Kwingidija Myanda Ikupelwe

BIBLE udingakenye kipwilo kya bwine Kidishitu na umbidi wa muntu. Kipindi ne kipindi kidi na mvubu, ino “kebidipo na mwingilo umo onka abyo byonso, mhm.” Kukwatañana na kino, netu tufwaninwe kwingila mwingilo o-onso obetupa kwingila. Kino kilomba twivwanije ne kupipidila biyampe ku kipindi kyo-kyonso kya buneni kyobetupa, kupita’ko kupēlula mvubu ya bishinte bimobimo na kulanga amba kudi bikwabo bitobala kutabuka. (Loma 12:4-8) Kabumbo ka umpika wa binebine ne wa manwa kadi na kiselwa kya kuleya bidibwa bya ku mushipiditu pa ‘kitatyi kifwaninwe.’ (Mat. 24:45) Wivwane twingidije manwa etu na kuvungulula mīsambo mungya bulombodi botupebwa, nabya tubalombola mutyima wa kufwija’ko pangala pa ino mpangiko. Kino kikakwasha kipwilo kingile biyampe akyo kyonso kituntulu.

I Bika Byotukatweja’mo. Shi abakupe mwanda wa kunena ku masomo, ta mutyima wa kuvungulula’nka mwanda’wa, kokolwa kuvungulula mwanda mukwabo. Divule dine, batelanga mabuku kwa kunyemena. Shi kebakulombwelepo mu mabuku mwa kusela myanda ya kwimanina’po mu mwisambo obe, nabya boya myanda mu mabuku makwabo okatonga abe mwine. Inoko poteakanya mwisambo obe, ta mutyima wa kwimanija mwisambo obe onso mutuntulu pa mwanda obakupele. Shi kotyibe mbila ya kuyuka bya kutweja’mo, ufwaninwe kadi kuta mutyima ne ku bemvwaniki bobe.

Wifunde na katentekeji myanda ikupelwe, kadi bandaula bisonekwa bidi’mo. Kupwa tala muswelo okengidija’byo senene mwanda wa bemvwaniki bobe bamwene’mo kamweno. Sañuna mu dibuku myanda ibidi nansha isatu yokengidija bu yobe myanda mikatampe mu mwisambo obe. Kadi sañuna mu myanda ikupelwe bisonekwa byosaka kukatanga ne kwisambila’po.

I myanda inga yofwaninwe kwisambila’po? I enka yoya yobwanya kunena mobifwaninwe. Kokisupaija bufundiji bulumbuluke kofwila kunena myanda kapwila. Shi myanda imo keikwatañenepo na kitungo kya mwisambo obe, imanina enka pa bipindi bikakukwasha ufikile pa kitungo’kya. Mu myanda ikupelwe, ingidija enka yoya iboilwa’ko ñeni ne ya kamweno ka binebine ku bemvwaniki bobe. Kitungo kyobe mu uno mushetekelo wa buneni i kwingidija myanda ikupelwe bu pa kwimanina mwisambo obe, ke kutalapo buvule bwa myanda yonena mu kipindi kyobe.

Kipindi kyobe kekyakikala’tu kya kwipipija myanda ikupelwe. Ino ufwaninwe kukimba kushintulula myanda imoimo, kutandabula’yo, kwelekeja’yo, pakwabo ne kuleta kimfwa kya mwa kulondela’yo umbūmi. Ukokeja kutweja’mo milangwe mikwabo mwa kuvungulwila milangwe ya kamweno mu myanda ikupelwe, ino kokipingakanya myanda ikupelwe na ingi.

Batutu babwanye bisakibwa bya bu bafundiji bakokeja kyaba kimo kupebwa bufundiji ku Kupwila kwa Mingilo. Bafwaninwe kwivwanija kamweno kadi mu kwingidija biyampe myanda ibapebwa pa kyaba kya kupingakenya’po myanda mikwabo. Mo monka ne batutu banena mashikulu a bantu bonso, bapebwanga mwadijo wa kulonda. Shako badi na bwanapabo bwa kutweja’mo tuntu tukwabo, ino bamwekejanga patōka myanda mikatampe ya kuvungulula, bubinga bwine bukwatakanya’yo, ne bisonekwa bimanine’po dishikulu. Kuyuka kufundija na kwala kyalwilo pa myanda ikupelwe kudi na kamweno mwanda kukuteakanyanga ku madyese makwabo a buneni.

Buno bufundiji bukakukwasha ne mu kwendeja bifundwa bya Bible byendelela kumeso. Ukayuka kwimanina enka pa myanda ya kwifunda pa kyaba kya kusasuka ku mwanda na kutyityija bintu bikokeja kusangaja abyo’ko byampikwa mvubu pa kusaka kwivwanija biyampe mwanda omwisambila’po. Ino shi ubajingulula mulangwe wimanine’po kino kifundwa, kusapo kwikala na mutyima mūmu wa kwimanina enka pa bilembelwe koleka’nka ne kubweja bushintuludi bukwabo busakilwa mwifundi.