Kunena Byūbaka Kadi Bikankamika

MUSAPU otupelwe kusapula i myanda miyampe. Yesu wānene amba: “Myanda-miyampe īsaka kubadikila kusapwilwa ku mizo yonso ya bantu.” (Mako 13:10) Yesu mwine wāletele kimfwa kiyampe na kutangidija kumeso “myanda-miyampe ya bulopwe.” (Luka 4:43) Myanda yādi isapula batumibwa nayo itelwanga bu “myanda-miyampe ya Leza” ne bu “myanda-miyampe ya Kidishitu.” (1 Tes. 2:2; 2 Kod. 2:12) Musapu wa uno muswelo ūbakanga ne kukankamika.

Kukwatañana na “myanda-miyampe ya nyeke” yānenwe na ‘mwikeulu wādi wipapa mūlu,’ tunenanga bantu amba: “Akamwai Leza mumutumbike ntumbo.” (Kus. 14:6, 7) Tusapwilanga bantu ba pi na pi myanda itala Leza wa bine, dijina dyandi, ngikadilo yandi ya kutendelwa, mingilo yandi ya kwanwa, mpango yandi ya buswe, kwishintulwila kotukeshintulwila ku meso andi, ne bintu byasaka kotudi. Kadi mu myanda miyampe mubadilwa ne konakanya kukonakanya Yehova Leza bantu babi, bamupunika ne kona būmi bwa bakwabo. Ino ke batwepo ba kutyibila bantu botusapwila mambo. Kyotusaka nakampata i kumona bavule betabija musapu wa mu Bible, beumona amba i myanda miyampe kobadi.​—Nk. 2:20-22; Yoa. 5:22.

Tyepeja Myanda Izozeja. Eyo, mu būmi kemubulwangapo myanda izozeja. Ketupitengapo bupofu pa mine myanda’i. Shi koshilula mīsambo, ukokeja kutela makambano avutakanya ñeni ya bantu badi mu mwaba wenu ne kunenena’po mu kīpi. Ino divule, kwisambila’po bilabila kekudipo na mvubu mikatampe. Bantu bevwananga nyeke bimyanda bya bulanda, o mwanda kwisambila pa bintu bifityija mutyima kukokeja kwibalengeja bashite bibelo nansha matwi abo. Ku ngalwilo’tu kwa mīsambo yobe, longa buninge bwa kukokela milangwe ku bubinebine butūkija mutyima butanwa mu Kinenwa kya Leza. (Kus. 22:17) Kupwa, nansha shi muntu kasakilepo wendeleje mīsambo, inoko ukamushila kintu kampanda kyūbaka kyashala ulanguluka’po. Kino kikokeja kumupa mutyima wa kwivwana kitatyi kikwabo.

Ne pobakupa kunena mwisambo napo mo monka, kokapakika bemvwaniki milangwe izozeja mwanda’po’tu yo ivudile kusokolwa. Shi muneni waimanina bininge pa kukomenwa kukomenwe balopwe ba ino ntanda, pa myanda ya bupolapola ne butapani, ne pa busekese bwenda muongo pa ntanda, bantu bakokeja kutyumukwa mutyima. Shilula kunenena pa bintu bizozeja enka shi bidi na kitungo kampanda kyonenena’byo. Ino kunena myanda mityetye kete ya uno muswelo kukalombola amba mwisambo obe udi na mvubu. Kadi kubwanya kuyukanya bintu bikatampe bilengeja ngikadilo kampanda ne mwanda waka muswelo wa kupwija’yo ulombwelwe mu Bible o mufwaninwe. Shi bibwanika, nena myanda mipotoloke, inoko pampikwa kwimanina’nka pa makambakano.

