Bana na Bana Badi mu Bumo

MU BULA bwa kintu kya myaka 1 500, Yehova Leza wātongele muzo wa Isalela wikale ke bantu ba dijina dyandi. Kupwa Yehova wata mutyima “ku mizo mwanda wa kutonga’mo bantu ba dijina dyandi.” (Bil. 15:14) Bantu ba dijina dya Yehova bādi bafwaninwe kwikala batumoni bandi, badi mu bumo mu milangwe ne mu bilongwa konsokonso kobadi pano pa ntanda. Bumo bwa bantu ba dijina dya Leza bwādi bwa kulupuka ku mwingilo wāpele Yesu balondi bandi, wēbanenene amba: “Nanshi, endai mukalonge bana ba bwanga mu bantu ba ku mizo yonso, mwibabatyijei mu dijina dya Tata ne dya Mwana ne dya mushipiditu ujila, mwibafundijei kulama byonso byonemusoñenye.”​—Mat. 28:19, 20.

² Nobe waikele mwanā bwanga wa Yesu Kidishitu pa kwipāna kudi Yehova ne kubatyijibwa. Ubadilwanga mu bana na bana bene Kidishitu badi mu bumo ntanda yonso, kebalekelepo muzo, musaka, nansha misokwe bibakalañanye. (Ñim. 133:1) O mwanda uswele bakwenu bene Kidishitu mu kipwilo ne kwibalēmeka. Bamo i ba lukoba lungi, ba muzo ungi, bafunde bininge nansha bityetye bokwadipo padi ubwanya kupwana nabo dibajinji mwanda wa kuno kwishila. Pano udi mu kijimba kya buswe bwa bu bana na bana kikomo bininge kupita bulunda bukwabo bo-bonso, bwikale bwa mu kibundi, mu mutōtelo, nansha mu kisaka.​—Mako 10:29, 30; Kol. 3:14; 1 Pe. 1:22.

KUSENDULULA MULANGILO

³ Shi kudi bamo bakikolelwa pa kunekenya mfwatakani yobadi nayo pa mwanda utala lukoba, politike, bisaka, ne bikwabo, babwanya kulangulukila pa Bayuda babajinji bene Kidishitu, bānekenye mfwatakani yādi na bipwilo bya Bayuda pa bantu ba mizo mikwabo yonso. Pobāpele Petelo musoñanya wa kwenda ku njibo ya Konilusa mudyavita mwinē Loma, Yehova wāteakenye Petelo na kanye pangala pa uno mwingilo.​—Bilongwa, shap. 10.

⁴ Mu kimonwa kyāmwene Petelo, bāmunenene kutapa ne kudya banyema bamo bādi ba disubi mungya bibidiji bya Bayuda. Petelo pa kupela, diwi dyatamba mūlu kedimunena’mba: “Leka kwita bintu byatōkeja Leza bu bya disubi.” (Bil. 10:15) Byādi bilomba Leza atenge’po kuboko mwanda wa kuteakanya ñeni ya Petelo pa mwanda utala mwingilo waādi wa kupebwa bukidi bonka, ke wa kwenda kudi muntu wa ku mizo ingi kadi. Petelo pa kukōkela bwendeji bwa Yehova, wānena ku meso a boba bādi bēbungile amba: “Muyukile biyampe mokijidikīlwe Muyuda kupwana na muntu wa muzo ungi nansha kumufwena, ino aye Leza wanombwele amba nkifwaninwepo kwita muntu nansha umo bu wa disubi nansha wa biko. O mwanda naile, kwampikwa nansha kushishikita kwine, pobantumine.” (Bil. 10:28, 29) Ponkapo, Petelo wēmwena kilomboji kilombola’mba Yehova waitabija Konilusa ne ba mu njibo yandi.

⁵ Solo wa ku Tasusa, Mufadiseo mufunde bininge, wādi unenwe kwityepeja ne kupwana na boba bakādipo ubwanya kwitabija kwikala nabo pamo dibajinji. Wāitabija’nka ne buludiki bwabo. (Bil. 4:13; Ngt. 1:13-20; Fid. 3:4-11) Bine, tulanga’mba bantu pamo bwa Sengusa Polosa, Dionisusa, Damadi, Filemone, Onesemusa, ne bakwabo bāsendulwile mulangilo wabo pa kwitabija myanda miyampe ne kwikala bana ba bwanga ba Yesu Kidishitu.​—Bil. 13:6-12; 17:22, 33, 34; Fil. 8-20.

