Wipāne Mu Butangi

‘Endelela na kwipāna mu butangi, kwibēsashila, ne kwibafundija, poso’nka ami mfike kwako.’​—1 TEMOTE 4:13.

YEHOVA LEZA upēle bantu manwa akutendelwa a kwifunda kutanga ne kusoneka. Kadi witupele Kinenwa kyandi, Bible, mwanda wa twikale bafundijibwe senene. (Isaya 30:​20, 21) Ko kunena’mba, Bible witulombola mwa ‘kunangila’ pamo na mwādi munangila bakulutuba bādi bakaminwe Leza, kimfwa Abalahama, Isake, ne Yakoba. Tukokeja ‘kumona’ bana-bakaji bādi bepāne kudi Leza kimfwa Sala, Lebeka, ne Luta mwine Moabu wādi na kikokeji kya kulemeka bijila. Eyo, kadi tukokeja ‘kwivwana’ Yesu Kristu upāna Busapudi bwandi pa Lūlu. Tukokeja kwikala na ino nsangaji yonso ne bulombodi butamba mu Bisonekwa Bikola poso’nka shi twi batangi balumbuluke.

² Pakubulwa ne kutatāna kwine, Yesu Kristu muntu mubwaninine wādi na manwa a kutanga bilumbuluke, kadi wādi uyukile biyampe Bisonekwa bya Kihebelu. Omwanda nanshi, pāmutompele Dyabola, Yesu wāpitulukile mu Bisonekwa na kunena’mba: “Kisonekelwe.” (Mateo 4:​4, 7, 10) Difuku dimo pādi mu shinakoka wa Nazala, wātangile kipindi kimo kya bupolofeto bwa Isaya ku meso a bantu bonso, wēkingidija padi aye mwine. (Luka 4:​16-21) Ino lelo tukanena kika pamwanda utala batumibwa ba Yesu? Mu myanda yobāsonekele, pavule bādi batela’mo Bisonekwa bya Kihebelu. Nansha shi baludiki bene Yuda bādi bamona ba Petelo ne Yoano bu bantu bakubulwa kufunda masomo, bantu babitupu, mwanda kebāfundilepo ku masomo makatampe a Bahebelu, ino mikanda yobāsonekele ku bukomo bwa mushipiditu ilombola patōka’mba bādi bayukile kutanga ne kusoneka biyampe. (Bilongwa 4:13) Lelo manwa a kuyuka kutanga adi na mvubu mikatampe?

‘Katokwe Kandi Yewa Utanga na Diwi Ditunduke’

³ Kwifunda ne kwingidija buyuki bwabine bwa mu Bisonekwa kukokeja kwitupa būmi bwanyeke. (Yoano 17:3) Ba Tumoni twa Yehova bajingulwile’mba kidi na mvubu mikatampe kutanga ne kwifunda Mukanda Ukola ne mabuku a bwine-kristu etupa Leza kupityila ku kabumbo ka bakristu bashingwe-māni, umpika wabinebine ne wamanwa. (Mateo 24:​45-47) Bine, na kwingidija mabuku alupulwa na Sosiete Watch Tower, kimfwa Wiibidije Abe Mwine na Kusoma ne Kwandika, binunu bya bantu bafundanga kutanga, pano kebadi na buyuki bwa Kinenwa kya Leza bupāna būmi.

⁴ Kutanga, kwifunda, ne kwingidija Kinenwa kya Leza kulupulanga bipa bileta nsangaji. Kidi namino mwanda tusangajanga Leza kadi tumupanga buleme, omwanda tutambulanga madyese andi ne twikalanga na nsangaji. Yehova usakanga bengidi bandi bekale na nsangaji. Omwanda wāsoñenye babitobo bekale kutangila bantu ba mu Isalela wakala wandi Mukanda-wabijila. (Kupituluka 31:​9-12) Ezela mulembi ne bakwabo pobātangile Mukanda-wabijila ku meso a bantu bēbungile pamo mu Yelusalema, bāletele nshintulwilo yao yumvwanikwa senene, ne ‘kusepelela kukatampe’ byo bipa byālupukileko. (Nehemia 8:​6-8, 12) Polo mutumibwa mukristu wāsapwidile Temote mwingidi pamo nandi amba: ‘Endelela na kwipāna mu butangi, kwibēsashila, ne kwibafundija.’ (1 Temote 4:13) Mu bwalamuni bukwabo banena’mba: “Wipāne mu butangi bwa Bisonekwa.”​—New International Version.

