Loelelwa mu Kinenwa kya Leza

KEYE wa nsangaji shandi yewa muntu ‘uloelelwe mu mukanda wa bijila wa Yehova.’ Muntu wa uno muswelo utañanga Kinenwa kya Leza ‘na diwi ditūke dyuba ne bufuku.’ (Mit. 1:1, 2) Lelo nobe wikalanga na kuno kuloelelwa? Lelo ukokeja kuvudija namani nsangaji ikuletela Kinenwa kya Leza?

Ivwana Panena Yehova

Kokatanga’nka bishima kete, mhm. Fwatakanya ne mwādi mupityila myanda yotanga. Langidija ne mawi a boba bānene myanda yotanga’ya. Shi utanga mashapita a ñanjilo a mu Bible, teja Yehova mwine mwasokwela bityebitye bintu byalonga mwanda wa ntanda ikale mifwaninwe kwikala’po muntu. Ivwana pasapwila wandi Mwana, Sendwe Mwine Mukata, amba kitatyi kibabwana kya kupanga bantu babajinji. Fwatakanya mupityila ino myanda: Ba Adama ne Eva abatomboka, Leza webatyibila butyibi, kupwa webalupula mu Paladisa. (Ngalwilo, shap. 1-3) Wimone na abe ubezemuka potanga amba diwi ditamba mūlu dibatela Yesu Kidishitu amba i Mwanā Leza, muswedibwe, mwine utuminwe na Leza kwiya kujimijija bantu būmi bwandi. (Mat. 3:16, 17) Tompa kufwatakanya mwālongele mutumibwa Yoano pa kwivwana Yehova unena na kawi mbila’mba: “Monaipo bidi, byo mpangulula byonso ke bipya.” (Kus. 21:5) Bine, kutanga Kinenwa kya Leza namino i kintu kya kuloelelwa!

Tanga nyeke nsekununi ilembelwe ku bukomo bwa mushipiditu, bine kukabulwepo kuyuka amba Yehova i muntu udi palampe kadi ulenga ne nzuba. Kadi ukemona amba ubafwena bininge Yewa wituswele, witufwila lusa, witukwasha shi twielela’ko kulonga kiswa-mutyima kyandi na kwityepeja, kadi witulombola mwa kubwaninya bintu byonso byotulonga.​—Yos. 1:8; Mit. 8:1; Is. 41:10.

Mu kupityija kitatyi kivule mu kutanga Bible, mo mu kutana kufukatyija mutyima kukatampe pa kumona muvudila buyuki bwa kiswa-mutyima kya Leza podi. Ino kuloelelwa kobe kukapita ne pano pene. Shi butangi bobe bukupa bukwashi bukusakila mwa kupwila myanda na tunangu, kukabulwepo kwiivwana mwēivwanine mulembi wa Mitōto, wānene amba: “Bivulujo byobe i bya kutendelwa. O mwanda muya wami wibilamine.” (Mit. 119:129, NW) Kadi ukasangala mpata kitatyi kyokanza kunañuna mu Bisonekwa misoñanya yalamuna mulangilo obe ne masakila obe mungya mashinda a Leza.​—Is. 55:8, 9.

Bible witupanga buludiki bwa mu mwikadilo bwitukinga ku bibi ne kwitulombola dishinda diyampe. Ponso potutanga’ye, tumonanga amba Yehova ye Tata uyukile bibi biketutana shi tutweje mutwe mu bilokoloko bya ngitu yakubulwa kubwaninina. Kasakangapo tususuke pangala pa bipa bibi kebibulwangapo kulupuka ku kufutulula misoñanya yandi milumbuluke ya mu mwikadilo. Ino aye witutele mutyima, kadi usakanga twikale na būmi buyampe shē. Butangi bwa Kinenwa kyandi bwitukwashanga tukwate na mutyika mukatampe madyese otudi nao a kwikala kwaikele Leza kadi Tata wetu wa mūlu.