Eyo, kebibwanikapo kadi ke biyampepo kutalula mu mwisambo myanda yonsololo izozeja. Ino kikoleja kidi’po i kuyuka mwa kusobela bintu biyampe ne bibi mwanda wa ku mfulo byonso bikale bikankamika. Pa kufikila pa kino, ufwaninwe kuyuka i myanda’ka ya kutweja’mo, i yepi ya kutalula, ne i pepi pa kutyityija. Yesu, mu Busapudi bwandi bwa ku Lūlu, wādyumwine bemvwaniki bandi bepuke mashinda a kwisakila a basonekeji ne Bafadiseo, wātela ne kutela bimfwa bibala-binga bibingija mwanda wandi. (Mat. 6:1, 2, 5, 16) Inoko, Yesu kāimaninepo pa bimfwa bizozeja bya boba bendeji ba bipwilo, ino i pa kwivwanija mashinda a bine a Leza ne kuyuka kwialonda mu būmi. (Mat. 6:3, 4, 6-15, 17-34) Mfulo mfulō myanda yākankamika’po bantu kashā!

Lama Muneneno Ukankamika. Shi abakupe kunena mu kyenu kipwilo mwisambo utala pa kintu kampanda kya mu mwingilo wa bwine Kidishitu, longa buninge bwa kūbaka kupita’ko kufutulula. Witale ne abe mwine shi bine uloñanga byobya byokankamika bakwenu balonge. (Loma 2:21, 22; Bah. 13:7) Nena na buswe, ke na nsungupo, mhm. (2 Kod. 2:4) Shi ukulupile na bubine amba banabenu betabije basakanga kusangaja Yehova, myanda yonena ikamwekeja kine kikulupiji’ki, ne kino kikekala na kamweno mpata. Tala mwāmwekejeje mutumibwa Polo kino kikulupiji, monka mokisonekelwe mu 1 Tesalonika 4:1-12; 2 Tesalonika 3:4, 5; ne mu Filemone 4, 8-14, 21.

Dimodimo i kiyampe bakulumpe badyumune banababo ku mwiendelejo kampanda mubi. Ino kwityepeja kukebapa mutyima wa kudyumuna banababo na mushipiditu wa butūkanye. (Ngat. 6:1) Muswelo unenwa myanda ufwaninwe kulombola amba boba badi mu kipwilo bakwetwe na bulēme. (1 Pet. 5:2, 3) Bible udingila bankasampe amba abo bo bene ba kuta mutyima ku kino kintu. (1 Tem. 4:12; 5:1, 2; 1 Pet. 5:5) Shi kilomba kutopeka, kulemununa, kolola bintu senene, nankyo kifwaninwe kulongwa kukwatañana na binena Bible mwine. (2 Tem. 3:16) Ke biyampepo muneni kuningila nansha kukupwila Bisonekwa ku mulangwe kampanda umutenekanga kala ku mutyima. Nansha shi bilomba kuleta madingi a kulemununañana, umpuya wa diwi dyonena nadyo mwisambo ukokeja nyeke kukankamika shi wimanina dibajinji pa kulombola muswelo wa kwepuka kulonga bibi, wa kupwija myanda, wa kunekenya makambakano, wa kulemununa kilongwa kibi, ne muswelo witukinga misoñanya ya Yehova.​—Mit. 119:1, 9-16.

Shi koteakanya dishikulu dyobe, ta mutyima mpata ku muswelo osa kufudija mwanda ne mwanda mukatampe ne dishikulu dyonso dituntulu. Byobya byonena ku mfulo byo bivulukwanga mafuku mavule. Lelo bikakankamika bantu?

Powisamba na Banabetu Betabije. Bengidi ba Yehova bakwete na mutyika kisense kyobekalanga nakyo ku kupwila kwa bwine Kidishitu. Bino i bitatyi bya kutūkijibwa mutyima ku mushipiditu. Bible witusoñanya amba twikale na mutyima wa ‘kwikankamika batwe bene na bene’ potwitana pamo kotutōtela. (Bah. 10:25) Ke kwikankamikapo enka mu bipindi byotunena ne mu nshintulwilo yotuleta ku kupwila kete, mhm, ino i ne mu mīsambo yotwisamba kumeso ne kupwa kwa kupwila.

Eyo, kwisambila pa bintu bya mu būmi bwetu bwa difuku ne difuku ke kubipo, ino kwikankamika kupityile konso i kokwa kwa kwisambila pa myanda ya ku mushipiditu. Kimfwa myanda yotwimwena mu mingilo ikola yotwingila. Kadi kwita mutyima biyampe nako kukankamikanga.