⁵ Kusokwelwa 1:3 witulombola patōka’mba shi tusaka kwikala na nsangaji tufwaninwe kutanga ne kwingidija Kinenwa kya Leza. Betusapwila’mba: ‘Katōkwe kandi yewa utanga na diwi ditunduke ne boba bemvwana binenwa bidi mu buno bupolofeto, bengidija myanda isonekelwe’mo; mwanda kitatyi kitungwe kekidi pabwipi.’ Eyo, tufwaninwe kutanga na diwi ditunduke ne kwivwana binenwa bya Leza bya bupolofeto bidi mu Kusokwelwa ne mu Bisonekwa byonso. Muntu udi na nsangaji yabinebine i yewa ‘wa mutyima wandi mumutokelwe mu mukanda-wabijila wa Yehova, utanga mbila yandi na diwi ditūke dyuba ne bufuku.’ Kukalupuka bipa’ka? “Byonso byalonga bikalumbuluka.” (Mitōto 1:​1-3) Nanshi bulongolodi bwa Yehova budi na bubinga bwa kwitusoñanya kutanga ne kwifunda Kinenwa kyandi pakasuku, mu kisaka ne na balunda netu.

Wiibidije Kutanga ne Kulanguluka pa Byotanga

⁶ I muswelo’ka okokeja kuboila ñeni mu butangi bobe bwa Kinenwa kya Leza ne bwa mikanda ya bwine-kristu? Pakwabo ukokeja kumona’mba i kyakamweno kulonga mwādi mulongela Yoshua, muludiki wa bene Isalela wādi wakaminwe Leza. Bāmusoñenye’mba: “Uno Mukanda-wabijila uno’u kadi keukasonsolokapo mu kyakanwa kyobe, mhm, ino nanshi [ukatanga’mo na diwi ditūke] dyuba ne bufuku bwine, amba utentekele kulonga mwendele byonso bilembelwemo, mwanda nabya ukalongeja dishinda dyobe ke dilumbuluka, kadi nabya ukamona dyese.” (Yoshua 1:​8) ‘Kutanga’mo na diwi ditūke’ kishintulula kwinenena abe mwine na diwi dya munshimunshi. Uno muswelo wa kutanga uketukwasha, mwanda wa kulama myanda mu ñeni yetu. Yoshua wādi ufwaninwe kutanga Mukanda-wabijila bya Leza “dyuba ne bufuku,” ko kunena’mba kitatyi ne kitatyi. Uno muswelo wa kutanga wādi mulumbuluke kadi wādi upā bantu tunangu twa kuvuija biselwa byādi bibapa Leza. Netu tukokeja kumwena kamweno mu butangi bwa Kinenwa kya Leza bwa kitatyi ne kitatyi.

⁷ Potutanga Kinenwa kya Leza ketukilangai amba kutanga bukidibukidi kyo kidi na mvubu. Shi witudileko kitatyi kya kutanga Bible nansha mikanda mikwabo ya bwine-kristu mu kitatyi kampanda, ufwaninwe kutanga bityebitye. Kino kidi na kamweno kakatampe shi udi na kitungo kya kwivuluja myanda mikatampe ya mvubu. Kadi kitatyi kyotanga, languluka pa byotanga. Bandaula milangwe ya mulembi wa binenwa bidi mu Bible. Wiipangule abe mwine amba: ‘Lelo mulembi wādi na kitungo’ka? I muswelo’ka onkengidija ino myanda?’

⁸ Kitatyi kyotanga Mukanda Ukola, witudileko ne kitatyi kya kulanguluka pa byotanga. Kino kikakukwasha wivuluje nsekununi ya mu Bible ne kwingidija misoñanya ya mu Bisonekwa. Kulanguluka pa Kinenwa kya Leza ne kukwata myanda mikatampe ya mu Bisonekwa mu ñeni kukakupa muswelo wa kulupula myanda idi mu mutyima obe, kuleta malondololo abine kupitako kunena myanda ikakufityija mutyima mwenda mafuku. Lukindi lumo lwāsonekelwe ku bukomo bwa mushipiditu wa Leza lunena’mba: “Mutyima wa moloke ulanga pa kulondolola.”​—Nkindi 15:28.

