“Sanswai Banabenu Betabije”
Binenwa bya ku bukomo bwa mushipiditu sandu bya kino kishinte byālembelwe pano ke padi myaka tununu tubidi. (1 Pet. 2:17, MB) Ino pano po pene potufwaninwe kwibilonda! I muswelo’ka otubwanya kusanswa banabetu betabije ba ntanda yonso mikatampe nenki? Ne byotudi mu ino ntanda miyule mushikwa, tukayuka namani amba buswe bwetu kebusapo kushinika? (Mat. 24:12) Tala shi ubwanya kulondolola ku bino bipangujo potala video Toute la communauté des frères.
(1) I kitatyi’ka kyotwatwelele mu buno bubana na bana bwa bene Kidishitu? (2) I mingilo’ka isatu yotwingila pamo na banabetu ba ntanda yonso? (3) Lombola muswelo usumininwe banabetu kusapula (a) mu ntanda ya mufula mwa Alaska, (b) ku makula makatakata a mu Bulaya, ne (c) mu mató a mu Peru? (4) Mwanda waka ketufwaninwepo kufwatakanya amba busapudi i mwingilo’nka na yonso? (5) Leta bimfwa bilombola busengi ne kwikwatakanya kwa Batumoni ba Yehova (a) pa kupwa kwa kintenshi, (b) pa kupwa kwa kipumpu, ne (c) mu divita dya basivile? (6) Kuno kwetu, i muswelo’ka otubwanya kulombola kiyukeno kikatampe kya bubana na bana bwetu bwa bwine Kidishitu? (Yoa. 13:35) (7) Le i madyese’ka otwimwenine mu kwingidila pamo mwanda wa kūbaka Mobo a Bulopwe? (8) Le banabetu ba Kutunduka kwa Bulaya ne ba mu Rushi bashele namani bakomo ku mushipiditu mu kitatyi kya kukankajibwa? (9) I bukomo’ka bwa kutendelwa bulonga Batumoni bavule mwanda wa kutanwa ku bitango, ne mwanda waka? (10) Le ino video ibakomeja namani kusumininwa kobe kwa (a) kutōta Yehova ku kipwilo pamo na banabenu, (b) kukwasha banabenu pobadi mu kufudilwa, ne (c) kusapula na dikōkeji mu kitatyi ne mu ngikadilo yo-yonso pafudile bukomo bobe? (11) I muswelo’ka otubwanya kwingidija ino video mu busapudi, ne kitatyi’ka?
Kitungo kikatampe kyotutwelele mu bubana na bana bwa bwine Kidishitu i buswe botuswele Yehova. Tusenswe kwifunda myanda yandi ne kusapwila’yo bakwabo. Kadi tusenswe boba baswedibwe na Yehova. Potwibakwasha mu kufudilwa kwabo, ketwilaijangapo Leza etufwije’ko, mhm. Inoko batwe tufwijanga’ko Leza, mwanda tumwene bubana na bana bwetu bwa bwine Kidishitu bu kyabuntu kitambile kwadi. Pano penda pafula ano mafuku a mfulo mayule nshikani, tulombolei nyeke buswe bwa kuswa kisaka kyonso kya banabetu betabije!