Ino i biyampe kudyumuka, mwanda ntanda itujokolokele idi na lupusa. Polo wātumīne bene Kidishitu ba mu Efisesa mukanda’mba: “Muleke bubela, mwisambe byabinebine wa ku mukwabo, wa ku mukwabo.” (Ef. 4:25) Kunena bubinebine pampikwa kunena bubela i ne kuleka kutumbija bintu ne bantu banwa bipitepite na ino ntanda. Yesu nandi wāletele kidyumu kya kwepuka “budimbidimbi bwa bupeta.” (Mat. 13:22) O mwanda potwisamba batwe bene na bene, tufwaninwe kutadija kutyina amba twakekala na budimbidimbi bwa kubeleñenya bakwetu bintu bya ku ngitu.​—1 Tem. 6:9, 10.

Mutumibwa Polo, pa kwitupa madingi mwanda wa twikale bantu bakankamika, witusoñanya tuleke kufwatakenya nansha kupēleka mwanetu wijiba kudya bintu kampanda mwanda i “mukōkekōke mu lwitabijo,” ko kunena amba, mwanda kevwanijepo ne pa mfulo mwikadile bwanapabo bwa bwine Kidishitu. I amo, shi tusaka mīsambo yetu ikale kūbaka bakwetu, tufwaninwe kubanga bibidiji byabo ne ludingo lobafikīle’po mu kutama ku mushipiditu. Bine i kya bulanda mpata kutūla “kyakukoleja mu dishinda dya mwanabo, nansha kyakumulengeja kupona”!​—Loma 14:1-4, 13, 19.

Boba bekonda na makambakano makatampe​—kimfwa misongo keidi mpwilo​—basangelanga mīsambo yūbaka. Padi muntu wa uno muswelo wielelanga’ko bya binebine pa kutanwa ku kupwila. Boba bayukile ngikadilo yadi’mo bakokeja kumwipangula’mba: “Ubaivwana’ko namani?” Bine, kakabulwepo kutendela kuta kobamutele mutyima. Inoko, padi misongo yandi ke mwandapo wa kwisambila’po shi tusaka kumukankamika bininge. Ino binenwa bya kumutendela ne kumufwija’ko bikokeja kumutenga ku mutyima mpata. Lelo umwene bintu bilombola amba mwanetu’wa uswele nyeke Yehova ne amba ūmininanga ngikadilo mikomo? Le ukankamikwanga na nshintulwilo yaletanga? Mwene nandi ukokeja kukankamikwa mpata shi twisambila nandi pa biyampe byalonga ne pa bintu byatuntwila ku kipwilo kupita’ko kwisambila pa byobya byakankalwa?​—1 Tes. 5:11.

Shi tusaka mīsambo yetu ikale ikankamika, i kipite buya kulonda mumweno umwene Yehova myanda yotwisambila’po. Mu Isalela wa kala, boba bādi banenena bantunguluji ba Yehova bibi ne kwiuninga pangala pa mana, Leza wēbafityilwe mutyima mpata. (Umb. 12:1-16; 21:5, 6) Tulombolanga amba twi baboile ñeni ku byobya bimfwa ponso potulēmeka bakulumpe ne kutendela bidibwa bya ku mushipiditu biletwa na umpika wa binebine ne wa manwa.​—1 Tem. 5:17.

Ke bikomopo bininge kutana bintu bya kamweno bya kwisamba na banabetu bene Kidishitu. Inoko, shi muntu uvudile’nka kufutululañana, alwila’ko kukupwila mīsambo yenu ku bintu byūbaka.

Twikale tusapwila bakwetu, tunena ku lukala, nansha twisamba na banabetu betabije, i biyampe twikale kunañuna mwa kulupwila mu kibīko kyetu kya mutyima “binenwa biyampe bikwasha kutama mu lwitabijo, biletela boba bemvwana’byo buntu.”​—Ef. 4:29, MB.