Enzankanya Myanda Impya Yotanga na Myanda Yowabadikile Kutanga

⁹ Bakristu bavule betabijanga’mba kudi kitatyi kyobādi bayukile myanda mityetye’tu itala padi Leza, pa Kinenwa kyandi, ne pa mpango yandi. Inoko dyalelo, bano bakristu basapudi, bakokeja kushintulwila bakwabo myanda yālongekele tamba ku bupangi ne kitatyi kyālubile muntu, kwibayukija buluji bwa kitapwa kya Kristu, kulombola muswelo ukonakanibwa ino ngikadilo imbi ya bintu, ne kuyukija muswelo ukeselwa bantu bakikokeji bakekala na būmi bwanyeke mu paladisa pano pantanda. Bine kino kikalongeka mwanda bano bengidi ba Yehova batambulanga ‘buyuki bwinebwine bwa Leza’ kupityila ku bwifundi bwa Bible ne mikanda ya bwine-kristu. (Nkindi 2:​1-5) Bakwatañanyanga bityebitye myanda impya yobefunda na myanda yakala yobabadikile kwifunda.

¹⁰ Kukwatañanya myanda impya yotanga mu Bisonekwa na yoya yoyukile kala kileta kamweno ne mpalo. (Isaya 48:17) Shi kudi mbila nansha misoñanya ya Bible, nansha kadi milangwe yokumvwanijepo senene ilombwelwe, kwatañanya’yo na yoya yoyukile kala. Kwatañanya ino myanda na yowabadikile kwifunda isambila pa ‘kilomboji kya myanda yabukomo.’ (2 Temote 1:​13) Kimba myanda ikokeja kukukwasha uningije kipwano kyobe na Leza, utamije bu-muntu bobe bwa bwine-kristu, nansha ikokeja kukukwasha mwanda wa kusapula bubinebine bwa Bible ku bakwabo.

¹¹ Potanga kintu kampanda mu Bible kisambila pa mwiendelejo, tompa kujingulula musoñanya ulombwelwe’mo. Languluka pa uno mwanda, kadi tyiba mbila ya kuyuka kyokalonga kitatyi kyokatanwa mu ngikadilo ya muswelo umo. Yosefa mwana Yakoba wāpelele na kusumininwa kukatampe kwenda makoji na mukaja Potifela, wānene’mba: “Lelo nkalonga namani ne buno bubi bukatampe byamwiko namino? Mbulwe kupya mambo kudi Leza mwine’ni?” (Ngalwilo 39:​7-9) Mu ino nsekununi ilombola mwālongekele myanda, mudi musoñanya ulombwelwe’mo​—kwenda makoji i kupya mambo kudi Leza. Ukokeja kukwatañanya uno musoñanya na myanda mikwabo ya mu Kinenwa kya Leza yolamine mu ñeni yobe, kadi ukamwena kamweno mu buno buyuki kitatyi kikakufikila ngikadilo ikutonona ulonge bubi bwa uno muswelo.​—1 Kodinda 6:​9-11.

Tompa Kumona Myanda Isekunwinwe mu Bisonekwa

¹² Shi usaka kulama myanda mu ñeni yobe kitatyi kyotanga, tompa kumona mwālongekele myanda yotanga. Mona na meso a mutyima mwādi mwikadile kifuko, mobo, ne bantu bātenwe’po. Teleka mawi. Ivwana luvumba lwa mukate obatēka. Tompa kumona mupityila myanda. Mu uno muswelo butangi bobe bukakutenga pa mutyima, mwanda ukokeja kumona kibundi kyakala, kukanda ku lūlu lulampe, kutendela kumona bipangwa bitulumukwa, nansha kwimona ushikete pamo na bana-balume ne bana-bakaji bādi na lwitabijo lukatampe.

¹³ Kimfwa, shi utanga Batyibi 7:​19-22. Tompa kumona myanda ilongeka. Mutyibi Ngideoni ne bene Isalela bakomokomo tutwa tusatu bashikete kumfulo-mfūlo ya kitūlo kya Midyana. Ketudi kubwipi na nsaa dikumi ya kukyolwa, kungalwilo kwa “kilo kya bubidi.” Abo balami bene Midyana bāfika, mfindi nayo yāputa kitūlo kya balwana na bene Isalela bādi balēle. Tala! Ngideoni ne bantu bandi bapakete bimpungidi. Baselele milondo mikatampe ya mema mu maboko abo ku lunkuso ne bimuni munda mwayo. Ponka na ponka, milongo isatu ya bantu katwa ku kibumbo ne kibumbo bāvumija bimpungidi, bālala ne milondo, bātundula bimuni mūlu, kebela lubila’mba: “Kipete kya Yehova ne kya Ngideoni!” Abe papo utala konka ku kitūlo. Bine, bene Midyana bāshilula kunyema ne kwela ñanji! Bano bantu tutwa tusatu byobādi bendelela na kuvumija bimpungidi byabo, Leza waalamuna bipete bya bene Midyana kebenda beipaya abo bene na bene. Bene Midyana bānyema, Yehova wāpa bene Isalela bushindañani.

