekele kasha mu mānga yonso, bine, kino i kingelengele kya mu ino myaka​—kyalonga Leza.​—Isaya 43:10, 11, 21; Bilongwa 10:34, 35; Ngalatea 3:28.

Mwa Kuyukila Bantu ba Leza

7. Yesu wānene amba bandi bana​-babwanga bakayukilwa pa kika?

⁷ Lelo i muswelo’ka mukwabo wa kuyuka bantu batūdilwe na Leza bu kyalwilo kya ntanda yandi impya? Tutale, le i bāni bafikidijanga binenwa bya Yesu bidi mu Yoano 13:34, 35? Wānene amba: “Mwanda mupya uno o nemulá amba: Mwikale kwisanswa bānwe bene na bene. Po ponka po bakemuyūkila bu-bāna​-bami-​babwanga ponka pa kwisanswa mo mwikadile bānwe bene.” Batumoni ba Yehova i betabije binenwa bya Yesu, bebilonda. Badi ‘na buswe bukatampe umo ku mukwabo,’ monka munenena Kinenwa kya Leza. (1 Petelo 4:8) I ‘bavwale buswe, mwanda kyo kijimba kibwaninine kya būmo.’ (Kolose 3:14) Nanshi buswe bwa bu bana na bana bo “bunange” bwibalamikile pamo ntanda yonso.

8. Lelo 1 Yoano 3:​10-12 nandi ulombola’mba bantu ba Leza bayukilwa pa kika?

⁸ Ebiya 1 Yoano 3:10-12 nandi unena’mba: “E monka muno mo musokokela bu-bāna ba Leza, ne bu-bāna ba dyabola; yewa wakubulwa kulonga byaboloke kadipo wa Leza, ne wampikwa kusanswa mwanabo nandi mo monka. Ke-muntu uno o mwanda o mwaivwene ne kungalwilo kwine’mba; twisanswe bātwe bene na bene, e mo kyendelemo; kepamopo bwa Kena wadi wa yewa mubi, wāipaīle mwanabo, mhm.” O mwanda bantu ba Leza i kisaka kisambakene ntanda yonso, kyambulwa bukalabale.

Kintu Kikwabo kya Kwibayukila’po

9, 10. (a) I mwingilo’ka wa kuyukila’po bengidi ba Leza mu mafuku a mfulo? (b) Batumoni ba Yehova bafikidijanga namani kisonekwa kya Mateo 24:⁠14?

⁹ Kudi kintu kikwabo kya kuyukila’po bengidi ba Leza. Yesu, mu bupolofeto bwandi bwa mfulo ya ntanda, wālombwele bintu bivule bya kuyukila’po kino kitatyi amba i mafuku a mfulo. (Tala Kipindi 9.) Kilomboji kikatampe mu buno bupolofeto i kitelwe mu binenwa byandi bidi mu Mateo 24:14 (MB), unena’mba: “Myanda Miyampe ino’i ya Bulopwe ikasapulwa panopantanda ponso, amba ikale bu kiyukeno ku mizo yonso, penepa mfulo keifika shayo.”

¹⁰ Lelo tumonanga muswelo wenda ufikidila buno bupolofeto? Eyo twiumonanga. Tamba’tu mafuku a mfulo ashilula mu 1914, Batumoni ba Yehova basapulanga myanda miyampe ya Bulopwe bwa Leza kujokoloka ntanda yonso na mwēkisoñaninye Yesu, benda beisapula ku mobo a bantu. (Mateo 10:7, 12; Bilongwa 20:20) Batumoni midiyo ne midiyo bapempulanga bantu ba mizo yonso, bebasapwila myanda ya ntanda impya. O mwanda nobe abakupe uno mukanda, mwanda Batumoni ba Yehova bengilanga ne mwingilo wa kutampa ne kwabanya binunu ne binunu bya mabuku esambila pa Bulopwe bwa Leza. Lelo uyukile bantu bakwabo basapulanga Bulopwe bwa Leza ku njibo ne njibo kujokoloka ntanda yonso? Mako 13:10 ulombolanga’mba uno mwingilo wa kusapula ne kufundija ‘ukabadikila’ bidi kwingilwa, penepa mfulo keifika shayo.

