Le Butōtyi bwa Kisaka I Bika?

Tamba kala, Yehova usakanga kisaka ne kisaka kushikatyila pamo mwanda wa kuningisha kipwano kyabo na Leza ne kuningisha kipwano kyabo abo bene. (Kupituluka 6:6, 7) O mwanda Batumoni ba Yehova batoñanga’ko kyolwa kimo yenga ne yenga kya kutōtela pamo mu kisaka—besamba na nsangaji myanda ya Leza ikwatañene na bisakibwa byabo. Nansha shi udi bunka, kino kyo kitatyi kiyampe kupityija na Leza na kwifunda mwanda kampanda wa mu Bible osaka abe mwine.

Kino kyo kitatyi kya kufwena pabwipi na Yehova. “Fwenai kudi Leza, nandi ukemufwena.” (Yakoba 4:8) Tuyukanga Yehova biyampe shi twifunda myanda mivule ya bumuntu bwandi ne bilongwa byandi mu Kinenwa kyandi kisonekwe. Muswelo upēla wa kushilula butōtyi bwa kisaka i kupityija kitatyi na kutangila Bible pamo, na diwi ditunduke, padi na kulonda mpangiko ya ku yenga ne yenga ya Kupwila kwa Būmi ne Mwingilo. Bipindi bya butangi bikokeja kwabanibwa ku muntu ne muntu mu kisaka, kupwa ke mwisambila pa milangwe yomwefunda mu Bisonekwa.

Kino kyo kitatyi kya kupwana bininge mu kisaka. Balume ne bakaji, bambutwile ne bana, bonso baningishanga kipwano kyabo kitatyi kyobefunda Bible pamo mu kisaka. Kifwaninwe kwikala kitatyi kya nsangaji, kya ndoe ne kisangelwa bininge na bonso mu yenga. Bambutwile bakatonga myanda ya kwifunda kukwatañana na myaka ya babo bana, pakwabo bakengidija myanda itanwa mu Kiteba kya Mulami ne Langukai! nansha pa diteba dyetu jw.org. Mukokeja kwisambila pa makambakano atana benu bana ku masomo ne muswelo wa kupwija’o. Mwene mukokeja kutala mpangiko ya Televijo yetu ya JW (tv.jw.org) ne kwisambila’po pa kupwa kutala’yo? Mubwanya ne kwimba ñimbo ikembwa ku kupwila ne kudya nansha kutoma twa kutoma kupwa kwa butōtyi bwa kisaka.

Kino kitatyi kya pa bula kipityijibwa yenga ne yenga pa kutōta Yehova pamo kikakwasha bonso mu kisaka basangele Kinenwa kya Leza, kadi Leza nandi ukesela mpata bukomo bomulonga.—Ñimbo ya Mitōto 1:1-3.

• Mwanda waka twitūdilanga’ko kitatyi kya kulonga butōtyi bwa kisaka?

• Le bambutwile bakalonga bika pa kusaka’mba butōtyi bwa kisaka bwikale busangaja bonso?