Kuboila Ñeni mu Byotwifunda

¹⁴ Shi tutanga Kinenwa kya Leza, tukokeja kuboila’mo ñeni mivule. Kimfwa, padi usaka kulombola bobe bana amba bafwaninwe kwikala na kwityepeja. Eyo, kikekala kipēla kumvwanija nshintulwilo ya myanda yānenwe mu bupolofeto butala padi Yotama mwanā Ngideoni. Shilula na kutanga Batyibi 9:8. Yotama wānene’mba: “Pa kitatyi’kya mityi yaenda kushinga mulopwe māni, abikale ko idi.” Mutyi wa umpafu, wa kikuyu, ne wa muñanza yāpela kubikikwa bulopwe. Ino kimuna kya mība kyāitabija kwikala muludiki. Shi utangila bobe bana ino nsekununi na diwi ditunduke, ukokeja kwibashintulwila’mba mityi ya mvubu ifunkila pa bantu babuleme bāpelele kitenta kya kubikala balunda nabo bene Isalela. Kimuna kya mība kyādi kingidijibwa pa kwenga māni kete, kifunkila pa bulopwe bwa Abimeleke wamitatulo, ntapani wādi usaka kubikala bakwabo ino wāipaibwa mwanda wa kufikidija bupolofeto bwa Yotama. (Batyibi, shapita 9) Lelo bana bakasaka kwikala bu kimuna kya mība pobakatama?

¹⁵ Mukanda wa Bible wa Luta ulombola mvubu ya kwikala na kikokeji kya kulemeka bijila. Kimfwa bantu ba mu kyenu kisaka batanga ino nsekununi na kwilondakana umo ne umo na diwi ditunduke ne batompa kulama myanda idi’mo. Mubamone Luta mwine Moabu wenda ku Betelema pamo ne inandi muko mukaja mufu, Naomi, kupwa mwaivwana Luta unena’mba: “Bobe bantu bakekalanga bami bantu, ne obe Leza, ye wami Leza.” (Luta 1:16) Mwamona kadi Luta mwana-mukaji usenswe mingilo ukōkolola ñano kunyuma kwa boba bādi bangula mu budimi bwa Boaza. Pano mubaivwana Boaza kamutendela’mba: “Kibundi kyonso kya bantu bami bayukile’mba abe wi mwana-mukaji mulumbuluke.” (Luta 3:11) Pakubulwa ne kwija kwine, Boaza wāsonga Luta. Kukwatañana na mpangiko yātudilweko ya kusonga mukaja mwanenu, Luta wābutwila “Naomi” mwana na Boaza. Luta wāikala ke nkambo wandya Davida kadi i nkambo wandya Yesu Kristu. Ebiya wāpebwa “mpalo miyampe’tu.” Pakwabo kadi, boba batañanga nsekununi ya mu Bisonekwa baboilanga’mo ñeni: Kulemeka bijila bya Yehova kuketupa madyese mavule.​—Luta 2:12; 4:​17-22; Nkindi 10:22; Mateo 1:​1, 5, 6.

¹⁶ Nsekununi ya Bahebelu basatu Shadelake, Meshake, ne Abedenengo ikokeja kwitukwasha ku kulama kikokeji kyetu kudi Leza kitatyi kyotuponena mu matompo. Tompa kumona uno mwanda mu ñeni yobe kitatyi kyotanga shapita wabusatu wa Danyele na diwi ditunduke. Nkishi mukatampe wa nsahabu ushimikilwe mu dilungu dya Dula, bambikavu bonso bene Babiloni bābungakenine kwine’kwa. Pāvumine byombanwa bāpona panshi kebatōta nkishi wāshimikile Mulopwe Nebukaneza. Abo bonso bālongele monka kutalulamo’nka Shadelake, Meshake, ne Abedenengo. Bāsapwila mulopwe na kusumininwa konso ne kalemo ponka’mba batwe ketukokejapo kutōta Leza obe nansha kwifukwila nkishi wa nsahabu. Bano bansongwalume Bahebelu bāelwa mu nkelwa ya mudilo utema. Ino i kika kyālongekele? Pakutala munda mwa nkelwa, mulopwe wāmona bana-balume baná bakomokomo, wabuná wifwene “umo wa ku bāna ba baleza bana-balume.” (Danyele 3:​25) Bano Bahebelu basatu bālupwilwa panja pa nkelwa, penepo Nebukaneza wāimana katumbija Leza wabo. Bine i madyese makatampe shi tutompa kumona ino nsekununi mu ñeni yetu. Kadi tukaboila’mo ñeni pamwanda utala kulama kikokeji kyabinebine kudi Yehova kitatyi kyotuponena mu matompo!

