Kunena bwa Abe Wisamba

BANTU bavudile kwiivwana biyampe shi besamba na balunda. Binenwa byabo biilanga abyo bine. Bamo bekalanga bakabe mashi; bakwabo nabo bekaka. Inoko, kunena munenenwanga nyeke kwibakunkanga nabo besambe.

Ino shi kowisambe na muntu okuyukile, ke biyampepo kunena bya mitembwe nansha pamo bwa bantu beibidile bininge. O mwanda mu mizo imo, mīsambo yonso isambwa na bokuyukile ishilulanga na kulonda bibidiji kampanda. Shi ubapu kupa muntu bulēme bumufwaninwe, i biyampe penepa kunena na bwino muneneno wa kubulwa kulonda mpata bibidiji, kunena bwa abe wisamba.

Shi unena ku lukala, ufwaninwe kutadija. Muneneno wa mitembwe upelwijanga kupwila kwa bwine Kidishitu ne myanda mine inenwa. Mu ndimi imoimo, kudi mineneno kampanda ya kulonda shi wisamba na mutame, na mwadimu, na mulungu, nansha na mbutwile. (Tala bishima bingidijibwe mu Bilongwa 7:2 ne 13:16.) Ino shi kowisambe na mwinē pobe nansha na mulunda wa pa mutyima, muneneno washinta. Eyo, muneneno wetu ku lukala keufwaninwe shao kulonda bipitepite bisela kampanda, inoko ufwaninwe kwikala wa bulēme.

Ino kudi bintu kampanda bikokeja kumwekeja muntu amba unenanga na kwibeja kwampikwa kwendela’mo ne kulonda bisela bipitepite. Kimo bidi i mubundilo wa misemwa nansha mupangilo wa bishima. Biletanga makambakano shi muneni ukimba kupitulula binenwa enka mobikadilanga mu mabuku. Tuyukei amba divule binenwa bilembwe i bishile na binenwa bisambwa ku kanwa. Eyo, myanda yotukimbanga pa kuteakanya mwisambo tukimbanga’yo mu bintu bitampilwe. Pakwabo mwadijo mutampwe o wimanine’po kipindi. Ino shi unene milangwe enka moikadile mu dibuku nansha kutanga’yo pa mwadijo mutampwe kitatyi kyonena dishikulu, na bubine muneneno obe keukamwekapo bu mīsambo. Shi usaka kunena nyeke bwa abe wisamba, lupula milangwe mu bishima byobe kadi epuka kubunda misemwa mikomokomo.

Kintu kikwabo i mumongelo wa diwi dyobe. Muneneno mukomenene, wa kulonda bisela keo kulonda mwitūkijijo wa muswelo umo ne mutabwilo wa muswelo umo ponso. Ino mu mīsambo ya nyeke mwikalanga kwishila kwa mutabwilo ne kwitūkija pa byaba bya bula bwishileshile.

Inoko, shi wisamba ku meso a kibumbo kikatampe, ufwaninwe kuta mutyima ku kunena bwa abe wisamba koku ukandije diwi, umpuya wadyo, ne kubweja’ko buzanzamuke mwanda wa bantu bakute mutyima.

Pa kunena muneneno wa mīsambo mwendele’mo mu busapudi, ufwaninwe kwikala na kibidiji kya kunena biyampe difuku ne difuku. Ke kunenapo amba ufwaninwe’nka kufunda masomo malamala. Ino i biyampe kwiibidija kunena mu muswelo ulengeja bakwetu bevwane na bulēme myanda yonena. Lama kino mu ñeni, kupwa tala shi usakilwa kwisendulula pa myanda ilonda’ko’i mu mīsambo yobe ya difuku ne difuku.

1. Epuka mineneno ijilula mpata ndudi miyampe ya ludimi nansha ikumwekeja amba nobe udi mu mulongo wa bantu ba bilongwa bipela misoñanya ya Leza. Wijibe muneneno mudiuluke nansha muyayate, kukwatañana na madingi adi mu Kolose 3:8. Ne kadi, kunena muneneno wa bantu bonso ke bibipo. Muneneno wa bantu bonso o wibidilwe, kadi ulondanga mwisambilo mwitabijibwe na bantu bavule.

2. Epuka kupitulukapituluka mu binenwa ne mineneno imo yonka ponso posaka kuleta mulangwe mupya odi nao. Yuka kwingidija bishima bilupula biyampe milangwe yodi nayo ku mutyima.

3. Epuka kujokelajokela mu myanda, ino lama’yo biyampe mu ñeni; penepa koshilula kunena.

4. Epuka kuvutakanya milangwe miyampe na binenwa bivulevule. Ikala na kibidiji kya kunena patōkelela mu musemwa umo mwanda osaka bantu bakavuluke.

5. Nena mu muswelo ulombola amba ulēmekele bakwenu.