KULAMA BUMO BWETU BWA NTANDA YONSO

⁶ Na bubine buswe boswele batutu ne bakaka mu kipwilo i bukukwashe ufwene kudi Yehova ne ku bulongolodi bwandi. Wi mwimwene kiyukeno kekitatanwapo kya buswe buyukanya bana ba bwanga ba bine ba Yesu Kidishitu, pamo na mwaānenene’kyo amba: “Nemupe mbila mipya, amba mwisanswe banwe bene na bene; monka monemusanshilwe, nenu mwisanswei banwe bene na bene. Pa kino bonso bakayuka’mba mwi bami bana ba bwanga​—shi mudi na buswe umbukata mwenu.” (Yoa. 13:34, 35) Kadi wasangedile Yehova ne bulongolodi bwandi bininge powayukile amba buswe budi mu kyenu kipwilo i ntompejo’tu ya buswe budi mu bu bana na bana bwa ntanda yonso. Ubemwena kufikidila kwa bupolofeto bwa mu Bible butala pa kukongakanibwa pamo kwa bantu mu mafuku a mfulo mwanda wa kutōta Yehova mu ndoe ne mu bumo.​—Mika 4:1-5.

⁷ Shi tutale muvudile bintu bileta nkalañani dyalelo, lelo kudi wadi ukokeja kulanga’mba bibwanika kukutyila mu bumo bantu “batambile mu mizo yonso ne bisaka ne bantu ne ndimi”? (Kus. 7:9) Tala’tu bidi mwishidile bantu bayukile bya busendwe bwa peulu na boba bakilamete ku bibidiji bya kishi kya kwabo. Tala mwikadile lwana lwa bipwilo mudi bantu ba lukoba lumo ne muzo umo. Mushipiditu wa kufwila ntanda byowenda uvudila’ko, pano po pene pakalañana bantu mu myanda ya politike kashā. Kadi shi utale kwishila kukatampe kwa misokwe ne bintu bivulevule bikalañanya bantu, kukutyila bantu ba mu mizo yonso, misaka, bisumpi, ne bitango byonso mu kijimba kyampikwa kukutuluka kya buswe ne ndoe i kingelengele kikokeja kulongwa’nka na Leza Mwinē Bukomo Bonso kete.​—Zek. 4:6.

⁸ Ino buno bumo i bumweke, kadi powaikele Kamoni wa Yehova mwipāne ne mubatyijibwe, nobe watwelele’mo. Byomwena mu buno bumo, udi nobe na kiselwa kya kulama’bo. Ukokeja kulama’bo shi ulonda binenwa byānenene mutumibwa Polo mu Ngalatea 6:10 amba: “Ponso potumona mukenga, tulongelei bantu bonso biyampe, ino kutabukidila boba botubutulwa nabo mu lwitabijo.” Kadi tulondanga ano madingi anena’mba: “Kemwakilongai kintu nansha kimo na lupotopoto nansha na kwisakila, ino na kwityepeja, monai bakwenu amba i bemupite bukatampe. Kemwakitai mutyima enka ku tumweno twa banwe bene, ino i ne ku tumweno twa bakwenu.” (Fid. 2:3, 4) Ponso potwiibidija kumona batutu ne bakaka mwibamwena Yehova, ne kuleka kwibamona mobekadile ku ngitu, nabya tukekala nabo nyeke mu kipwano kya ndoe ne nsangaji.​—Ef. 4:23, 24.

KWITA MUTYIMA BATWE BENE NA BENE

⁹ Monka mwāelekeje’kyo mutumibwa Polo, kipwilo kekilalulwilepo, ino bonso badi’mo betele mutyima abo bene na bene. (1 Ko. 12:14-26) Tubwanya kwikala kulampe bininge na banabetu badi mu bu bana na bana bwa ntanda yonso, nansha nankyo twibatele mutyima. Shi banabetu bamo bapangwapangwa, batwe bonso bashele tukwatwanga bulanda bya binebine. Shi bamo badi mu bufudile nansha kuponenwa na kimpengele nansha divita ne ñuma ya mu ntanda yabo, bashele bekalanga na kipyupyu kya kuyuka mwa kwibapela bukwashi bwa ku mushipiditu ne bwa ku ngitu bwine.​—2 Ko. 1:8-11.

¹⁰ Batwe bonso tufwaninwe kulombela pangala pa banabetu difuku ne difuku. Bamo batanwanga na matompo ebakokela ku kulonga bibi. Bakwabo batanwanga na masusu mayukane ku bonso. Bangi nabo balwanga na lwana lwa munshimunshi lwa bakwabo ba ku kaji, ne lwa mu bisaka mudi bantu badi mu bipwilo palapala. (Mat. 10:35, 36; 1 Tes. 2:14) Kino kitutalanga ne batwe mwanda tudi mu bu bana na bana bwa ntanda yonso. (1 Pe. 5:9) Motudi mudi bengila bininge mu mwingilo wa Yehova, batangidila mwingilo wa busapudi ne wa kutala bipwilo. Kadi kudi bapelwe kiselwa kya kutala mwingilo wa ntanda yonso. Bonso basakilwa milombelo yetu, ilombola’mba twibaswele ne kwibata mutyima bya binebine, nansha shi kekudipo kintu kikwabo kyotukokeja kulonga kya kwibakwasha.​—Ef. 1:16; 1 Tes. 1:2, 3; 5:25.