Kamweno Katamba ku Butangi bwa Bible mu Kisaka

¹⁷ Shi mutange Bible kitatyi ne kitatyi pamo na bantu ba mu kyenu kisaka, mukamwena’mo kamweno kakatampe. Kushilwila ku Ngalwilo, mukokeja kumona mu ñeni yenu muswelo wālongekele bupangi ne kutwela mu Paladisa, kikalo kibajinji kya bantu. Mukokeja kumona myanda yāfikile bakulutuba bakikokeji ne bisaka byabo, ne kulonda bene Isalela monso mobenda, ne mobābukila pa nshi myumu ya Kalunga Katyila. Mukokeja kumona muswelo wānekenye mukumbi Davida bulwi bwālwile na kampangala Ngodiata mwine Fidishitia. Kisaka kyobe kikokeja kumona muswelo wāubakilwe tempelo wa Yehova mu Yelusalema, kikokeja kumona mwāshidilwe tempelo masala na bibumbo bya bene Babiloni, ne kumona muswelo wāubakulwilwe tempelo mu kitatyi kya Mbikavu Zelububele. Pamo na bakumbi babimonyamalwa bādi kubwipi na Betelema, nenu mukokeja kwivwana musapu wa kubutulwa kwa Yesu wāsapwile mwikeulu. Mukokeja kuyuka myanda yonso mityemitye kamo ne kamo itala pa lubatyijo ne mwingilo wandi, mukamona muswelo wapāna būmi bwandi bu kitapwa, ne kusangela lusangukilo lwandi. Kadi mukokeja kukuta lwendo pamo na mutumibwa Polo ne kumona muswelo wādi ushimikwa bipwilo pādi penda pasambakana bwine-kristu koku ne koku. Kupwa, kisaka kyobe kikasangela kumona kimonwa kikatampe kyāmwene mutumibwa Yoano mu mukanda wa Kusokwelwa kifunkila pa mafuku akāya kumeso, kwela’mo ne Umbikalo wa Kristu wa Myaka Kanunu.

¹⁸ Shi mutanga Bible mu kisaka na diwi ditunduke, tangai’ye na kyanga mu muswelo utelekwa senene. Kitatyi kyomutanga bipindi bimo-bimo bya mu Bisonekwa, muntu umo wa mu kisaka​—kimfwa shabana​—ukokeja kutanga binenwa bishintulula ino nsekununi. Bantu bakwabo ba mu kyenu kisaka bakokeja kutanga myanda ya bantu bakwabo, mukatanga bipindi byomupelwe mu muswelo mwendelemo.

¹⁹ Shi utanwanga mu butangi bwa Bible bwa mu kisaka, mutangilo obe ukekala muyampe. Kadi ukavudija buyuki bobe butala padi Leza, kino kikakufwenya kubwipi nandi. Asafa wāimbile’mba: “Ino i kinengelele ami kufwena kudi Leza; namwene Mfumwami Leza, ke mumpakala mwami, na’mba nsapule mīngilo yobe yonsololo.” (Mitōto 73:28) Kyenu kisaka kikekala pamo bwa Mosesa wāendelele na “kukankamana bwa wamona Aye wakubulwa kumweka,” ke Yehova Leza kadi.​—Bahebelu 11:27.