Tanga Bible Difuku ne Difuku

Mulembi wa mitōto wēsambīle pa muntu utanga Kinenwa kya Leza difuku ne difuku amba: “Byonso byālonga bikalumbuluka.” (Mit. 1:3) I bya bine, nansha byotudi bakubulwa kubwaninina, nansha byotudi mu ngikadilo imbi ya bintu ya Satana, nansha bikanina Dyabola kwitubokota, kutanga difuku ne difuku myanda idi mu Kinenwa kya Leza ne kulonda’yo kuketubwanija kulonga kintu kyo-kyonso kitala pa kipwano kyotupwene na Yehova.

Byotutyintyidilwe na ino ngikadilo minunu, kutambula difuku ne difuku milangwe ya Umpangi, nansha’tu mu bitatyi bityetye kampanda, kukokeja kwitupa bukomo. Banabetu bamo bākutyilwe pangala pa lwitabijo lwabo bādi batanga mavese abala-anga kete obādi batana mu bishinte bya mapepala. Bādi batyiba mapapye patanwa ano mavese, kupwa bakwata’o ku mutwe kebalangulukila’po. Yehova nandi wēbesela pangala pa bukomo bwabo, mwanda bādi balonga bintu mungya ngikadilo yobādi’mo mwa kutambwila buyuki bwa mu Kinenwa kya Leza. (Mat. 5:3) Ino bavule umbukata mwetu tudi na kitatyi kivule kupita kyobādi nakyo. Ketwakilangai amba kutanga bukidibukidi vese umo wa mu Bible ku difuku kukokeja ako kwine kulonga bingelengele. Ino shi tusendulule bintu byotutangidije kumeso mwanda wa kutanga kipindi kampanda kya mu Bible difuku ne difuku, kulangulukila’po, ne kulonda’byo mu būmi bwetu, bine ketukabulwepo kweselwa madyese.

Eyo, kunena na bubine, mpangiko miyampe yotwitungīle ikokeja kuvutakanibwa. Shi ibavutakana, i biyampe tutangidije bintu bya mvubu ya binebine. Tulete kimfwa, ketukokejapo kushikilwa difuku dituntulu nansha mafuku abidi kutoma mema mpika ku kusaka kwetu. Ne mema a bubinebine nao mo monka, nansha shi tubatanwa na myanda’ka mu būmi bwetu, tufwaninwe kutūla’ko kitatyi kya kutalaja mutyima na ano mema.​—Bil. 17:11.

Tanga Kinenwa kya Leza Kyonso

Lelo kashā kodi mutange Bible yense mutuntulu? Bamo batuyukanga pa kwela milafwe ku kutanga’ye tamba ku Ngalwilo kutūla ku Kusokwelwa. O mwanda bavule basakile kutanga Bible yense mutuntulu bashilwile bidi na Bisonekwa bya Kingidiki bya Bwine Kidishitu. Mwanda waka? Kepabulwe padi i kusaka kobadi basaka kuyuka ino mikanda ya mu Bible moikadile na mvubu kobadi umo ne umo mwanda badi basaka kunanga mu mayo a Kidishitu. Pakwabo badi bamona amba Bisonekwa bya Kingidiki bya Bwine Kidishitu i bīpi pa kutanga​—kisengele kipindi kimo kya Bible pa biná. Ino pobapwile kutanga ino mikanda 27, bekwete’ko na mikanda 39 ya Bisonekwa bya Kihebelu, batanga’yo ne kuloelelwa baloelelwa’yo. Abo pa kupwa kutanga Bisonekwa bya Kihebelu, baseba kala dishinda dya kutanga Bible kitatyi ne kitatyi, penepo baendelela kumeso, batanga dya bubidi Bisonekwa bya Kingidiki bya Bwine Kidishitu, enka nabya kwimika mpika. Bine, nobe witūdile’ko butangi bwa difuku ne difuku bwa Kinenwa kya Leza bu kibidiji kyobe mu būmi bobe bonso.

Lelo mu kisaka nansha mu kipwilo kyetu mudi muntu kabwanyapo kutanga? Wabulwa’po kumunena ushilule kumutangila Bible difuku ne difuku? Abe mwine ukamwena’mo, aye nandi ukamwena’mo ponso palanguluka pa myanda yaivwana ne kwingidija’yo mu būmi bwandi.​—Kus. 1:3.

