Byelekejo bya Myanda Miyukane

EYO, i biyampe byelekejo byonso byoleta bikale shabyo bikwatañane na myanda yowisamba. Ino pa kusaka bikale bifike’po mpata, i biyampe kadi bikale bikwatañane na bemvwaniki bobe.

Le mwikadilo wa bemvwaniki ukokeja namani kukuludika pa kutonga byelekejo bya kwisamba ku meso a kibumbo? Lelo Yesu Kidishitu wālongele’po namani? Kitatyi kyaādi wisamba ku meso a bibumbo nansha a bandi bana ba bwanga, kādipo uleta bimfwa bya mikadilo ya umbūmi iyukene mpata panja pa ntanda ya Isalela. Bimfwa bya uno muswelo kebyādipo bya kuyukwa na bemvwaniki bandi. Tulete kimfwa, Yesu kātelelepo būmi bwa mu kipango kya balopwe ba Edipito nansha bibidiji bya mutōtelo wa bene India. Inoko byelekejo byandi byonso byādi bitamba mu bintu biloñanga bantu ba mu matanda onso. Wēsambile pa kusona mbwija, pa kusungulula bya busunga, pa kujimija kintu kya bulēme, ne pa kukatanwa ku masobo a butundaile. Wādi umona mulongelanga bantu mu ino ngikadilo pala pala, penepa wānenena pa bino bintu. (Mako 2:21; Luka 14:7-11; 15:8, 9; 19:15-23) Inoko, Yesu byaādi usapula nakampata mu bene Isalela, byelekejo byandi divule dine byādi bikwatañene mpata na bintu ne na mingilo yabo ya difuku ne difuku. O mwanda wēsambīle pa bintu pamo bwa kudima, mwitabilanga mikōko kudi mukumbi wayo, ne mubikilwanga vinyu mu biseba bya banyema. (Mako 2:22; 4:2-9; Yoa. 10:1-5) Ne kadi wātelele bimfwa bya mu mānga iyukene. Tutele’ko bidi bibala-binga: bupangi bwa ba mulume ne mukaji babajinji, mafuku a Dilobe dya Noa, konakanibwa kwa Sodoma ne Ngomola, ne lufu lwa mukaja Lota. (Mat. 10:15; 19:4-6; 24:37-39; Luka 17:32) Le nobe ubandaulanga na katentekeji namino bintu biloñanga nyeke bemvwaniki bobe ne bitamina byabo kitatyi kyosañuna byelekejo?

Le ukalonga namani shi wisamba na muntu umo nansha na bantu batyetye, ino ke na kibumbopo kikatampe? Longa buninge bwa kutonga kyelekejo kikwatañene mpata na bemvwaniki batyetye’ba. Yesu paādi usapwila mwana-mukaji mwine Samadia bukamoni ku mushimwa wa kubwipi na Saika, wēsambīle pa “mema a būmi” ‘keevwanijapo kyumwa’ dikwabo, ne pa “nsulo ya mema a kusukumuka, suku! suku! suku! [a kupāna] būmi bwa kulādila nyeke ne nyeke-ke”​—yonso ino i mineneno ya kyelekejo ikwatañene na mwingilo wādi wingila mwana-mukaji. (Yoa. 4:7-15) Kadi kitatyi kyaēsambile na bana-balume badi bakenda makonde abo, wānene muneneno wa kyelekejo ukwatañene na mwingilo wabo wa buluwe. (Luka 5:2-11) Mu bino byaba byonso wādi ubwanya kwisambila pa kudima, ke-pantu abo bonso bādi bashikete mu ntanda ya bantu badima madimi, ino mwene byāikele kwitaba senene pa kutela enka mingilo yobādi bengila mwanda wa kukoma mu ñeni yabo kifwatulo kya bintu byobayukile! Le wielelanga’ko nobe kulonga namino?

Eyo, Yesu wādi wisambila ku “mikōko mijimine ya bwine Isalela,” ino mutumibwa Polo aye wātuminwe, ke enkapo kudi Isalela, ino i ne ku mizo ya Bajentaila. (Mat. 15:24; Bil. 9:15) Le kino kyāshiyañenye muneneno wa Polo? I amo. Kimfwa, paātumīne bene Kidishitu ba mu Kodinda mukanda, wātelele’mo bantu banyema lubilo, ne bilongwa bya kudya bidibwa mu matempelo a bankishi, ne mulongo wa bantu ba bushindañani, bintu byādi bibidilwe na boba Bajentaila.​—1 Kod. 8:1-10; 9:24, 25; 2 Kod. 2:14-16, MB.

Le nobe udi na katentekeji na kādi na ba Yesu ne Polo pa kusañuna byelekejo ne bimfwa bya kwingidija mu bufundiji bobe? Le ubandaulanga bitamina ne mingilo ya bukile bukya ya bemvwaniki bobe? Eyo, ntanda ke mishinte mpata tamba mu yoya myaka katwa kabajinji. Bantu bavule bemvwananga misapu itamba kulampe kupityila ku televijo. Bayukanga divule ngikadilo ya mu matanda a bweni. Kokwa kobidi namino, ke bibipo kusela kyelekejo mu ino misapu. Inoko, bintu bitenga bantu mpata divule i byobya byobemwena umbūmi bwabo​—mobo abo, bisaka byabo, mingilo yabo, bidibwa byobadya, ne mwikadilo wa kūlu kwa kwabo.

Shi kyelekejo kyobe kilomba bushintuludi buvule, nankyo yuka amba wisambilanga pa kintu kekibidilwe na bemvwaniki bobe. Kyelekejo kya uno muswelo kikokeja kuvulakanya ne mwanda mwine wa kuboila’ko ñeni. Ku mfulo, bemvwaniki bakavuluka kyelekejo kyobe ino kuvuluka’bo bubinebine bwa mu Bisonekwa byokyadi kiletelwe mpika.

O mwanda Yesu wādi wisambila pa myanda ipēla ya bukile bukya kupita’ko kudingakanya bintu bikutakane. Wādi utela bintu bityebitye aye papo ushintulula bintu bikata, utela bintu bipēla mwa kwivwanijija bintu bikomo. Bine, Yesu wādi ukwatañanya myanda ya difuku ne difuku na bubinebine bwa ku mushipiditu mwa kukwashisha bantu bemvwane ne kuvuluka bukidi bubinebine bwa ku mushipiditu bwaādi ufundija. Bine, kino i kimfwa kiyampe kulonda!