Kyotuswidile Kisaka Kyonso kya Banabetu

Mu ino ntanda ya dyalelo mwakubulwa buswe, le tubwanya namani kulama buswe bwake mudilo botuswele banabetu ba ku mushipiditu? (1 Pet. 2:17) I muswelo’ka otukokeja kulombola bakwetu amba kisaka kya banabetu kyabine na bine kisambakene umbuo onso kidi’ko binebine? (Mat. 23:8) I na kwibatadija bande wa video Toute la communauté de nos frères (Kisaka Kyonso kya Banabetu). Ulombola buluji botwiswidile batwe bonso. Tala shi ubwanya kulondolola bino bipangujo:

(1) I mingilo’ka isatu yotwingilanga batwe bonso na banabetu ba pi na pi? (2) Lelo banabetu baloñanga bika bilombola amba i basumininwe kusapula (a) mu ntanda mutuputupu mu Alaska, (b) mu byabu bikatampe bya mu Bulaya, ne (c) mu mató metyinye a mu Peru? (3) Lelo i kingidilwa’ka kimo kifike’po kisapulwanga nakyo? (4) Mwanda waka ketufwaninwepo nansha dimo kulanga amba busapudi i mwingilo’tu nao’nka nabya mwikadile mingilo yonso? (5) Leta bifwa bilombola amba Batumoni ba Yehova beseñanga ne kwikwasha abo bonso mu bitatyi bya tusua​—kifwa bintenshi, bimpumpu, ne mavita elwa ba kibundi na ba kibundi. (Tala binene Takao pa paje 23 mu Réveillez-vous ! wa 22 Kweji 8, 1995, ne binene Kotoyo pa paje 20 mu Réveillez-vous ! wa 22 Kweji 8, 1996.) (6) I mu miswelo’ka mifike’po yotukokeja batwe bonso kulombola kiyukeno kine kikatampe kiyukilwanga’po kisaka kya banabetu kya bwine Kidishitu? (Yoa. 13:35) (7) I bintu’ka byotukokeja kulonga bilombola amba tukwete na mutyika kupwila kwetu kwa pa kipwilo? (8) Kwikala na Njibo ya Bulopwe ya kupwidila’mo kukunkanga muswelo’ka boba bādi babudilwe’yo dibajinji? (9) Banabetu ba mu Bulaya bwa Kutunduka ne ba mu Rusi balamine namani būmi bwabo bwa ku mushipiditu pobadi mu kukankajibwa? (10) Nansha ke pano, i bukomo’ka bwa kashā buloñanga Batumoni bavule bwa kukatanwa ku bitango, ne mwanda waka? Byonso bino bibakutenga namani ku mutyima? (11) Mwanda waka wi musumininwe kutōta pamo umbumo, kukwasha bakwabo mu bitatyi bya bufudile, ne kusapula na kikōkeji kitatyi kyo-kyonso ne na bukomo bobe bonso? (12) I kika kinenenwa amba i kipite buya kwikala na bande obe, mwa kulombwela’ye bantu bavulevule basangela musapu?