Kulupwila Myanda Mikatampe Patōka

LELO myanda mikatampe ya mwisambo i myanda’ka? Ino myanda ke milangwepo’tu isangaja inenwa lukusu. Ino i milangwe ya mvubu ishintululwa kyaba kilampe. I milangwe ikulengeja ufikile pa kitungo kyobe.

Kikatampe kya kukukwasha ulupwile myanda mikatampe patōka i kusañuna ne kulongolola milangwe senene. Kukimba myanda ya kunena mu mwisambo kuvudile kusokweja bantu milangwe mivule ikoma ne kunena’yo yonso. Ino ukayuka namani amba ino yo ya kunena?

Dibajinji, tala bemvwaniki bobe. Lelo bavule bayukile biyampe mwanda osa kwisambila’po’ni, nansha beuyukile’tu nabyanabya? Lelo bavule betabije binena Bible pa mwine mwanda’u’ni, nansha bamo batatananga’o? I bikoleja’ka byobalwanga nabyo umbūmi bwa bukile bukya pobaloñanga buninge bwa kwingidija binena Bible pa uno mwanda? Dya bubidi, tadija shi ulamine binebine kitungo kyobe pa kunena ku meso a bano bemvwaniki mwanda mwine osaka kwibalombola. Ingidija ano madingi abidi, bandaula myanda, kupwa lama’nka yoya itaba senene kete.

Shi i bakupe mwadijo udi kala na mutwe wa mwanda ne myanda mikatampe, nankyo ufwaninwe kwiulonda. Inoko, byonena bikekala na mvubu mpata shi ulamine misoñanya yotwatela kungala’ku kitatyi kyovungulula mwanda ne mwanda mukatampe. Shi kebakupelepo mwadijo, nabya i abe mwine wa kutonga myanda mikatampe.

Shi ukwete biyampe shē myanda mikatampe mu ñeni ne kulongolola myanda mityemitye munshi mwayo, bine ukapēlelwa pa kunena mwisambo obe. Na bubine, bemvwaniki kebakabulwepo kumwena’ko.

Miswelo Pala Pala ya Kulongolola Myanda Yobe. Kudi manwa mavule a kulonda pa kulongolola kilu kya mwisambo obe. Shi wiebidile, usaka kumona amba mavule etabanga biyampe, kukwatañana na kitungo kyobe.

Manwa apēla i a kwabanya myanda mungya kwiifwana kwayo. (Mwanda mukatampe onso udi na mvubu, ke-muntu o ulengeja bemvwaniki bobe bemvwane mwanda owisambila’po, kadi o ukukwasha ufikile pa kitungo kya mwisambo obe.) Manwa makwabo i kulonda ndudi ya bitatyi. (Kimfwa, myanda ya kumeso kwa Dilobe ikokeja kulondwa na myanda ya kumeso kwa konakanibwa kwa Yelusalema mu 70 K.K., kupwa yalondwa na myanda ya mu ino yetu myaka.) Manwa a busatu i a kuyuka nsulo ne kipa. (Ano manwa akokeja kulondwa mu miswelo yonso ibidi. Kimfwa, ukokeja kushilula na mwanda wa dyalelo, kipa, kupwa kolombola nsulo yao.) Manwa a buná i kulombola kwishila kwa bintu. (Ukokeja kushiyañanya biyampe na bibi, bikankamika nabyo na bityumuna mutyima) Dimodimo ukokeja kwingidija manwa pala pala mu mwisambo umo.

Pāikele Shitevani kutwikwa myanda ya bubela ku meso a Sanhedrini, kidye kya Bayuda, wānene mwisambo munane wālondele ndudi ya bitatyi. Shi utange mu Bilongwa 7:2-53, usa kumona amba wātongele myanda na kitungo kampanda. Shitevani wāyukile dibajinji amba nsekununi yasekununa keibwanyapo kupatanibwa na bemvwaniki bandi. Penepo wālombola patōka amba nansha Yosefa byaāelelwe na banababo, Leza wāmwingidije mwanda wa kuleta lupandilo. Kupwa, wālombola amba Bayuda kebākōkelepo Mosesa, mwine wādi wingidijibwa na Leza. Ebiya wāvuya na kunena ukoma amba mushipiditu wādi na Bayuda ba nkongo ya kala o onka waikele ne na boba baipaile Yesu Kidishitu.