¹¹ Byokudi tuvutakanya pano pa ntanda mu ano mafuku a mfulo, bantu ba Yehova bafwaninwe kwikala beteakanye mwa kwikwashisha abo bene na bene. Kyaba kimo, bimpengele pamo bwa kutenkana kwa ntanda ne malobe, bilombanga kuleta bukwashi bukatampe ne kuteakanya’ko bintu bivule bya ku ngitu bya bukwashi. Bene Kidishitu ba mu myaka katwa kabajinji, i bashiye kimfwa kilumbuluke mu uno mwanda. Pa kuvuluka madingi a Yesu, bana ba bwanga ba mu Antyioka bātumine na nsangaji byabuntu bya ku ngitu ku banababo ba mu Yudea. (Bil. 11:27-30; 20:35) Mutumibwa Polo wālongolwele senene bya bukwashi mwanda wa bintu byonso bilongwe mu ndudi. (2 Ko. 9:1-15) Mu ino myaka namo, shi banabetu abaponenwa na ngikadilo imbi kadi basakilwa bukwashi bwa ku ngitu, bulongolodi ne bene Kidishitu bonso umo ne umo bapēlakananga kwitaba ne kuleta bine bisakibwa.

BAPANDULWE MWA KULONGELA KISWA-MUTYIMA KYA YEHOVA

¹² Byotudi bana na bana badi mu bumo ntanda yonso, twi balongololwe mwa kulongela kiswa-mutyima kya Yehova. Kiswa-mutyima kyandi mu kino kitatyi i kino: amba myanda miyampe ya Bulopwe isapulwe pa ntanda yonso ke bukamoni ku mizo yonso. (Mat. 24:14) Pano potwingila uno mwingilo, Yehova usakanga twiendeje kukwatañana na misoñanya yandi ya peulu ya mu mwikadilo. (1 Pe. 1:14-16) Tufwaninwe kwikala na mutyima wa kwikōkela batwe bene na bene ne kwingila mwanda wa myanda miyampe yendelele kumeso. (Ef. 5:21) Kupita bitatyi byonso, kino kyo kitatyi kyoketufwaninwepo kukimba tumweno twa batwe bene, ino i kitatyi kya kutangidija Bulopwe bwa Leza kumeso mu būmi bwetu. (Mat. 6:33) Kulama kino mu ñeni ne kwingidila pamo pa mwanda wa myanda miyampe kuletanga nsangaji keineneka pano, kadi kuketutwala ku madyese a nyeke ne nyekeke.

¹³ Byotudi Batumoni ba Yehova, bine twi beshile na bantu bonso, twi bapandulwe mu bantu bakwabo mwanda twi bantu batōka, bapyasakene mu mwingilo wa Leza wetu. (Tet. 2:14) Butōtyi botutōta Yehova bo bwitushiyañanya. Ketwingilangapo enka kipuji na kipuji na banabetu kujokoloka ntanda yonso kete, ino kadi twisambanga ludimi lumo lwa bubine kadi tuloñanga bintu kukwatañana na bubine botwisamba. Kino kyālailwe kala pānenene Yehova kupityila kudi mupolofeto wandi Zefenia amba: “Nkashinta ludimi lwa bantu ke ludimi lutōka tō, amba abo bonso bete dijina dya Yehova, mwanda wa bamwingidile kipuji na kipuji.”​—Zef. 3:9.

¹⁴ Kupwa Yehova wāpa Zefenia mushipiditu wa kushintulula mukekadila bana na bana badi mu bumo ntanda yonso, batōka, mobekadile’ko dyalelo amba: “Boba bakashala mu Isalela kebakalongapo bukondame; kebakabepapo bubela, kadi ludimi lwa bongojani kelukatanwapo mu byakanwa byabo; bakadya ne kulāla, kekukekalapo muntu nansha umo wa kwibakwatyija moyo.” (Zef. 3:13) Byotwivwanije senene Kinenwa kya Yehova kya bubine, twibashinte milangwe yetu ne kukwatañanya būmi bwetu na misoñanya ya Yehova, o mwanda twibabwanye kwingidila mu bumo. Tuloñanga bintu bimweka bu kebibwanikapo ku meso a boba bamona myanda na meso a bu muntu. Bine, twi bantu beshile na bakwabo, twi bantu ba Leza, bamupeja bulēme pano pa ntanda ponso.​—Mika 2:12.