Mwenda mafuku, ubwanya kwitūdila’ko mpangiko pala pala ya pa bula ya kulonda mu butangi bobe bwa Bible. Imo mu ino mpangiko ikokeja kukwivwanija senene kukwatañana kwa bipindi bishileshile bya mu Bible. Shi Bible obe udi na bisonekwa bya kunyemena’ko, nankyo bikakulombola myanda mikwabo pala pala ne nsekununi ikwatañene nayo. Bibwanya kukuyukija myanda yālengeje kulembwe mitōto pala pala ne mikanda yālembelwe na batumibwa ba Yesu Kidishitu. Dibuku Étude perspicace des Écritures nadyo didi na myanda kapwila ya kuyukila’po bantu, bifuko, ne ngikadilo yobatelele mu Bible. Matabulo nao akokelanga milangwe ku kufikidila kwa bupolofeto bwa mu Bible, alombola i balopwe ne bapolofeto’ka bāikele’ko mu kitatyi kimo, atela ne mafuku a myeji asenselela ku oa ālongekele’mo myanda mivule ya mu Bible.

Ponso polanguluka pa byowifunda, kukabulwepo kwivwanija buluji bwādi bumwekela ngikadilo kampanda mu bantu ba Leza. Ukayuka ne kuyuka buluji bwādi butonona Yehova alonge bantu bandi bintu bya owa muswelo. Ukamona muswelo umonanga Yehova bilongwa bya imbikalo, bya mizo, ne bya muntu ne muntu. Kino kikakupa bujinguludi bukatampe bwa kuyuka mulangilo wa Leza.

Mānga ya mu Bible nayo ikakusangaja mpata shi ufwatakanya bifuko bine byāpityīle’po myanda’ya. Tulata twa matanda a mu Bible tulombolanga bifuko ne bula bwisubwidile kifuko kampanda na kifuko kankenge. Kimfwa, i dya pepi pāabukile bene Isalela Kalunga Katyila? Lelo Ntanda ya Mulao yādi na bukata’ka? Yesu wāendele kufika ne kwepi paādi wingila mwingilo wandi pano panshi? I bintu’ka byādi bimona mutumibwa Polo mu ñendo yandi ya bu mishonele? Tulata ne majina a bifuko nabyo bituntwilanga’ko myanda pala pala itobaja butangi bobe. Ino i kwepi kokokeja kutana tulata twa matanda atelelwe mu Bible? Tumo bidi tutanwa mu Bible Les Saintes Écritures — Traduction du monde nouveau. Dibuku Étude perspicace didi na kintu kya tulata 70, kadi kudi ne nondelo yato ku mfulo kwa volime imbajinji. Ingidija ne dibuku Index des publications de la Société Watch Tower mwa kutanina padi tulata tukwabo. Shi kudipo na ano mabuku, ingidija tulata tulupulwanga mu Kiteba kya Mulami, tukakukwasha mu butangi botanga Bible difuku ne difuku.

Mu Bisonekwa bya Kihebelu, Mulopwe Davida wātumbije’mo Yehova amba: “Abe Leza, mpango [“milangwe,” NW] yobe i mikomo kondi ne bungi bwayo i bukatampe.” (Mit. 139:17, BB) Mu Bisonekwa bya Kingidiki bya Bwine Kidishitu namo, mutumibwa Polo wātendele’mo Yehova mwanda wa kutema kwatemena “mu mityima yetu, kupana mwinya wa [buyuki bwa ntumbo bwa] Leza, monka mumpala mwa Yesu Kidishitu.” (2 Kod. 4:6) Ba Davida ne Polo bāikele’ko mu bitatyi bisubwile ku tutwa twa myaka, inoko abo bonso bādi baloelelwa mu Kinenwa kya Leza. Nobe ukokeja kuloelelwa’mo shi witūdile’ko kitatyi kya kutanga myanda yonso ikupele Yehova mu Kinenwa kyandi kisonekwe ku bukomo bwa mushipiditu.