Kupituluka kwa Kukoma Mwanda

KUFUNDIJA kuyampe kulomba ne kupituluka. Shi mwanda wa mvubu ubanenwa divule, bemvwaniki kebakabulwepo kwiuvuluka. Shi mulangwe’wa upitulukwe’mo mu muswelo mwishile bityetye po pene, bakewivwanija biyampe shē.

Shi bemvwaniki bobe kebavulukapo byonena, binenwa byobe kebikālamunapo byobakulupile nansha mwikadilo wabo wa umbūmi. Bakanza’nka kulanga myanda yonena ukoma bininge.

Yehova, Mufundiji wetu Mukatakata, i mwitushile kimfwa kya kupituluka mu myanda. Wāpele muzo wa Isalela Mbila Dikumi. Wāivwanije muzo mine mbila’i ku Lūlu lwa Shinai kupityila kudi mwikeulu musedi wa myanda. Mwenda mafuku, wālemba’yo ne kupa wāpa’yo Mosesa. (Div. 20:1-17; 31:18; Kup. 5:22) Kupwa Yehova wāludika Mosesa, nandi wānena dipya ino mbila ku meso a muzo, abo kebatwelele mu Ntanda ya Mulao; kadi Mosesa pa kutononwa na mushipiditu sandu, wālemba’yo, pamo na motwiitanina mu Kupituluka 5:6-21. Mu mbila yāpelwe Isalela mwādi ne musoñanya wa kuswa Yehova ne kumwingidila na mutyima, muya, ne bukomo bwabo bonso. Uno musoñanya nao wādi upitulukwa’mo divulevule. (Kup. 6:5; 10:12; 11:13; 30:6) Mwanda waka? Mwanda, enka na mwānenene’kyo Yesu, kyo kyādi kijila “kitabukile bukata ne bulēme bwine.” (Mat. 22:34-38, MB) Yehova, kupityila kudi mupolofeto Yelemia, wāvulwije bantu ba Yuda misunsa 20 ne musubu amba kumukōkela mu bintu byonso byaādi wibasoñanya i mwanda musumininwe. (Yel. 7:23; 11:4; 12:17; 19:15) Kadi, kupityila kudi Ezekyele, Leza wānena misunsa 60 ne musubu amba mizo ‘ikayuka’mba ami ne Yehova.’​—Ezek. 6:10; 38:23.

Kadi tumona mu nsekununi ya mwingilo wa Yesu amba wādi nandi wingidija biyampe kupituluka. Tulete kimfwa kya Maevanjile aná​—imo ne imo ilombolanga myanda inenwe kala mu Evanjile imo nansha mavule, inoko mu muswelo mwishile bityetye na ya makwabo. Ko kunena’mba, mu bufundiji bwandi, Yesu wādi unena mwanda umo onka wa bufundiji misunsa mivule, inoko mu miswelo pala pala. (Mako 9:34-37; 10:35-45; Yoa. 13:2-17) Kadi paādi ku Lūlu lwa Impafu mafuku matyetye kumeso kwa kufwa, wādi unena upituluka mwanda wa kukoma ano madingi a mvubu amba: “Endelelai na kukesha, mwanda kemuyukilepo difuku dine dīya Mfumwenu.”​—Mat. 24:42; 25:13, NW.

Mu Mwingilo wa Budimi. Posapwilanga bantu, ukulupilanga amba bakavuluka byonena. Kupituluka biyampe mu myanda kubwanya kukulengeja ufikile pa kino kitungo.

Divule, kupituluka mu mwanda kitatyi kine kyonena’o’kya ko kubwanya kukuna’o mu ñeni ya muntu. O mwanda shi ubapu kutanga kisonekwa, ufwaninwe kukoma’kyo na kwimanina pa kipindi kya mvubu, ebiya waipangula’mba: “Le ubajingulula mwilondele bishima bya mu kino kisonekwa?”