Malondololo a Mwanda Mukatampe wa Bubidi

11. I kintu’ka kikwabo kivuijanga Batumoni ba Yehova pa kukōkela ku buludiki bwa Leza?

¹¹ Kukōkela kukōkele Batumoni ba Yehova ku bijila ne misoñanya ya Leza kufikidijanga kintu kikwabo. Balombolanga’mba Satana wābepele bubela pa kufwatakanya’mba bantu kebakokejapo kukōkela Leza shi abatūlwa mu matompo, pa kino i balete malondololo pa mwanda mukatampe wa bubidi wa bululame bwa bantu. (Yoba 2:1-5) Batumoni ba Yehova i kibumbo kya midiyo ne midiyo ya bantu batambile mu mizo yonso, ino abo bonso i bakōkele pamo bwa muntu umo ku buludiki bwa Leza. Eyo, abo i bantu bakubulwa kubwaninina, inoko nansha byobatyinibwa na Satana, abo babingijanga Leza mu mwanda wa bubikadi bwandi bwa mūlu ne pano panshi.

12. Batumoni ba Yehova beulanga bāni mu lwitabijo lwabo?

¹² Dyalelo, ino midiyo ya Batumoni ba Yehova ibwejanga bukamoni bukwabo ku bwa Batumoni bakwabo ba pa kala bādi bakōkele kudi Leza. Kifwa Abele, Noa, Yoba, Abalahama, Sala, Isake, Yakoba, Debola, Luta, Davida ne Danyele, ne bakwabo. (Bahebelu, shapita 11) Bine, i ‘kibumbo kikatakata kya Batumoni bakikōkeji,’ pamo’nka na mwikitelela Bible. (Bahebelu 12:1) Bano ne bakwabo’po, kubadila’mo ne bana-babwanga ba Yesu, bālamine bululame bwabo kudi Leza. Yesu ye mwine wāpene kifwa kitabuke byonso pa kulama bululame bwandi mu muswelo mubwaninine.

13. I binenwa’ka byabine byānene Yesu pangala pa Satana?

¹³ Kino kilombola’mba Yesu wānene byabine paādi wisamba na bendeji ba bipwilo pa mwanda utala Satana, amba: “Ino pano ke mukimbe kuntapa, ami muntu wimusapwila byabinebine byo naivwene kudi Leza. . . . Ino bānwe shenu mwine i dyabola, ne byamakomwameso bya shenu byo mutwelemo mityima yenu kulonga. Aye wadi ntapañani ne kungalwilo kwine, ne kwimanapo mu byabinebine, mpika, ke-muntu mwandi munda byabinebine mutupu’byo. Kadi pābepanga bubela i bwa aye mwine bwābepa, mwanda i wabubela, e enka shandya ne bubela bwine.”​—Yoano 8:40, 44.

Lelo Abe Ubatonge ku Mutamba’ka?

14. I kika kilongekanga pano mu bantu babundile kyalwilo kya ntanda impya?

¹⁴ Kyalwilo kya ntanda impya kishimikwa pano na Leza mu muzo wa ntanda yonso wa Batumoni ba Yehova kyendanga kishimatyijibwa nakampata. Mwaka ne mwaka, bantu tununu ne tununu twa tutwa bengidijanga bwanapabo bwabo bwa kwitongela bwimanine pa buyuki bwabinebine, betabija buludiki bwa Leza. Nabo belunga ku muzo wa ntanda impya, balamata ku mutamba wa Leza mu uno mwanda wa bubikadi bwa mūlu ne pano panshi, batuluja Satana patōka’mba i mbepai.

