Twikalei Na Binenwa Byūbaka
1 Byotudi ‘mu bitatyi bikomokomo ne bya malwa,’ batwe bonso tusakanga kukankamikwa. (2 Tem. 3:1) Byājingulwile kala kino mu kitatyi kyandi, Polo wādi utele mutyima ku byaba byādi witana na bana babo pamo bwa mikenga yādi imupa muswelo wa ‘kwikankamika.’ Wēbakankamikile ‘balondelonde bintu bya kwiubaka abo bene na bene.’ (Lo. 1:11, 12; 14:19) Buno bukomo ‘bwaningije muya wa bana babwanga, kwibakankamika bashale nyeke bemanije mu lwitabijo.’ (Bil. 14:22) Dyalelo nadyo tudi na kyaka kikatampe kya kusaka kukankamikwa uno muswelo.
2 Binenwa byetu bikokeja kūbaka bakwabo, ne shi bikale byendele’mo, bine bikokeja kwikala “pamo’nka bwa myembe ya nsahabu mu bilala bya ndalama.” (Nk. 25:11) Kitatyi kyotuleta bushintuludi ku kupwila, ‘twikankamikanga batwe bene na bene.’ (Bah. 10:25) I kiyampe kwingidija ludimi lwetu na kusekununa myanda ipita mu busapudi, kufwijako muntu mukwabo nansha kwisambila pa bintu bya kumushipiditu. Kunena namino ‘i kiyampe mwanda wa kwiubaka, ne boba betwivwanija bakatana’mo kintu kampanda mwanda wa kamweno kabo.’—Ef. 4:29.
3 Twisambei Bintu Byūbaka: Mu Fidipai 4:8, Polo upāna’mo ano madingi mafwaninwe alombola muswelo wa kwingidija mokyendele kinenwa: kuta mutyima pakatampe ku byabinebine ne ku bilemekwa buleme, byonso bya boloke, byakubulwa kato ne bisanshibwe, byonso byanibwa, bilumbuluke ne bitendelwa. Tukokeja kukulupila byobya byotwisamba’mba i byabinebine ne byūbaka shi bitamba mu Kinenwa kya Leza. (Yoano 17:17) Kwipāna kwa bu-muntu bwetu kudi Leza, byobya byotwifunda kitatyi kya kupwila kwa pa kipwilo, kupyasakena kwetu kwa mu mwingilo ne bintu bikwabo bya uno muswelo umo onka i bintu byotufwaninwe kulemeka buleme. Misambo itala pa mbila ne misoñanya ya Kinenwa kya Leza iketukwasha bine twikale ‘batunangu mwanda wa lupandilo.’ (2 Tem. 3:15) Tulombolei kufwijako kwetu pa mwanda wa mwiendelejo wa kubulwa kakoba wa bantu badi mu bulongolodi butoka bwa Yehova. Tutumbijei bilongwa bilumbuluke bya buyampe bya bana betu. (Yoano 13:34, 35) Ku kibalwa kya bino bintu byonso byanibwa kutanwa ngikadilo ijila ya bwine-kristu pamo bwa lwitabijo, nsangaji, ndoe ne kitūkije-tyima, ngikadilo ilombolwa na bana betu. Kwisambila pa ino myanda milumbuluke ne itendelwa i ‘kiyampe, mwanda wa kūbaka’ bakwabo.—Loma 15:2.
4 Kikalanga kituzozeja bininge kitatyi kyotutanwa difuku ne difuku na mitabakano ya ino ntanda. I kilumbuluke kushiya bino bintu kufula mwanda wa kutompa ku buswe bwa bu bana na bana! Bitatyi bileme byotupityijanga pamo, i bupeta bukatampe botufwaninwe kusangela. Shi twikale nyeke bakankamika ne ba binenwa byūbaka, bine bakwabo bakokeja kukanena pamwanda wetu’mba: ‘Baunsengele pa mutyima.’—1 Kod. 16:18.