Kadi i biyampe kwingidija misemwa ya mfulo mobifwaninwe. Kimfwa, ubwanya kunena’mba: “Nkulupile amba mwanda mukatampe osa kuvuluka mu mīsambo yetu i uno . . .” Kupwa nena’o dipya mu muswelo upēla. Padi i mulangwe pamo bwa uno: “Mpango ya Leza i ya kwalamuna ntanda ke paladisa. Ino mpango isa kufikidila binebine.” Nansha uno: “Bible ulombola patōka amba tudi mu mafuku a mfulo a ino ngikadilo ya bintu. Shi tusaka kupanda ku mfulo yayo, tufwaninwe kufunda byobya bisaka Leza kotudi.” Nansha padi i uno: “Monka motwekimwena, Bible uleta madingi mafwaninwe a mwa kulwila na makambakano a mu kisaka.” Mu byaba bikwabo, ukokeja’tu kupituluka mu binenwa bya mu Bible bu o mwanda wa kuvuluka. Inoko, kupituluka biyampe namino kulomba kwiteakanya kala mu ñeni.

Mu kujokela’mo kupya, ne pa kwendeja bifundwa bya Bible, kupituluka kulomba padi kwipangula bipangujo bya kupituluka.

Shi muntu wamone amba i bikomo kwivwanija nansha kulonda madingi kampanda a mu Bible, ukokeja kutonga kwisambila’po misunsa mivule yoiya. Longa buninge bwa kushintulula’o mu miswelo pala pala. Mīsambo keifwaninwepo kulepa mpata, ino ifwaninwe kukankamika mwifundi ashilule kulanga nyeke pa mwanda’wa. Vuluka, Yesu wāpitulukile myanda uno muswelo pa kukwasha bandi bana ba bwanga banekenye kilokoloko kyabo kya kusaka kwikala pa kifuko kibajinji.​—Mat. 18:1-6; 20:20-28; Luka 22:24-27.

Ponena Dishikulu. Shi unena dishikulu ku lukala, kitungo kyobe ke kunenapo’tu myanda kubapu. Ino usakanga bemvwaniki bevwanije’yo, bavuluke’yo, ne kwingidija’yo. Pa kufikila pa kino, ingidija biyampe bwino bwa kupituluka.

Inoko, shi upituluke mu myanda mikatampe misunsa mipite’byo kuvula, ukokeja kupuakanya bemvwaniki bobe. Sañuna biyampe shē myanda ifwaninwe kukomwa bya binebine. Divule ino ikalanga myanda mikatampe ivungulwilwe nayo dishikulu dyobe, ino ikokeja kwikala ne milangwe mikwabo ya mvubu mpata ku bemvwaniki bobe.

Pa kusaka kupituluka, ukokeja padi kutela kala myanda mikatampe mu ntwelelo. Tela’yo mu binenwa bīpi bilombola kikonge kya myanda yonso yosa kunena, mu bipangujo, nansha bu bimfwa bīpi bilombola makambakano alomba kuyuka mwa kupwijija’o. Ukokeja kutela buvule bwa myanda mikatampe ne kwiibala mu mulongo. Kupwa vungulula umo ne umo mu bula bwa dishikulu dyobe. Ukokeja kukoma myanda mu kilu kya dishikulu dyobe na kunena dipya mwanda ne mwanda mukatampe kumeso kwa kutundulukila ku mukwabo. Nansha ukokeja kwiikoma na kuleta kimfwa kilombola mwa kwingidijija mwanda mukatampe’wa. Ne kadi myanda mikatampe ikokeja kukomwa dikwabo ku mvuyo na kupituluka’mo, na kwiilupwila patōka koku utela myanda īpatanya nayo, na kulondolola bipangujo byowadi kala wipangwile, nansha na kulombola mu kīpi mukapwila makambakano owatelanga kala.

Kutentekela pa bino, muneni wa bwino ubandaulanga biyampe shē bantu badi mu bemvwaniki bandi. Shi kudi bamo bakolelwa kwivwanija mulangwe kampanda, muneni ukayuka kino. Shi mwanda’wa udi na mvubu, ukapituluka’mo dikwabo. Inoko, kupituluka bishima bimo byonka kukokeja kumukankaja kufikila pa kitungo kyandi. Kufundija kulombanga bivule kupita bino. Mufundiji ufwaninwe kuyuka kushinta. Ukokeja kutweja myanda yakadipo uteakenye kala mu dishikulu dyandi. Kuyuka kuvuija bisakibwa bya bemvwaniki bobe mu uno muswelo ko kukalombola bya binebine amba wi mufundiji wa bwino.