15. I mwingilo’ka wa kukalañanya ukengilwa mu ano etu mafuku?

¹⁵ Kuno kutonga kobatongele bubikadi bwa Leza i kulombola kobalombola’mba bakafwaninwa kukatūlwa “ku lundyo” lwa Kidishitu pakakalañanya “mikōko” koku, “bambuji” nabo koku. Yesu wānene mu bupolofeto bwandi bwa mafuku a mfulo amba: “Mizo yonso īkabungakanibwa [ku meso a]ndi, uk[akalañanya bantu pala pala, pamo] bwa mukumbi ukalañanya mikōko umbambuji. Ukatūla mikōko ku lundyo, bambuji nabo ku lunkuso.” Mikōko i bantu betyepeje belungile na banababo na Kidishitu, bebakwatakanya, bakōkele ku buludiki bwa Leza. Bambuji i bantu ba mityima myumu bapelele banababo na Kidishitu, kulonga kantu nansha kamo ka kukwatakanya nako buludiki bwa Leza mpika. Lelo bikebafudila namani? Yesu wānene amba: “Boba [bambuji] bakend[a] mu [kutyibwa’ko kwa] nyeke ne nyeke, ino boloke [mikōko] abo bakenda ku būmi bwa kulādila nyeke na nyeke.”​—Mateo 25:31-46.

16. I kika kyofwaninwe kulonga shi usaka kukekala mu Paladisa īya kumeso?

¹⁶ Bine, Leza witutele mutyima! Panopano ponka usa kuleta paladisa ya nsangaji pano pantanda. Lelo usenswe kukekala mu ino Paladisa? Shi usenswe kukekala’mo, nankyo sepelela mpango ya Yehova, wifunde kumuyuka ne kulonga mwendele byowifunda. “Kimbai Yehova pākitanwa, mwitei pakidi pabwipi; mupupakane azobolole dishinda dyandi, ne mukondame nandi ku mifwatakanyo yandi; ino ajoke kudi Yehova, nandi ukamusokwela lusa.”​—Isaya 55:6, 7.

17. I kika kinenenwa’mba kufwaninwepo kujimija kitatyi kya kutonga yewa ofwaninwe kwingidila?

¹⁷ Kitatyi kya kujimija i kutupu’kyo. Mfulo ya ino ngikadilo minunu keidi pabwipi. Kinenwa kya Leza kitudingila’mba: ‘Kemukisanswa ino ntanda, nansha bintu bidi mu ino ntanda bine. Shi muntu usenswe ino ntanda, nankyo buswe bwa Tata kebudipo mudi aye, mhm. . . . Ino ntanda ipitanga, ne kilokoloko kyayo kine kumo; nanshi yewa ulonga kiswamutyima kya Leza aye wikele nyeke.’​—1 Yoano 2:15-17.

18. I bintu’ka byofwaninwe kulonga, nobe umone kutengela na kikulupiji kukekala mu ntanda impya ya dyangi ya Leza?

¹⁸ Bantu ba Leza pano bafundijibwanga mwa kukekadila na būmi bwanyeke mu ntanda impya. Balombolwa manwa a kumushipiditu ne bwino buyampe mwa kukalongolwela paladisa. Tubakukankamika utonge Leza bu Mulopwe obe ne kukwatakanya mwingilo ukūla būmi bwa bantu ukingilwa dyalelo kujokoloka ntanda yonsololo. Wifunde Bible na Batumoni ba Yehova, wifunde ne kuyuka Leza ukutele mutyima binebine, mwine ukafudija masusu onso. Shi ulonge namino, ukabadilwa mu bantu babundile kyalwilo kya ntanda impya. Nanshi kulupila ne mutyima umo amba uketabijibwa na Leza, ne ukekala na būmi bwanyeke mu ino ntanda impya milumbuluke shē.

[Kifwatulo pa paje 31]

Batumoni ba Yehova badi na bu bana na bana bwabinebine bwa ntanda yonso

[Kifwatulo pa paje 32]

Kyalwilo kya ntanda impya ya Leza kikishimikwa ne pano