Kokavudija Myanda Mikatampe. Kuvungulula mutwe wa mwanda kulombanga myanda ya mvubu ibala-inga kete. Divule ikokeja kubalwa ku minwe ya kikasala kimo. Kidi namino nansha shi usa kunena minite 5, minite 10, minite 30, nansha bilampe kupita pano. Kokolwa kukimba kulupwila patōka myanda mikatampe mivulevule. Bemvwaniki bobe bakokeja kwivwanija myanda ibala-inga kete mu mwisambo umo. Shi mwisambo i mulampe, ne myanda mikatampe nayo ifwaninwe kwikala na bukomo kadi mipotoloke senene shē.

Nansha shi ubaingidija myanda mikatampe inga, yuka kuvungulula umo ne umo ne pa mfulo. Pa bemvwaniki kitatyi kibwane kya kubandaula mwanda ne mwanda mukatampe kufika ne byoulamata mu ñeni yabo.

Mwisambo obe ufwaninwe kumweka amba i upēla. Kupēleja’o kekwimaninepo pa buvule bwa myanda yonena. Shi milangwe yobe i mikongakanibwe mu tumitwe twa myanda tubala-tunga, kadi uvungulule’to kamo ne kamo pa bula, mwisambo ukapēla kulonda ao’ko mukomo kwilwa.

Lupwila Patōka Myanda Yobe Mikatampe. Shi myanda yobe i milongololwe senene, kukakolelwapo kukoma buluji bwa myanda yobe mikatampe mu buneni bobe.

Muswelo mukatampe wa kulupwila myanda mikatampe patōka i kutela myanda ibingija’yo, bisonekwa, ne bintu bikwabo mwa kukokela milangwe pa mulangwe mukatampe ne kwiutyityija. Myanda mityemitye yonso ifwaninwe kutōkeja, kubingija, nansha kutyityija mwanda mukatampe. Kokabweja’mo milangwe yampikwa mvubu amba mwanda’po’tu isangaja. Povungulula myanda mityemitye, lombola patōka moikwatañenine na mwanda mukatampe oibingija. Kokashila bemvwaniki kiselwa kya kufwatakanya mobikwatañenine. Ukokeja kulombola kuno kukwatañana na kupituluka mu bishima bikatampe bilupwila mulangwe mukatampe patōka nansha na kupituluka kyaba ne kyaba mulangwe mwine udi mu mwanda mukatampe’wa.

Baneni bamo balupwilanga myanda mikatampe patōka na kwiibala. Eyo, uno nao i muswelo kampanda wa kulupwila myanda mikatampe patōka, inoko keufwaninwe kupingakena pa kutonga myanda mine na katentekeji ne kwiivungulula mu ndudi.

Ukokeja kutonga’tu kunena mwanda mukatampe ku ñanjilo, kumeso kwa kunena milangwe iubingija. Kino kikakwasha bemvwaniki banañune mvubu ya bilonda’ko, kadi kikakoma ne mwanda mukatampe mwine. Ukokeja kadi kukoma mwanda na kwiunena mu kīpi shi ubapu kwiuvungulula ne pa mfulo.

Mu Mwingilo wa Budimi. Misoñanya yanenwa kungala’ku keidipo na mvubu enka mu mashikulu a ku lukala kete, ino i ne mu mīsambo yomwisambanga mu mwingilo wa budimi. Powiteakanya, tala ngikadilo kampanda mikatampe itele’ko bantu bavule ba mu wenu mwaba mutyima. Tonga mutwe wa mwanda ukupa mukenga wa kulombola lukulupilo luleta Bible molukapwila mine ngikadilo’ya. Ukokeja padi kusañuna myanda mikatampe ibidi ya kuvungulula mutwe wa mwanda owatonga. Tala i bisonekwa’ka byokengidija mwa kubingijija mine myanda’i. Kupwa teakanya muswelo wa kushilula mīsambo yenu. Kuno kwiteakanya kukakupa muswelo wa kushinta milangwe moishintyilwanga nyeke mu mīsambo. Kadi kukakukwasha unene bintu bikavulukwa nyeke na mwisambi nobe.