Butangi ne Mwingilo wa Bwine-Kristu

²⁰ Kilokoloko kyetu kya kusaka kutōta ‘yewa wakubulwa kumweka’ kifwaninwe kwitutonona twitungile kitungo kya kwikala batangi balumbuluke. Manwa a kuyuka kutanga biyampe etukwashanga tulombole bukamoni butamba mu Kinenwa kya Leza. Nabubine etukwashanga twendelele na kutambila mu mwingilo wa busapudi bwa Bulopwe wāpele Yesu balondi bandi pānene’mba: “Endai . . . mukafundijei mizo yonso ya bantu nabo ke bāna-babwanga, kwibabatyija mu dijina dya Tata, ne dya Mwana, ne dya mushipiditu [s]andu. Kadi ne kwibalombola balaminine byonso byo nemulaīle ami mwine.” (Mateo 28:​19, 20; Bilongwa 1:8) Kusapula bukamoni o mwingilo mukatampe uvuijanga bantu ba Yehova, ne manwa a kuyuka kutanga etukwashanga tuvuije uno mwingilo.

²¹ Ufwaninwe kulonga bukomo mwanda wa kwikala mutangi mulumbuluke ne mufundiji wamanwa wa Kinenwa kya Leza. (Efisesa 6:17) Nanshi ‘longa bukomo bobe bonso wikale mwingidi mwitabijibwe na Leza, usapula bubinebine monka mokyolokele.’ (2 Temote 2:​15) Tamija buyuki bobe bwa Bisonekwa bya bubinebine ne manwa obe a bu Kamoni ka Yehova na kwipāna abe mwine mu butangi bwa Bible.

[Bipangujo]

1. I muswelo’ka otukokeja kumwena kamweno mu butangi bwa Bible?

2. I kika kilombola’mba Yesu ne batumibwa bandi bādi bayukile kutanga?

3. Mwanda waka kidi na mvubu kutanga Bisonekwa ne mikanda ya bwine-kristu?

4. (a) Mwanda waka kutanga, kwifunda, ne kwingidija Kinenwa kya Leza kuletanga kusepelela? (b) I kika kyāsapwidilwe Temote na Polo pamwanda utala kutanga?

5. Kusokwelwa 1:3 ushintulula muswelo’ka kukwatañana kudi pa kusepelela ne kutanga?

6. I kika kyādi kifwaninwe kutanga Yoshua, ne wādi umwena’mo kamweno muswelo’ka?

7. Mwanda waka ketufwaninwepo kutanga Kinenwa kya Leza bukidibukidi?

8. Mwanda waka kidi na mvubu kulanguluka kitatyi kyotutanga Bisonekwa?

9, 10. Butangi bwetu bwa Bible bukekala namani shi tukwatañanya Bisonekwa bipya na myanda yotwabadikile kwifunda?

11. I kika kyofwaninwe kulonga kitatyi kyotanga myanda kampanda mu Bible isambila pa mwiendelejo? Shintulula.

12. Mwanda waka tufwaninwe kutompa kumona mupityila myanda yotutanga mu Bible?

13. I muswelo’ka okokeja kushintulula myanda isekunwinwe mu Batyibi 7:​19-22?

14. I muswelo’ka otukokeja kwingidija myanda idi mu Batyibi shapita 9 mwanda wa kufundija mwana ayuke mvubu ya kwikala na kwityepeja?

15. Mukanda wa Luta ulombola muswelo’ka mvubu ya kwikala na kikokeji kya kulemeka bijila?

16. I matompo’ka ānekenye Bahebelu basatu, ne ino nsekununi ikokeja kwitukwasha muswelo’ka?

17. Tela mu kīpi myanda imo-imo ikokeja kuletela kisaka kyenu kamweno shi mutanga Bible pamo.

18, 19. I madingi’ka otwapebwa pamwanda utala kulonga butangi bwa Bible pamo mu kisaka?

20, 21. Mwingilo wetu wa busapudi ukwatañene muswelo’ka na manwa a kuyuka kutanga.

[Kapango pa paje 12]

Kitatyi kyomutanga Bible mu kisaka, tompai kumona nsekununi yomutanga mu ñeni yenu ne langulukai pa nshintulwilo yayo

Ukalondolola Namani?

◻ I mu buluji’ka motunenena amba kutanga Kinenwa kya Leza kuletanga kusepelela?

◻ Mwanda waka tufwaninwe kulanguluka pa myanda yotutanga mu Bible?

◻ Mwanda waka tufwaninwe kukwatañanya myanda ne kutompa kwiimona mu ñeni yetu kitatyi kyotutanga Bisonekwa?

◻ I muswelo’ka otukokeja kuboila ñeni mu butangi bwa Bible?

◻ Mwanda waka tufwaninwe kutanga Bible na diwi ditunduke mu kisaka, ne butangi bukwatañene muswelo’ka na mwingilo wetu wa bwine-kristu?